Yohaannisi Xaafidoogaa 20:1-31
20 Saaminttawu koyro gallassi, Magddala Mayraama away kiyennan wonttimaatti xuman duufuwa sohuwa baada, shuchchaa duufuwa doonappe denttiichchidoogaa beꞌaasu.
2 Hegaa gishshawu, A Simoon Pheexiroosakkonne Yesuusa kaalliya I siiqiyogaakko woxxaydda baada etayyo, “Eti Godaa duufuwappe kessidi efiichchidosona, qassi eti A awan wottidaakko erokko” yaagaasu.
3 He wode, Pheexiroosinne Yesuusa kaalliya hankkoy duufuwa sohuwa baanawu denddidosona.
4 Eti naaꞌꞌay issippe woxxiyogaa doommidosona, shin Yesuusa kaalliya hankkoy Pheexiroosappe eesuwan woxxiyo gishshawu, duufuwa sohuwa kasetidi gakkiis.
5 I hokkidi liinuwa afalay micetti uttidaagaa beꞌiis, shin giddo gelibeenna.
6 Hegaappe simmin, Simoon Pheexiroosikka A kaalli gakkidi, duufuwa giddo geliis. Qassi I Liinuwa afalay micetti uttidaagaa beꞌiis.
7 Kase A huuphiyan deꞌiya afalay hankko afalaara micetti uttibeenna, shin xaaxettidi barkka deꞌees.
8 Hegaappe simmin, duufoy deꞌiyosaa koyro gakkida, Yesuusa kaalliya hankkoykka giddo geliis, qassi I beꞌidi ammaniis.
9 Ayssi giikko, I hayquwappe denddanaagaa Geeshsha Maxaafay yootiyo qofaa eti biron akeekibookkona.
10 Yaanin, Yesuusa kaalliyageeti bantta soo biidosona.
11 Shin Mayraama duufuwa matan eqqada yeekkawusu. A yeekkaydda duufuwa giddo hokka xeellada,
12 boottaa maayuwa maayida naaꞌꞌu kiitanchchati Yesuusa anhaa wottidosan uttidaageeta beꞌaasu; issoy A huuphiya sohuwan uttiis, hankkoy qassi A tohuwa sohuwan uttiis.
13 Eti O, “Maccaasee, ayssi yeekkay?” yaagidosona. A etayyo, “Eti ta Godaa efiichchidosona, qassi eti A awan wottidaakko taani erikke” yaagaasu.
14 A yaaga simmada, guyye simmada Yesuusi eqqidaagaa beꞌaasu, shin I Yesuusa gidiyogaa akeekabeykku.
15 Yesuusi O, “Maccaasee, neeni ayssi yeekkay? Neeni oona koyay?” yaagiis. A I gaden oottiya ura ga qoppada ayyo, “Godawu, neeni A efiidaba gidikko, A awan wottidaakko taayyo yootikko, taani A efaana” yaagaasu.
16 Yesuusi O, “Mayraamee!” yaagiis. Mayraama guyye simmada Ibraawettuwan A, “Rabbooni!” yaagaasu (hegee “Asttamaariyawu!” giyogaa).
17 Yesuusi iyyo hagaadan giis: “Taani Aawaakko biron babeenna gishshawu, tana kutuuta oyqqoppa, shin ta ishatukko baada, taani ta Aawaakkonne intte Aawaakko, qassi ta Xoossaakkonne intte Xoossaakko biyogaa etayyo yoota.”
18 Magddala Mayraama baada, Yesuusa kaalliyageetuyyo, “Taani Godaa beꞌaas!” yaagaasu. Qassi Yesuusi iyyo odidobaa etawu yootaasu.
19 He saaminttawu koyro gallassi omarssi, Yesuusa kaalliyageeti Ayhudatuyyo yayyidi kariya gorddi uttidaashin, Yesuusi yiidi eta giddon eqqidi eta, “Intteyyo saroy gido” yaagiis.
20 I yaagi simmidi, ba kushetanne ba miyyiya eta bessiis. Yaatin Godaa kaalliyageeti A beꞌidi ufayttidosona.
21 Yesuusi haranttuwakka etayyo hagaadan giis: “Intteyyo saroy gido. Aaway tana kiittidoogaadan, taanikka inttena kiittays.”
22 I yaagi simmidi eta bolli punnidi, etayyo hagaadan giis: “Geeshsha ayyaanaa ekkite.
23 Intte issi ura nagaraa atto giikko, Xoossaykka ayyo atto gi uttiis; shin intte issi ura nagaraa atto gaana xayikko, Xoossaykka ayyo atto gibeenna.”
24 Shin kiitettida tammanne naaꞌꞌatuppe issoy, Menttiya giyo Toomaasi, Yesuusi yiido wode etaara deꞌenna.
25 Yaatin Yesuusa kaalliya harati ayyo, “Nuuni Godaa beꞌida!” yaagidosona. Shin I etayyo hagaadan giis: “Taani A kushetun misimaariya malaatata* beꞌennaaninne he malaatata ta biradhdhiyan bochchennan, qassi A miyyiya ta kushiyan bochchennan mule ammanikke.”
26 Hosppun gallassappe guyyiyan, Yesuusa kaalliyageeti son shiiqidosona, qassi Toomaasikka etaara deꞌees. Karee gordda gidikkokka, Yesuusi yiidi eta giddon eqqidi, “Intteyyo saroy gido” yaagiis.
27 Hegaappe simmin, I Toomaasayyo hagaadan giis: “Ne biradhdhiyan ta kusheta bochcha, qassi ne kushiyan ta miyyiya bochcha, yaatada siriyogaa* aggada ammana.”
28 Toomaasi ayyo, “Ta godawu, ta Xoossawu!” yaagiis.
29 Yesuusi ayyo, “Neeni tana beꞌido gishshawu ammanadii? Beꞌennan ammaniyageeti ufayttoosona” yaagiis.
30 Yesuusi ha maxaafan* xaafettibeenna hara daro malaatatakka bana kaalliyageetu sinttan oottidoogee tuma.
31 Shin Yesuusi Kiristtoosa, Xoossaa Naꞌaa gidiyogaa intte ammanana malanne intte ammaniyogaappe denddidaagan, A sunttan deꞌuwa demmana mala hageeti xaafettidosona.
Footnotes
^ Woykko “baqeta.”
^ Mise, “ammanennaagaa gidiyogaa.”
^ Mise, “xaaxettidaagan.” Xamꞌꞌaa bolli xaaxi wottido adussa galbbaa woy woraqataa.
