Yohaannisi Xaafidoogaa 3:1-36
3 Ayhudata kaalettiya Niqoodimoosa giyo Parisaawe bitanee deꞌees.
2 I qamman Yesuusakko biidi hagaadan giis: “Rebbi, Neeni oottiyo malaaliyabata ooninne Xoossay A maaddennan oottana danddayenna gishshawu, neeni Xoossay kiittido asttamaare gidiyogaa nuuni eroos.”
3 Yesuusi ayyo, “Taani neeyyo tumaa odays, ooninne haranttuwa yelettana* xayikko, Xoossaa Kawotettaa gelana danddayenna” yaagiis.
4 Niqoodimoosi ayyo hagaadan giis: “Issi asi cimidi waanidi yelettana danddayii? I ba aayee ulo giddo gelananne naaꞌꞌanttuwa yelettana danddayii?”
5 Yesuusi hagaadan giidi zaariis: “Taani neeyyo tumaa odays, ooninne haattan muukettidinne ayyaanaa ekkidi yelettana* xayikko, Xoossaa Kawotettaa gelana danddayenna.
6 Asaappe* yeletidaageeti asa,* qassi ayyaanaappe yelettidaageeti ayyaana.
7 Taani neeyyo, ‘Intte haranttuwa yelettana bessees’ giido gishshawu malaalettoppa.
8 Carkkoy ba koyiyosaa carkkees, qassi neeni I carkkiyogaa siyaasa, shin I awuppe yiyakko woy awu biyakko erakka. Ayyaanaappe yelettida ubbay hegaa mala.”
9 Niqoodimoosi ayyo, “Hegeeti awan hananee?” yaagiis.
10 Yesuusi hagaadan giis: “Neeni Israaꞌeelatu asttamaare; yaanin hegaa waana erikkii?
11 Taani neeyyo tumaa odays, nuuni eriyobaa yootoos, qassi beꞌidobaa markkattoos, shin nuuni markkattiyobaa intte ekkekketa.
12 Taani neeyyo saꞌaabaa yootin ammanabaakka, shin saluwabaa yootiyakko waanada ammanuutee?
13 Qassi saluwappe wodhdhida asa Naꞌaappe attin, ay asinne saluwa kiyibeenna.
14 Qassi Muusee bazzuwan shooshshaa kaqqidoogaadan, asa Naꞌay kaqettana bessees;
15 hegee A ammaniya ubbay merinaa deꞌuwa demmanaadaana.
16 Ayssi giikko, Xoossay saꞌan deꞌiya asaa* keehi siiqido gishshawu, ba dumma Naꞌaa immiis; A Naꞌaa ammaniya ubbay merinaa deꞌuwa demmanaappe attin, xayenna mala I hegaadan oottiis.
17 Ayssi giikko, Xoossay ba Naꞌaa baggaara saꞌan deꞌiya asaa* ashshanaassappe attin, A Naꞌay eta pirddana mala A etakko* kiittibeenna.
18 An ammaniya O bollinne pirddettenna. Ammanenna ooninne Xoossawu dumma Naꞌaa sunttan ammanibeenna gishshawu, A bolli pirddettiichchiis.
19 Pooꞌoy saꞌan deꞌiya asaakko* yiidoogee tuma, shin eti iitabaa oottiyo gishshawu, pooꞌuwa dosiyogaa aggidi xumaa dosidosona; eti pirddaa ekkanay hegaassa.
20 Ayssi giikko, iitabaa oottiya ooninne pooꞌuwa ixxees, qassi I oottiyo iitabaa pooꞌoy qonccissenna mala, pooꞌuwakko yeenna.
21 Shin suurebaa oottiya ooninne I oottidobay Xoossaa sheniyara maayiyaba gidiyogee qonccana mala, pooꞌuwakko yees.”
22 Hegaappe simmin, Yesuusinne A kaalliyageeti Yihudaa gaxariya biidosona, I yan etaara amarida wodiya takkiis, qassi I asaa haattan muukkiis.*
23 Shin Yohaannisikka Saliima matan deꞌiya Henoonan daro haattay deꞌiyo gishshawu, yan haattan muukkees, qassi asay akko bin I eta haattan muukkees;
24 ayssi giikko, Yohaannisi he wode qashettibeenna.
25 Geeshshatettaa wogaara gayttidaagan, Yohaannisa kaalliyageeti Ayhuda bitaniyara palamettidosona.
26 Yaatidi, eti Yohaannisakko biidi ayyo hagaadan giidosona: “Rebbi, neeni abaa markkattidonne Yorddanoosappe arshsho baggan nenaara gayttida bitaniya hassayay? I asaa haattan muukkees, hegaa gishshawu asay ubbay akko bees.”
27 Yohaannisi hagaadan giis: “Issi uri Xoossay awu maataa immennan deꞌishin aybanne oottana danddayenna.
28 Taani, ‘Ta Kiristtoosa gidikke, shin appe sinttawu kiitettaas’ giidoogaa intte siyideta.
29 Mishira maccaasiya mishiraaba. Shin mishiraa laggee mishiraa matan eqqidi I yootiyobaa siyiyo wode, keehi ufayttees. Hegaa gishshawu, ta ufayssay kumexxiis.
30 A oosoy gujji gujji baana, shin taagee guuxxi guuxxi baana.”
31 Bollappe yiya uri hara ubbaappe gita. Saꞌaappe denddiya uri saꞌaappe denddidaagaa gidiyo gishshawu, saꞌan deꞌiyabaa yootees. Saluwappe yiya uri hara ubbaappe gita.
32 I beꞌidobaanne siyidobaa markkattees, shin I markkattiyobaa ooninne ammanenna.
33 I markkattiyobaa ammaniya ooninne Xoossay tuma gidiyogaa maayiis.*
34 Xoossay ba ayyaanaa likkidi* immenna gishshawu, Xoossay kiittido uri I odidobaa yootees.
35 Aaway Naꞌaa siiqees, qassi ubbabaa aawatettaa ayyo immiis.
36 Naꞌaa ammaniya asi merinaa deꞌuwa demmana; Naꞌaayyo azazettenna asa Xoossay awudenne hanqqettanappe attin, I deꞌuwa demmenna.
Footnotes
^ Woykko geella, “bollappe yelettana.”
^ Mise, “haattaappenne ayyaanaappe yelettana.”
^ Mise, “Ashuwappe.”
^ Mise, “asho.”
^ Mise, “saꞌaa.”
^ Mise, “saꞌaa.”
^ Mise, “saꞌaa.”
^ Mise, “saꞌaa.”
^ Mise, “ba maatafaa an wottiis.”
^ Woykko “guuttaa guuttaa.”
