Yohaannisi Xaafidoogaa 6:1-71
6 Yesuusi hegaappe simmin, Xibiriyadoosakka giyo Galiilaa Abbaa pinnanawu denddiis.
2 Qassi daro asay I hargganchchata pattiyogan oottido malaaliya malaatata beꞌido gishshawu A kaalliis.
3 Yaanin, Yesuusi issi deriya kiyidi bana kaalliyageetuura yan uttiis.
4 He wode, Ayhudatu baalay, Paasikay matattiis.
5 Yesuusi daro asay baakko yiyogaa beꞌidi Piliphphoosayyo, “Ha asaa mizanawu daabbuwa awuppe shammanee?” yaagiis.
6 Shin I Piliphphoosa paaccanawu hegaadan giis; ayssi giikko, Yesuusi ay oottana haniyakko erees.
7 Piliphphoosi ayyo, “Etawu huuphiyan huuphiyan guutta basuwa immiyakkonne, naaꞌꞌu xeetu dinaariyan shammido daabboykka gidenna” yaagiis.
8 A kaalliyageetuppe issoy, Simoon Pheexiroosa ishay, Inddiraasi ayyo hagaadan giis:
9 “Banggaa komppota ichchashatanne qeeri moleta naaꞌꞌata oyqqida issi naꞌay hagan deꞌees. Shin ha cora asawu hagee waanidi gidanee?”
10 Yesuusi, “Asaa utissite” yaagiis. He sohuwan daro maatay deꞌiyo gishshawu, asay yan uttiis; he asaa giddon 5,000 gidiya attuma asay deꞌees.
11 Yesuusi daabbota ekkidi, woossi simmidi asaayyo gishiis; eti kallidi maanaadan qeeri moletakka gishiis.
12 Shin eti miidi kallin, Yesuusi bana kaalliyageetuyyo, “Aybinne coo xayenna mala, meꞌerettidi attidaagaa shiishshite” yaagiis.
13 Yaatin, eti banggaa komppotu ichchashatuppe asay miishin meꞌerettidi attidaagaa 12 daachcho kumettaa shiishshidosona.
14 Asay I oottido malaataa beꞌido wode, “Hagee tumukka asaakko* yaana geetettida, Xoossay erissidobaa yootiyagaa” yaagiyogaa doommiis.
15 Yesuusi eti A wolqqan kawoyana haniyogaa eridi, haranttuwakka aggidi barkka deriya biis.
16 Saꞌay omarin, A kaalliyageeti abbaa wodhdhidi,
17 Qifirinaahooma pinnanawu wolwoluwan gelidosona. Saꞌay qammiichchiis, qassi Yesuusi etakko biron yibeenna.
18 Qassi wolqqaama carkkoy carkkiyo gishshawu, abbaa balbbuqees.
19 Shin eti haattaa shaaridi ichchashu woy usuppun kilo meetire gidiyagaa* biidosona; he wode Yesuusi haattaa bollaara hemettiiddi wolwoluwa mati gakkidaagaa beꞌidi yayyidosona.
20 Shin I eta, “Tanattennee! yayyoppite” yaagiis.
21 He wode eti I wolwoluwa giddo gelanaadan koyidosona, qassi wolwoloy eti biyosaa sohuwara gakkiis.
22 Wonttetta gallassi abbaappe hefinttan deꞌiya asay issi guutta wolwoloppe haray yan deꞌennaagaa beꞌiis, qassi Yesuusi bana kaalliyageetuura wolwoluwan gelana xayikkonne, A kaalliyageeti banttarkka biichchidoogaa eti akeekidosona.
23 Shin Goday Xoossaa galati simmin eti daabbuwa miido sohuwa mati, Xibiriyadoosappe yiida wolwoloti gakkidosona.
24 Hegaa gishshawu, he asay Yesuusikka A kaalliyageetikka yan deꞌennaagaa beꞌidi, Yesuusa koyanawu wolwolotun gelidi Qifirinaahooma biis.
25 Eti abbaappe hefinttan aara gayttidi A, “Rebbi, hagaa awude yaadii?” yaagidosona.
26 Yesuusi etayyo hagaadan giis: “Taani intteyyo tumaa odays, intte malaatata beꞌido gishshataassa gidennan, daabbuwa miidi kallido gishshawu tana koyeeta.
27 Asa Naꞌay intteyyo immana, merinaa deꞌuwa demissiya moorettenna qumawu oottiteppe attin, moorettiya qumawu oottoppite; ayssi giikko, saluwan deꞌiya Aaway, Xoossay, an keehi ufayttidoogaa bessanawu ba maatafaa A bolli wottiis.”
28 Yaagin, eti ayyo, “Xoossaa ufayssanawu nuuni oottana bessiya oosoy aybee?” yaagidosona.
29 Yesuusi etayyo, “Xoossaa ufayssiyabaa oottanawu, intte I kiittido ura ammanana bessees” yaagiis.
30 Yaagin eti ayyo hagaadan giidosona: “Nuuni beꞌidi nena ammanana mala, ayba malaataa nuna bessuutee? Neeni ay oottuutee?
31 ‘I etawu maanaayyo saluwappe qumaa immiis’ geetettidi xaafettidoogaadan, nu mayzza aawati bazzuwan mannaa miidosona.”
32 Yaagin Yesuusi etayyo hagaadan giis: “Taani intteyyo tumaa odays, Muusee intteyyo saluwappe qumaa immibeenna, shin ta Aaway intteyyo saluwappe tumu qumaa immees.
33 Ayssi giikko, Xoossay immiyo qumay saluwappe yiidi, saꞌan deꞌiya asaayyo* deꞌuwa immiya izaawa.”
34 Yaagin eti A, “Godawu, nuuyyo he qumaa ubbatoo imma” yaagidosona.
35 Yesuusi etayyo hagaadan giis: “Taani tumu deꞌuwa immiya qumaa. Taakko yiya ooninne mule namisettenna, qassi tana ammaniya ooninne mule saamettenna.
36 Gidoppe attin, taani intteyyo yootidoogaadan, intte tana beꞌeeta, shin ammanekketa.
37 Aaway taayyo immiyo ubbay taakko yaana, qassi taakko yiya ura taani mule yedettikke;
38 ayssi giikko, tana kiittidaagee koyiyobaa oottanawu saluwappe yaasippe attin, taani koyiyobaa oottanawu yabeykke.
39 Tana kiittidaagee I taayyo immidoogeeta ubbaa taani wurssettaa gallassi hayquwappe denttanaadan koyeesippe attin, ooninne taappe xayanaadan koyenna.
40 Naꞌay oonakko akeekidi A ammaniya ubbay merinaa deꞌuwa demmanaadan ta Aaway koyees, qassi taani wurssettaa gallassi hayquwappe A denttana.”
41 Yaagin I, “Saluwappe yiida qumay tana” yaagido gishshawu, Ayhudati abaa zuuzummiyogaa doommidosona.
42 Qassi eti hagaadan giyogaa doommidosona: “Hagee A aawaanne aayyiyo nuuni eriyo Yesuusa, Yooseefa naꞌaa gidennee? Haꞌꞌi I waanidi, ‘Taani saluwappe yaas’ yaagii?”
43 Yesuusi etayyo hagaadan giis: “Intte issoy issuwara zuuzummiyogaa aggite.
44 Aaway taakko shiishshana xayikko, ay asinne taakko yaana danddayenna, qassi taani wurssettaa gallassi hayquwappe A denttana.
45 Xoossay erissidobaa yootiyageeti, ‘Eti ubbay Yihoowappe tamaarana’ yaagidi xaafidosona. Aaway tamaarissiyobaa siyiyanne hegaa ammaniya ubbay taakko yees.
46 Ay asinne Aawaa beꞌibeenna; Xoossay kiittido ura xalaalay Aawaa beꞌiis.
47 Taani intteyyo tumaa odays, tana ammaniya ooninne merinaa deꞌuwa demmana.
48 “Taani tumu deꞌuwa immiya qumaa.
49 Intte mayzza aawati bazzuwan mannaa miidosona, shin hayqqidosona.
50 Gidoppe attin, saluwappe yiya qumaa miya ooninne hayqqenna.
51 Taani saluwappe yiida, deꞌuwa immiya qumaa. Ooninne he qumaappe miikko merinawu deꞌana; hegaa bollikka, taani immiyo qumay saꞌan deꞌiya asay* deꞌuwa demmanaadan immiyo ta ashuwa.”*
52 Yaagin Ayhudati, “Ha bitanee nuussi maanawu ba ashuwa waanidi immana gii?” yaagidi issoy issuwara walaqettidosona.
53 Yaagin Yesuusi etayyo hagaadan giis: “Taani intteyyo tumaa odays, intte asa Naꞌaa ashuwa meennaaninne A suuttaa uyennan deꞌuwa demmekketa.*
54 Ta ashuwa miyanne ta suuttaa uyiya ooninne merinaa deꞌuwa demmana, qassi wurssettaa gallassi taani A hayquwappe denttana;
55 ayssi giikko, ta ashoy tumu quma, qassi ta suuttay tumu ushsha.
56 Ta ashuwa miyanne ta suuttaa uyiya urinne taani issuwa gidana.
57 Merinawu deꞌiya Aaway tana kiittidoogaadaaninne taani A gaasuwan deꞌiyogaadan, ta ashuwa miya uraykka ta gaasuwan deꞌana.
58 Saluwappe yiida qumay hegaa. Hagee guyyeppe hayqqida intte mayzza aawati miido qumaa mala gidenna. Ha qumaa miya ooninne merinawu deꞌana.”
59 Yesuusi Qifirinaahooman issi shiiqo keettan* tamaarissiyo wode hageeta yootiis.
60 A kaalliyageetuppe daroti hegaa siyidi, “Hagee hayttawu caaliya haasaya; hagaa ooni siyana danddayii?” yaagidosona.
61 Shin Yesuusi bana kaalliyageeti hegan zuuzummiyogaa eridi etayyo hagaadan giis: “Inttena hagee yiilloyii?
62 Yaatin, intte asa Naꞌay kase deꞌiyosaa pude biyo wode beꞌiyakko waananee?
63 Deꞌuwa immiyay ayyaanaa; ashoy aybanne maaddenna. Taani intteyyo yootido ha yohotuyyo denddoy geeshsha ayyaanaa, qassi hageeti deꞌuwa immoosona.
64 Shin ammanenna issoti issoti intte giddon deꞌoosona.” Qassi Yesuusi ammanibeenna asatanne bana aattidi immana ura kasetidi* eriis.
65 Qassi I, “Aaway maataa immennan ooninne taakko yaana danddayenna taani intteyyo giidoy hegaassa” yaagiis.
66 Hegaappe denddidaagan, A kaalliyageetuppe daroti kase aggidobawu simmidosona, qassi A kaalliyogaa aggidosona.
67 Yaatin, Yesuusi kiitettida tammanne naaꞌꞌata, “Inttekka baanawu koyeetii?” yaagiis.
68 Simoon Pheexiroosi ayyo hagaadan giis: “Godawu, nuuni ookko baanee? Neeni merinaa deꞌuwa demissiyabaa yootaasa.
69 Neeni Xoossay kiittido Geeshshaa gidiyogaa nuuni eroos, qassi ammanida.”
70 Yesuusi etayyo, “Inttena tammanne naaꞌꞌata dooriday tana gidikkinaa? Shin intteppe issoy worddanchcha”* yaagiis.
71 Asqqorootu Simoona naꞌay, Yihuday, kiitettida tammanne naaꞌꞌatuppe issuwa gidikkonne, Yesuusa aattidi immanay A gidiyo gishshawu, Yesuusi abaa hegaadan giis.
Footnotes
^ Mise, “saꞌaa.”
^ Mise, “25 woy 30 istadiya gidiyagaa.”
^ Mise, “saꞌawu.”
^ Mise, “saꞌay.”
^ Woykko “bollaa.”
^ Mise, “intte giddon deꞌoy deꞌenna.”
^ Woykko “asay shiiqidosan.”
^ Mise, “doomettaappe.”
^ Woykko “dabloosa.” Hegaa birshshettay wordduwan issi ura sunttaa bashshiyagaa.
