Yohaannisi Xaafidoogaa 7:1-52
7 Yesuusi hegaappe simmin Galiilan takkiis,* ayssi giikko, Ayhudati A woranawu koyiyo gishshawu Yihudaa baanawu koyibeenna.
2 Shin Ayhudatu Daasiya* Baalay matattiis.
3 Hegaa gishshawu, A ishati ayyo hagaadan giidosona: “Nena kaalliyageetikka neeni oottiyo oosota beꞌana mala, hagaappe aggada Yihudaa ba.
4 Ayssi giikko, ay asinne bana deree eranaadan koyiiddi aybanne geeman oottenna. Hageeta asaa ubbaa sinttan ootta.”
5 A ishati A ammanibookkona.
6 Yaatin Yesuusi etayyo hagaadan giis: “Ta wodee gakkiichchibeenna, shin intteyyo ay wodeekka injjetees.
7 Asay* inttena ixxiyo gaasoy baawa, shin eti iitabaa oottiyogaa taani markkattiyo gishshawu, tana ixxoosona.
8 Intte baalawu biite; ta wodee gakkiichchibeenna gishshawu, taani ha baalawu haꞌꞌi biikke.”
9 Qassi I hageeta etawu yooti simmidi Galiilan takkiis.
10 Shin A ishati baalawu bi simmin, ikka asi erennan biis.
11 Yaanin Ayhudati, “He bitanee awan deꞌii?” yaagidi, he baalaa sohuwan A koyiyogaa doommidosona.
12 Qassi asay issoy issuwawu darobaa saasukkees. Issoti issoti, “I loꞌꞌo asa” yaagoosona. Harati qassi, “I loꞌꞌo asa gidenna. I asaa balettees” yaagoosona.
13 Ayhudatuyyo yayyiyo gishshawu, ooninne abaa asaa sinttan haasayenna.
14 Baalay doomettoosappe oyddaa gidiya gallassay aadhdhin, Yesuusi Xoossaa garuwa biidi tamaarissiyogaa doommiis.
15 Qassi Ayhudati, “Ha bitanee timirtte keettatun* tamaarennan Geeshsha Maxaafata* hagaadan waatidi eridee?” yaagidi malaalettidosona.
16 Yesuusi etayyo hagaadan giidi zaariis: “Taani tamaarissiyobati tana kiittidaagaabaappe attin, tabaa gidokkona.
17 Ooninne Xoossay koyiyobaa oottana koyikko, taani Xoossaa qofaa tamaarissiyakko woy ta qofaa tamaarissiyakko erana.
18 Ba qofaa tamaarissiya ooninne bawu bonchchettanawu koyees; shin bana kiittidaagee bonchchettanaadan koyiya ooninne tumanchcha, qassi A giddon worddoy baawa.
19 Muusee intteyyo Higgiya immiis. Shin intteppe issoynne he Higgiyawu azazettekketa. Intte ayssi tana woranawu koyeetii?”
20 Asay, “Nena daydanttay oyqqiis. Nena woranawu koyiyay oonee?” yaagiis.
21 Yesuusi etayyo hagaadan giidi zaariis: “Taani issibaa oottaas, yaatin intte ubbay malaalettideta.
22 Hegaa gishshawu, hagaa qoppite: Muusee intteyyo qaxxaraa higgiya immiis (qaxxaray A mayzza aawatu wode doommidabappe attin, Muuse wode doommidaba gidenna), qassi intte issi ura sambbatan qaxxareeta.
23 Intte Muuse Higgiya kanttennaadan giidi issi ura sambbatan qaxxarikko, taani sambbatan issi asa pattido gishshawu, ta bolli ayssi hanqquwa eexxi kiyeetii?
24 Xillo pirddaa pirdditeppe attin, intte beꞌiyoban pirddiyogaa aggite.”
25 Hegaappe guyyiyan, Yerusalaamen deꞌiya issoti issoti hagaadan giyogaa doommidosona: “Eti woranawu koyiyo bitanee hagaa gidennee?
26 Shin beꞌite! I asaa sinttan haasayiyaba gidikkonne, eti A aynne gookkona. Asaa kaalettiyageeti I Kiristtoosa gidiyogaa eridonaashsha?
27 Gidoppe attin, ha bitanee awuppe yiidaakko nuuni eroos; shin Kiristtoosi yiyo wode, I awuppe yiidaakko ooninne erenna.”
28 He wode, Yesuusi Xoossaa garuwan tamaarissiiddi ba qaalaa xoqqu oottidi hagaadan giis: “Intte tana ereeta, qassi taani awuppe yiidaakkokka ereeta. Taani ta shenen yabeykke, shin tana kiittidaagee tumuppe deꞌiyagaa, qassi intte A erekketa.
29 Taani I giidobaa yootiyagaa gidiyo gishshawu A erays, qassi tana I kiittiis.”
30 Yaagin, eti A oyqqanawu malidosona, shin A wodee gakkiichchibeenna gishshawu, ooninne A oyqqana* danddayibeenna.
31 Shin asaa giddoppe daroti A ammanidosona, qassi eti, “Kiristtoosi yiyo wode daro malaatata oottana; ha bitaneekka oottidobay hegaa gidennee?” yaagidosona.
32 Asay abaa hegaadan giidi zuuzummiyogaa Parisaaweti siyidosona, qassi waanna kahinetinne Parisaaweti A oyqqana mala zabeta kiittidosona.
33 Yaatin, Yesuusi hagaadan giis: “Taani tana kiittidaakko baana gakkanaashin inttenaara guutta wodiya takkana.
34 Intte tana koyana, shin demmekketa, qassi taani baanasaa intte baana danddayekketa.”
35 Hegaa gishshawu, Ayhudati issoy issuwawu hagaadan giidosona: “Ha bitanee nuuni A demmenna mala, awa baanawu koyii? I Giriike asaa giddon laalettidi deꞌiya Ayhudatukko biidi Giriike asaa tamaarissanawu koyii?
36 I woyganawu, ‘Intte tana koyana, shin demmekketa, qassi taani baanasaa intte baana danddayekketa’ yaagii?”
37 He baalan hara gallassatuppe aadhdhiya wurssetta gallassi, Yesuusi denddi eqqidi ba qaalaa xoqqu oottidi hagaadan giis: “Ooninne saamettikko, taakko yiidi uyo.
38 Geeshsha Maxaafati tana ammaniya uraabaa, ‘A giddon deꞌuwa immiya haattay goggana’ yaagoosona.”
39 Shin Yesuusi bana ammaniyageeti ekkana ayyaanaabaa hegaadan yootiis; ayssi giikko, Xoossay Yesuusayyo xoqqa maataa immiichchibeenna gishshawu, ayyaanay biron imettibeenna.
40 Hegaa siyida asaappe issoti issoti, “Hagee tumukka yaana geetettida, Xoossay erissidobaa yootiyagaa” yaagidosona.
41 Harati, “Hagee Kiristtoosa” yaagidosona. Shin issoti issoti hagaadan giidosona: “Woni Kiristtoosi Galiilaappe yiiyye?
42 Geeshsha Maxaafay Kiristtoosi Daawita zerettaappe, qassi Daawita katamaa Beeteliheemeppe yaanaagaa yootennee?”
43 Hegaa gishshawu, aban asay issoy haraa qofaa phalqqiis.
44 Shin etappe issoti issoti A oyqqanawu koyikkonne, ooninne A oyqqana* danddayibenna.
45 Zabeti simmidi yin, waanna kahinetinne Parisaaweti eta, “A ayssi ehibeekketii?” yaagidosona.
46 Zabeti, “Ooninne hegaadan haasayi erenna” yaagidosona.
47 Parisaaweti hagaadan giidosona: “I inttenakka balettidee?
48 Asaa kaalettiyageetuppe woykko Parisaawetuppe ooni A ammanidee?
49 Shin Higgiya erenna ha asay qanggettidaagaa.”
50 Etappe issoy, kase Yesuusakko yiida Niqoodimoosi etayyo hagaadan giis:
51 “Nu Higgee yootiyogaadan, nuuni issi asa bolli pirddana koyikko, I ay oottidaakko eranawu koyro appe siyana bessees; yaatana bessennee?”
52 Eti ayyo hagaadan giidosona: “Neenikka Galiilaa aseeyye? Geeshsha Maxaafata pilggada Xoossay erissidobaa yootiya asi Galiilaappe denddennaagaa era.”*
Footnotes
^ Woykko “hemettiis.”
^ Woykko “Dunkkaaniya.”
^ Mise, “Saꞌay.”
^ Hegeekka, Rabbetu timirtte keettatun.
^ Mise, “xaafettidabata.”
^ Mise, “A bolli kushiya wottana.”
^ Mise, “A bolli ba kushiya wottana.”
^ Kushiyan beni xaafettida ammanettiya xuufeti daroti paydo 53ppe shemppo 8, paydo 11 gakkanawu deꞌiyagaa aggiigidosona.
