Yohaannisi Xaafidoogaa 5:1-47
5 Guyyeppe Ayhudatu baalaa wodee gakkin, Yesuusi Yerusalaame kiyiis.
2 Ibraawettuwan Beetezaata giyo dalbbanttay Yerusalaamen Dorssatu Penggiya matan deꞌees; he dalbbanttaa yuuyi aadhdhidi tuussati eqqido ogee deꞌees.
3 Hargganchchati, qooqeti, wobbeti, qassi kusheenne tohoy silidoogeeti* daroti yan zinꞌꞌidosona.
4 ——
5 Shin 38 laytta harggida issi bitanee yan deꞌees.
6 Yesuusi he bitanee hegan zinꞌꞌidoogaa beꞌiis, qassi I daro wodiyawu harggidoogaa akeekidi A, “Neeni paxanawu koyay?” yaagiis.
7 He hargganchcha bitanee ayyo hagaadan giis: “Godawu, haattay qaaxxiyo wode tana dalbbanttan yeggiya asi baawa, shin taani biyo wode hara asi taappe kasetidi gelees.”
8 Yesuusi A, “Dendda! Ne hiittaa* tookkada hemetta” yaagiis.
9 Yaagin, bitanee sohuwara paxidi, ba hiittaa* tookkidi hemettiyogaa doommiis.
He gallassay Sambbata.
10 Yaanin, Ayhudati paxida bitaniyayyo, “Hachchi Sambbata gidiyo gishshawu, neeni hiittaa* tookkiyogee woga gidenna” yaagidosona.
11 Shin I etayyo hagaadan giis: “Tana pattida bitanee tana, ‘Ne hiittaa* tookkada hemetta’ yaagiis.”
12 Eti A, “Nena, ‘Ne hiittaa tookkada hemetta’ giida bitanee oonee?” yaagidi oychchidosona.
13 Shin Yesuusi yan deꞌiya asaa giddo biichchido gishshawu, I oonakko paxida bitanee eribeenna.
14 Hegaappe simmin, Yesuusi Xoossaa garuwan bitaniyara gayttidi A, “Neeni haꞌꞌi paxadasa. Hagaappe iitabay nena gakkenna mala nagaraa oottoppa” yaagiis.
15 Bitanee biidi, bana pattidaagee Yesuusa gidiyogaa Ayhudatuyyo yootiis.
16 Hegaappe denddidaagan, Yesuusi Sambbatan hegaa malabata oottido gishshawu, Ayhudati A wayssidosona.
17 Shin I etayyo, “Ta Aaway hanno gakkanawu oottiyogaa aggibeenna; taanikka oottiyogaa aggikke” yaagiis.
18 Hegaappe denddidaagan, Ayhudati Yesuusi Sambbataa higgiya kanttidoogaa xalaala gidennan, Xoossaa baayyo Aawaa giidi bana Xoossaara laggeyiis giidi qoppido gishshawu, A woranawu kaseegaappe aaruwan koyidosona.
19 Hegaa gishshawu, Yesuusi etayyo hagaadan giis: “Taani intteyyo tumaa odays, Aaway oottishin beꞌiyobaa xalaalappe attin, Naꞌay ba shenen issibaanne oottana danddayenna. Ayssi giikko, Aaway oottiyo aybakka Naꞌaykka hegaadan oottees.
20 Ayssi giikko, Aaway Naꞌaa siiqees, qassi I ba huuphe oottiyo ubbabata A bessees, qassi intte malaalettana mala, I hageetuppekka aadhdhiya oosota A bessana.
21 Qassi Aaway hayqqida asata denttidi etayyo deꞌuwa immiyogaadan, Naꞌaykka I immanawu koyiyogeetuyyo deꞌuwa immees.
22 Ayssi giikko, Aaway oonanne yiggi xeellenna, shin Naꞌaa ubbaayyo daanna oottidi sunttiis;
23 ubbay Aawaa bonchchiyogaadan Naꞌaa bonchchana mala, I hegaa oottiis. Naꞌaa bonchchenna ooninne A kiittida Aawaa bonchchenna.
24 Taani intteyyo tumaa odays, taani yootiyobaa siyiyanne tana Kiittidaagaa ammaniya ooninne merinaa deꞌuwa demmana, qassi I hayquwappe deꞌuwawu pinniisippe attin, A bolli pirddettenna.
25 “Taani intteyyo tumaa odays, hayqqida asay Xoossaa Naꞌaa qaalaa siyiyo wodee gakkiis, qassi haꞌꞌi doommiis; siyidi azazettidaageeti deꞌuwa demmana.
26 Aaway deꞌoy* A giddon deꞌiyogaadan, Naꞌaa giddonkka deꞌoy deꞌanaadan ayyo immiis.
27 I asa Naꞌaa gidiyo gishshawu, pirddanawu maataa ayyo immiis.
28 Duufotun* deꞌiyageeti ubbay A qaalaa siyana wodee matattido gishshawu, hagan malaalettoppite;
29 qassi eti duufotuppe kiyana; loꞌꞌobaa oottidaageeti deꞌuwa demmanawu denddana, qassi iitabaa oottidaageeti pirddettanawu denddana.
30 Taani ta shenen issibaanne oottana danddayikke. Taani ta Aaway taayyo yootidoogaadan pirddays; taani tana kiittidaagaa sheneenippe attin, ta shenen oottenna gishshawu, suure pirddays.
31 “Tabaa ta xalaalay markkattikko, taani markkattiyobay tuma gidenna.
32 Haraykka tabaa markkattees, qassi I tabaa markkattiyobay tuma gidiyogaa taani erays.
33 Intte Yohaannisakko asaa kiittideta, qassi I tabaa tumaa markkattiis.
34 Gidoppe attin, asi markkattiyogee taayyo koshshenna, shin taani hageeta intte attana mala yootays.
35 He bitanee eexxiyanne pooꞌiya xomppe, qassi intte A pooꞌuwan keehi ufayttanawu guutta wodiyawu halchchideta.
36 Tana ta Aaway kiittidoogaa Yohaannisi markkattikkonne, taayyo aagaappe aadhdhiya naqaashay deꞌees; taani oottada polanaadan ta Aaway immido oosuwa oottaydda deꞌiyogee hegaassa.
37 Qassi tana kiittida Aaway tabaa markkattiis. Intte ay wodenne I haasayishin siyibeekketa woy A somꞌꞌuwa beꞌibeekketa,
38 qassi intte Xoossaa qaalaa intte wozanan wottibeekketa; intte I kiittido uraa ammanennay hegaassa.
39 “Intte merinaa deꞌuwa demmanawu qoppidi Geeshsha Maxaafata pilggeeta; tabaa markkattiyageeti hegeeta.*
40 Shin intte taakko yaana koyekketa; intte yiyakko deꞌuwa demmana.
41 Tana asi bonchchana mala koyikke,
42 shin intte Xoossaa siiqennaagaa taani loytta erays.
43 Taani ta Aawaa sunttan yaas, shin intte tana ammanekketa. Issi asi ba sunttan yiikko, intte A ammaneeta.
44 Intte A xalaalay tumu Xoossaa gididaagaa bonchchuwa koyiyogaa aggidi issoy issuwa bonchchiiddi, waanidi ammanana danddayeetii?
45 Tana Aawaa sinttan inttena mootees giidi qoppoppite; inttena mootiya uri deꞌees; I intte ammanettiyo Muusa.
46 Muusee tabaa xaafido gishshawu, intte Muusa ammaniyakko tanakka ammanana.
47 Shin intte I xaafidobaa ammanennaba gidikko, taani yootiyobaa waanidi ammananee?”
Footnotes
^ Woykko “qassi gunddati.”
^ Woykko “saleenaa.”
^ Woykko “saleenaa.”
^ Woykko “saleenaa.”
^ Woykko “saleenaa.”
^ Woykko “deꞌuwa imotay.”
^ Mise, “Hassayuwa duufotun.”
^ Hegeekka, Geeshsha Maxaafata.
