Yohaannisi Xaafidoogaa 8:12-59
8 12 Hegaappe guyyiyan, Yesuusi haranttuwa etayyo hagaadan giis: “Taani asaayyo* pooꞌo. Tana kaalliya ooyyonne deꞌuwa pooꞌoy deꞌanappe attin, I mule xuman hemettenna.”
13 Yaagin Parisaaweti ayyo, “Neeni nebaa markkattaasa; neeni markkattiyobay tuma gidenna” yaagidosona.
14 Yesuusi etayyo hagaadan giidi zaariis: “Taani tabaa markkattikkokka, taani awuppe yiidaakko, qassi awa biyakko eriyo gishshawu, taani markkattiyobay tuma. Shin intte taani awuppe yiidaakko, qassi awa biyakkokka erekketa.
15 Intte asaa qofaadan* asa bolli pirddeeta; taani ay asa bollinne pirddikke.
16 Shin taani issi asa bolli pirddikkokka, tana kiittida Aawaynne taani pirddoosippe attin, taani tarkka pirddenna gishshawu ta pirdday tuma.
17 Qassi, ‘Naaꞌꞌu asati markkattiyobay tuma’ geetettidi intte Higgiyan xaafettiis.
18 Tabaa markkattiya issoy tana, qassi tana kiittida Aawaykka tabaa markkattees.”
19 Yaagin eti A, “Ne Aaway awan deꞌii?” yaagidosona. Yesuusi, “Intte tanakka ta Aawaakka erekketa. Intte tana eriyakko, ta Aawaakka erana” yaagiis.
20 I Xoossaa garuwan miishshaa yeggiyobay deꞌiyosan tamaarissiiddi hegaa yootiis. Shin A wodee gakkiichchibeenna gishshawu, A ooninne oyqqana danddayibeenna.
21 Yaanin I etayyo haranttuwakka hagaadan giis: “Taani bays, qassi intte tana koyana, shin intte nagaranchcha gidi uttidi hayqqana. Taani biyosaa intte baana danddayekketa.”
22 Yaagin Ayhudati, “I ayssi, ‘Taani biyosaa intte baana danddayekketa’ gii? I bana barkka woranawu koyideeyye?” yaagiyogaa doommidosona.
23 I etayyo hagaadan giis: “Intte saꞌaa asa; taani saluwappe yaas. Intte deretettan* deꞌiya asa; taani gidikke.
24 Taani intte nagaranchcha gidi uttidi hayqqana giidoy hegaassa. Ayssi giikko, ta intteyyo yootido ura taani gidiyogaa ammanana xayikko, intte nagaranchcha gidi uttidi hayqqana.”
25 Yaagin eti, “Neeni oonee?” giyogaa doommidosona. Yesuusi etayyo hagaadan giis: “Taani intteyyo yootaydda ta wodiya ayssi coo wurssiyanaa?
26 Taani inttebaa yootiyo darobay deꞌees, qassi taani pirddana darobati deꞌoosona. Tana Kiittidaagee tumaa yootiyogee erettidaba, qassi taani appe siyidobata asaayyo* yootays.”
27 I etayyo Aawaabaa yootiyogaa eti akeekibookkona.
28 Hegaappe simmin Yesuusi hagaadan giis: “Intte asa Naꞌaa kaqqi simmidi, taani intteyyo yootido uri tana gidiyogaanne ta shenen aynne oottennaagaa intte erana; shin taani yootiyobati ta Aaway tana tamaarissidobata.
29 Qassi tana Kiittidaagee tanaara deꞌees; taani A ufayssiyabaa ubbatoo oottiyo gishshawu, I tana tarkka aggiigibeenna.”
30 I hegeeta yootiyo wode, daroti A ammanidosona.
31 Hegaappe simmin, Yesuusi bana ammanida Ayhudatuyyo hagaadan giis: “Intte ta yootidoogaadan ubbatoo oottikko, tumukka tana kaalliyageeta,
32 qassi intte tumaa erana, yaatin tumay inttena laꞌa kessana.”
33 Eti ayyo hagaadan giidosona: “Nuuni Abrahaama naata, qassi ooyyonne aylle gidi erokko. Neeni waanada, ‘Intte laꞌa kiyana’ yaagay?”
34 Yesuusi etayyo hagaadan giis: “Taani intteyyo tumaa odays, nagaraa oottiya ubbay nagaraa aylle.
35 Qassi ayllee ba godaa son merinawu deꞌenna; naꞌay merinawu deꞌees.
36 Hegaa gishshawu, Naꞌay inttena laꞌa kessikko, intte tumuppe laꞌa kiyana.
37 Intte Abrahaama naata gidiyogaa taani erays. Shin taani tamaarissiyobaa intte ekkenna gishshawu, tana woranawu koyeeta.
38 Taani ta Aawaara deꞌiyo wode beꞌidobata yootays, shin intte intte aawaappe siyidobata ootteeta.”
39 Eti ayyo, “Nu aaway Abrahaama” yaagidosona. Yesuusi etayyo hagaadan giis: “Intte Abrahaama naata gidiyakko, Abrahaama leemisuwa kaallana.
40 Shin Xoossaappe siyido tumaa intteyyo yootida tana haꞌꞌi intte woranawu koyeeta. Abrahaami hegaadan oottibeenna.
41 Intte intte aawaa oosota ootteeta.” Eti ayyo, “Nuuni kareppe* yelettida naata gidokko; nuuyyo issi Aaway deꞌees; I Xoossaa” yaagidosona.
42 Yesuusi etayyo hagaadan giis: “Taani Xoossay kiittin yiido gishshawu, Xoossay intte Aawaa gidiyakko, intte tana siiqana. Taani ta shenen yabeykke, shin tana I kiittiis.
43 Intte taani tamaarissiyobaa ekkanawu koyekketa. Taani yootiyobaa intte akeekennay hegaassa.
44 Intte aaway Dabloosa, qassi intte intte aawaa sheniyadan oottanawu koyeeta. I Xoossaa sunttaa bashshido wodeppe doommidi* shemppo woriyagaa, qassi tumay A wozanan deꞌenna gishshawu, I tumaappe wora simmiis. I wordduwa haasayiyoy hegaa mala ura gidiyo gishshataassa, ayssi giikko, I worddanchcha, qassi wordduwawu aawaa.
45 Shin taani intteyyo tumaa yootiyo gishshawu, intte tana ammanekketa.
46 Taani nagaraa oottidoogaa bessiya naqaashay intte giddon ooyyo deꞌii? Taani tumaa yootiyo wode, tana ayssi ammanekketii?
47 Xoossaa naati Xoossay yootiyobaa siyoosona. Shin intte Xoossaa naata gidenna gishshawu, siyanawu koyekketa.”
48 Ayhudati ayyo hagaadan giidosona: “Nuuni, ‘Neeni Samaariya asa, nena daydanttay oyqqiis’ yaagidoogee likke gidennee?”
49 Yesuusi hagaadan giis: “Tana daydanttay oyqqibeenna, shin taani ta Aawaa bonchchays, qassi intte tana toochcheeta.
50 Shin taani bonchchettanawu koyikke; taani bonchchettanaadan koyiyagee Xoossaa, qassi Daannay A.
51 Taani intteyyo tumaa odays, ooninne taani yootiyogaadan oottikko, hayquwa mule beꞌenna.”
52 Ayhudati ayyo hagaadan giidosona: “Nena daydanttay oyqqidoogaa haꞌꞌi nuuni eroos. Abrahaami hayqqiis, Xoossay erissidobaa yootiyageetikka hayqqidosona, shin neeni, ‘Ooninne taani yootiyogaadan oottikko, mule hayqqenna’ yaagaasa.
53 Neeni nu mayzza aawaa Abrahaamappe aadhdhay? I hayqqiis, qassi Xoossay erissidobaa yootiyageetikka hayqqidosona. Nena oona gaada qoppay?”
54 Yesuusi hagaadan giidi zaariis: “Taani tana bonchchidaba gidiyakko, ta bonchchoy hada. Tana bonchchiyagee intte intte Xoossaa giyo ta Aawaa.
55 Gidikkonne, intte A erekketa, shin taani A erays. Qassi taani A erikke giyakko, inttenadan worddanchcha gidana. Shin taani A erays, qassi I yootidoogaadan oottays.
56 Intte aaway Abrahaami ta gallassaa beꞌana gi naagidi keehi ufayttiis, qassi beꞌiis, beꞌidi ufayttiis.”
57 Yaagin Ayhudati ayyo, “Neeyyo biron 50 layttanne gidibeenna, yaatin waanada Abrahaama beꞌana danddayay?” yaagidosona.
58 Yesuusi etayyo, “Taani intteyyo tumaa odays, taani Abrahaami yelettanaappe kasekka deꞌays” yaagiis.
59 Yaagin, eti A caddanawu shuchchaa denttidosona, shin Yesuusi qosettidi Xoossaa garuwappe kiyidi biis.
Footnotes
^ Mise, “saꞌawu.”
^ Mise, “ashuwadan.”
^ Mise, “saꞌan.”
^ Mise, “saꞌan.”
^ Woykko “pokkiya tuna nagaran.” Giriikettuwan, porniya.
^ Woykko “doomettaappe.”
