Yohaannisi Xaafidoogaa 4:1-54
4 Hegaappe simmin, Yesuusi Yohaannisaagaappe aaruwan asay A kaallanaadan oottiyogaanne eta haattan muukkiyogaa Parisaaweti siyidosona. Qassi Goday hegaa erido wode
2 (Yesuusa kaalliyageetappe attin, I asaa haattan muukkana xayikkonne),
3 I Yihudaappe haranttuwakka Galiilaa biis.
4 Shin I Samaariyara kanttiyogee attennaba gidiis.
5 Yaanin, I Samaariyan Yaaqoobi ba naꞌaa Yooseefayyo immido gadiya matan deꞌiya Sikaara katamaa gakkiis.
6 Yaaqooba haattaa ollay yan deꞌees. Yesuusi hemetay bana daafurssin he ollaa* matan uttiis. He wode saꞌay usuppun saate heera.
7 Samaariya macca asa issinna haattaa duuqqanawu yaasu. Yesuusi O, “Tana haattaa ushsha” yaagiis.
8 (A kaalliyageeti miyobaa shammanawu katamaa biidosona.)
9 Yaatin, Samaariya maccaasiya ayyo hagaadan gaasu: “Taani Samaare macca asa gidishin, neeni Ayhuda asa gidaydda tana waanada haattaa oychchay?” (Ayssi giikko, Ayhudati Samaaretuura haasayokkona.)
10 Yesuusi iyyo hagaadan giis: “Neeni Xoossay coo immiyo imotaa erakka, qassi, ‘Tana haattaa ushsha’ giyagee oonakkokka erakka. Neeni hegaa eriyakko A oychchana, yaatin I neeyyo deꞌo haattaa immana.”
11 Maccaasiya ayyo hagaadan gaasu: “Godawu, neeyyo haattaa duuqqiyobi baawa, qassi ollaykka keehi ziqqa. Yaatin, neeni ha deꞌo haattaa taayyo awuppe immuutee?
12 Neeni nu mayzza aawaa Yaaqoobappe aadhdhay? I nuuyyo ha ollaa immiis, qassi I, A naatinne A meheti hagaappe uyidosona.”
13 Yesuusi iyyo hagaadan giis: “Ha haattaappe uyiya ubbay haranttuwa saamettana.
14 Taani immiyo haattaa uyiya ooninne mule saamettenna, shin taani ayyo immiyo haattay merinaa deꞌuwa demissiya, A giddon pulttiya haatta gidana.”
15 Maccaasiya ayyo, “Godawu, taani saamettennaadaaninne haattaa duuqqanawu zaara zaarada ha sohuwa yeennaadan taayyo he haattaa imma” yaagaasu.
16 Yesuusi O, “Baada ne azinaa ekkada ya” yaagiis.
17 Maccaasiya, “Taayyo azini baawa” yaagaasu. Yesuusi iyyo hagaadan giis: “Neeni, ‘Taayyo azini baawa’ giidoogee likke.
18 Ayssi giikko, neeni kase ichchashu azinata geladasa, qassi haꞌꞌi nenaara deꞌiyagee ne azina gidenna. Yaatiyo gishshawu, neeni yootidobay tuma.”
19 Maccaasiya ayyo hagaadan gaasu: “Godawu, neeni Xoossay erissidobaa yootiya ura gidennan aggakka.
20 Nu mayzza aawati ha deriyan goynnidosona, shin asay Yerusalaamen goynnana bessiyogaa intte yooteeta.”
21 Yesuusi iyyo hagaadan giis: “Maccaasee, taani yootiyobaa ammana; Aawaayyo ha deriyan woy Yerusalaamen intte goynnenna wodee yaana.
22 Intte oossi goynniyakko erekketa, shin atotettay doommiyoy Ayhudatuuna gidiyo gishshawu, nuuni oossi goynniyakko eroos.
23 Gidoppe attin, Aawaayyo tumuppe goynniyageeti ayyaanaaninne tuman goynniyo wodee yaana, qassi haꞌꞌi yiichchiis; ayssi giikko, Aaway baassi goynnanaadan hegaa mala asata koyees.
24 Xoossay ayyaana, qassi ayyo goynniyageeti ayyaanaaninne tuman goynnana bessees.”
25 Maccaasiya ayyo hagaadan gaasu: “Kiristtoosa giyo, Masee yaanaagaa taani erays. I yiyo wode, nuuyyo ubbabaa qonccissana.”
26 Yesuusi iyyo, “Nenaara haasayiya taani A” yaagiis.
27 He wode Yesuusa kaalliyageeti simmidi, I issi maccaaseera haasayiyogaa beꞌidi malaalettidosona. Shin I maccaaseera haasayiyoy aybissakko woy I ay koyidaakko ooninne oychchibeenna.
28 Yaatin, maccaasiya haattaa otuwa agga bayada katamaa baasu. Baada, asaayyo hagaadan gaasu:
29 “Taani oottido ubbabaa taayyo yootida bitaniya beꞌanawu hinddite. I Kiristtoosa gidaneeshsha?”
30 Eti katamaappe kiyidi akko biyogaa doommidosona.
31 He wode, A kaalliyageeti, “Rebbi, ma” yaagidi A woossidosona.
32 Yesuusi etayyo, “Tawu qumay deꞌees; intte hegee aybakko erekketa” yaagiis.
33 Yaatin, A kaalliyageeti, “Ayyo qumaa ehiida asi deꞌaneeyye?” yaagidi issoy issuwara haasayidosona.
34 Yesuusi etayyo hagaadan giis: “Ta qumay tana kiittidaagee koyiyobaa oottiyogaanne I taayyo immido oosuwa oottada wurssiyogaa.
35 Intte ha wodiyan darotoo, kattaa cakkanawu oyddu aginay attidoogaa yooteeta. Siyite! Taani intteyyo hagaa odays: Kattay bootidi cahawu gakkidoogaa beꞌite. Haꞌꞌi
36 cakkiyagee damoozaa ekkiiddi deꞌees, qassi zeriyageenne cakkiyagee issippe ufayttana mala, merinaa deꞌuwawu I kattaa shiishshiiddi deꞌees.
37 Hegaara gayttidaagan, ‘Issoy zeriyagaa, qassi haray cakkiyagaa’ giyo leemisoy tuma.
38 Harati daafuridobaa cakkanaadan taani inttena kiittaas. Harati daafuridosona, qassi eti daafuridobaappe intte goꞌettideta.”
39 He kataman deꞌiya Samaariya asaappe daroti maccaasiya, “Taani oottido ubbabaa taayyo I yootiis” gaada markkattido gishshawu A ammanidosona.
40 Samaariya asay akko yiidi, I eta matan takkanaadan oychchin, yan naaꞌꞌu gallassaa takkiis.
41 Hegaappe denddidaagan, hara daroti I tamaarissidobaa siyido gishshawu ammanidosona;
42 qassi eti maccaaseeyyo hagaadan giidosona: “Nuuni kase ammanidoogaadan, neeni yootidobaa gishsha xalaalawu ammanokko; ayssi giikko, I yootiyobaa nuuni nu huuphe siyida, qassi I tumukka saꞌan deꞌiya asaa* ashshiyagaa gidiyogaa eroos.”
43 Naaꞌꞌu gallassappe guyyiyan, I yaappe Galiilaa biis.
44 Shin Xoossay erissidobaa yootiya uri ba biittan bonchchettennaagaa Yesuusi ba huuphe markkattiis.
45 Yesuusi Galiilaa gakkido wode, Galiilaa asaykka baalawu Yerusalaame biidi, I yan oottido ubbabaa beꞌido gishshawu, A mokki ekkidosona.
46 Yaatin, I haattaa woyne eessa kessido Galiilan deꞌiya Qaana katamaa zaarettidi biis. A naꞌay sahettido, kawo keettan oottiya issi bitanee Qifirinaahooman deꞌees.
47 Ha bitanee Yesuusi Yihudaappe Galiilaa biidoogaa siyidi, A naꞌay hayqqana haniyo gishshawu, Yesuusi duge wodhdhidi naꞌaa pattanaadan oychchiis.
48 Yesuusi ayyo, “Intte malaatatanne malaaliyabata beꞌennan mule ammanekketa” yaagiis.
49 Kawo keettan oottiyagee A, “Godawu, ta naꞌay hayqqennan deꞌishin hindda” yaagiis.
50 Yesuusi ayyo, “Ne soo ba; ne naꞌay paxiis” yaagiis. Bitanee Yesuusi yootidobaa ammanidi biis.
51 Qassi bitanee ba soo biishin, A aylleti aara gayttidi A naꞌay paxidoogaa ayyo yootidosona.
52 Yaatin, I naꞌay paxiyo wode saatee aappunakko eta oychchiis. Eti ayyo, “Zino laappun saatiyan* mishoy A aggiis” yaagidosona.
53 Yesuusi, “Ne naꞌay paxiis” giido saatiyan naꞌay paxidoogaa aaway eriis. Qassi inne A keettaa asay ubbay ammanidosona.
54 Yesuusi Yihudaappe Galiilaa biido wode oottido malaaliyabaappe naaꞌꞌanttoy hagaa.
