Yihooway aqo laggeti caaqqido caaquwaa keehi xoqqu oottidi xeellees. I azinaynne machchiya issoy issuwaappe duuxxennan deꞌana bessiyoogaa yootiis. (Maa 19:5, 6) Xoossaa asaappe darotu aqo deꞌoy keehi loꞌꞌo. SHin wotoy baynna aqo deꞌoy baawa. Issi issitoo metoy merettees. Aqo deꞌuwan metoy merettiyo wode, daro asay qoppiyoogaadan, aqo laggeti paraman woy coo shaahettana bessees giidi nuuni qoppana bessenna. Aqo oyqqida Kiristtaaneti bantta aqo deꞌuwaa waati naagana danddayiyoonaa?

Keehi koshshiya ichchashubata qoppite.

1. Lambbeechchiyoogaanne pokkoban allaxxiyoogaa malabaa ixxiyoogan, intte wozanaa naagite. Hegee intte aqo deꞌuwaa qohiyaaba.—Maa 5:28; 2PHe 2:14.

2. Xoossaara intte dabbotaa minttite; qassi intte aqo deꞌuwan kaseegaappe aaruwan A ufayssanawu koyite.—Maz 97:10.

3. Ooratta asatettaa ubbatoo maayite, qassi intte aqo laggiyawu kehatettaa bessiya guuttabaa oottite; hegee intte aqo laggee ba deꞌuwan ufayttanaadan oottees.—Qol 3:8-10, 12-14.

4. Ubba wode bonchchuwaaninne ufayssiya hanotan haasayite.—Qol 4:6.

5. Aqo deꞌuwan bessiyaabaa siiquwaaninne qaretan oottite.—1Qor 7:3, 4; 10:24.

Kiristtaaneti aqo deꞌuwaa bonchchiyo wode, aqo deꞌuwaa doomissida Yihoowa bonchchoosona.

NUUNI ‘GENCCIDI WOXXANA’ KOSHSHEES—ANNAACIYAA HIGGIYAA NAAGITE GIYA BIIDUWAA BEꞌITE; YAATIDI KAALLIDI DEꞌIYA OYSHATA ZAARITE:

• Aqo deꞌoy doomettan loꞌꞌo gidikkonne, ayba metoti merettana danddayiyoonaa?

• Bantta aqo deꞌuwan siiqoy baynnabadan qoppiyaageeta Geeshsha Maxaafay yootiyo maarati waati maaddana danddayiyoonaa?

• Yihooway aqo deꞌuwaassi kessido higgeti aybee?

• Aqo deꞌoy ufayssiyaagaa gidanaadan azinaynne machchiya ay oottana koshshii?