Yohaannisi Xaafidoogaa 9:1-41
9 Yesuusi hemettiiddi, issi bitaniya beꞌiis, he bitanee yelettoosappe doommidi qooqe.
2 Yesuusa kaalliyageeti A, “Rebbi, ha bitanee qooqidi yelettanaadan oottiday A nagarayiyye woy A aawaa woy A aayee nagaray?” yaagidi oychchidosona.
3 Yesuusi hagaadan giidi zaariis: “A nagaray woy A aawaa woy A aayee nagaraykka I qooqanaadan oottibeenna, shin Xoossay oottana danddayiyobaa asay beꞌanaadan hagee haniis.
4 Tana Kiittidaagaa oosota nuuni gallassi oottana bessees; ay asinne oottana danddayenna qammay matattiis.
5 Taani asaa giddon* deꞌiyo wode, asaayyo* pooꞌo.”
6 I hageeta yooti simmidi, saꞌan cuchchidi urqqaa munaqqidi, bitaniya ayfiyan urqqaa tiyiis;
7 yaatidi A, “Baada Saliihooma dalbbanttan meecetta” yaagiis (Saliihooma giyogee Kiitettidaagaa giyogaa). Yaagin I biidi meecettidi, xeelliiddi simmidi yiis.
8 Hegaappe guyyiyan, shoorotinne I kase woosanchcha gidiyogaa beꞌidaageeti, “Ha bitanee uttidi woossiyagaa gidennee?” yaagiyogaa doommidosona.
9 Issoti issoti, “Hagee A” yaagidosona. Harati, “Hagee A milateesippe attin, A gidenna” yaagidosona. Bitanee zaari zaaridi, “Taani A” yaagiis.
10 Yaagin eti A, “Yaanin ne ayfee waani xeellii?” yaagidi oychchidosona.
11 I hagaadan giis: “Yesuusa giyo bitanee urqqaa munaqqidi ta ayfiyan tiyidi tana, ‘Baada Saliihooman meecetta’ yaagiis. Yaagin, taani baada meecettaas, meecettin ta ayfee xeelliis.”
12 Yaagin eti A, “He bitanee awan deꞌii?” yaagidosona. I, “Taani erikke” yaagiis.
13 Eti he kase qooqe bitaniya Parisaawetukko efiidosona.
14 Shin Yesuusi urqqaa munaqqidonne A ayfiya pattido* gallassay Sambbata.
15 Yaanin Parisaawetikka bitanee waani xeellidaakko he wode A oychchiyogaa doommidosona. I etayyo, “I ta ayfiyan urqqaa wottin, taani meecettaas, yaatada xeellays” yaagiis.
16 Yaagin, Parisaawetuppe issoti issoti, “Ha bitanee Sambbataa higgiya bonchchenna gishshawu, I Xoossay kiittido asa gidenna” yaagiyogaa doommidosona. Harati, “Nagaraa oottiya asi hagaa mala malaatata waatidi oottana danddayii?” yaagidosona. Hegaa gishshawu, eti issoy issuwa qofaa phalqqidosona.
17 Eti he kase qooqe bitaniya, “I pattidoy* ne ayfiya gidiyo gishshawu, neeni A oona gaada qoppay?” yaagidi haranttuwa oychchidosona. Bitanee, “I Xoossay erissidobaa yootiya asa” yaagiis.
18 Shin Ayhudati he bitaniya aawaanne aayyiyo xeegana gakkanaashin, I kase qooqe gidiyogaanne A ayfee paxidoogaa* ammanibookkona.
19 Qassi eti A aawaanne A aayyiyo hagaadan giidi oychchidosona: “Hagee intte yelettoosappe doommidi qooqe giyo intte naꞌay? Yaatin haꞌꞌi I waanidi xeellii?”
20 A aawaynne A aayyiya hagaadan giidi zaaridosona: “Hagee nu naꞌaa gidiyogaanne I yelettoosappe doommidi qooqe gidiyogaa nuuni eroos.
21 Shin I haꞌꞌi waanidi xeelliyakko, woy A ayfiya pattiday* oonakko nuuni erokko. A oychchite. I asa gamma gakkiis. I babaa yootana.”
22 A aawaynne A aayyiya Ayhuda haymaanootiya kaalettiyageetussi yayyiyo gishshawu hegaadan giidosona, ayssi giikko, ooninne I Kiristtoosa gidiyogaa yootikko, he asati izaawa bohana* bessiyogaa maacidosona.
23 A aawaynne A aayyiya, “I asa gamma gakkiis. A oychchite” yaagidoy hegaassa.
24 Yaatin eti he kase qooqe bitaniya haranttuwa xeegidi A, “Xoossaa sinttan tumaa yoota;* ha bitanee nagaranchcha gidiyogaa nuuni eroos” yaagidosona.
25 I hagaadan giidi zaariis: “I nagaranchcha gidin aggin, taani erikke. Taani issibaa erays; taani kase qooqe, shin haꞌꞌi xeellays.”
26 Yaagin eti A, “I nena waatidee? I ne ayfiya waati pattidee?”* yaagidosona.
27 I etayyo hagaadan giis: “Taani intteyyo kase odaas, shin intte siyibeekketa. Intte hegaa haranttuwa siyanawu koyiyoy aybissee? Inttekka A kaallanawu koyeetiiyye?”
28 Yaagin, eti A hagaadan giidi boridosona: “Neeni ha bitaniya kaallaasa, shin nuuni Muusa kaalloos.
29 Xoossay Muusa haasayissidoogaa eroos, shin ha bitaniya ooni kiittidaakko nuuni erokko.”
30 I etayyo hagaadan giis: “Ha bitanee ta ayfiya pattida* asa gidishin, A ooni kiittidaakko intte erennaagee malaaliyaba.
31 Xoossay baassi yayyiyanne I koyiyobaa oottiya ura woosaa siyeesippe attin, nagaraa oottiya asatu woosaa siyennaagaa nuuni eroos.
32 Ay asinne qooqidi yelettida ura ayfe pattidoogee* hagaappe kase siyetti erenna.
33 Ha bitaniya Xoossay kiittennaakko, I hageetuppe issuwanne oottana danddayenna.”
34 Eti A, “Neeni yelettayddakka muleera nagaranchcha, shin nuna tamaarissay?” yaagidosona. Qassi eti A kessidi olidosona!
35 Yesuusi eti A kessidi olidoogaa siyiis, qassi aara gayttidi A, “Neeni asa Naꞌaa ammanay?” yaagiis.
36 Bitanee, “Godawu, taani A ammanana mala, I oonee?” yaagidi ayyo zaariis.
37 Yesuusi ayyo, “Neeni A beꞌadasa, qassi haꞌꞌi nenaara haasayiyagee A” yaagiis.
38 I, “Godawu, taani A ammanays” yaagiis. Qassi bitanee ayyo ziggiis.
39 He wode, Yesuusi hagaadan giis: “Qooqeti xeellanaadaaninne xeelliyageeti qooqanaadan, asawu bessiyabay maacettana mala taani asaakko* yaas.”
40 A matan deꞌiya Parisaawetuppe amaridaageeti hegaa siyidi A, “Nuunikka qooqeeyye?” yaagidosona.
41 Yesuusi etayyo hagaadan giis: “Intte qooqe gidiyakko, mooranchcha gidekketa. Shin intte haꞌꞌi, ‘Nuuni xeelloos’ giyo gishshawu mooranchcha.”
Footnotes
^ Mise, “saꞌan.”
^ Mise, “saꞌawu.”
^ Mise, “dooyido.”
^ Mise, “dooyidoy.”
^ Mise, “dooyettidoogaa.”
^ Mise, “dooyiday.”
^ Woykko “shiiqo keettaappe yedettana.”
^ Mise, “Xoossaa bonchcha.”
^ Mise, “dooyidee.”
^ Mise, “dooyida.”
^ Mise, “dooyin.”
^ Mise, “saꞌaa.”
