Nena galla galla baaxeyiyaabay aybee? Neeni ne keettaa asawu huuphee? Ne soo asawu oottana koshshiya darobaa polanawu baaxetaydda deꞌay? Neeni ne soo asaa maaddanawu baaxetiya, naata nerkka dichchiya aayoo woy aawee? Neeni tamaare keettan nenaara tamaariyaageeti addettiyo yelagee? Neeni sahoy woy cimatettay qohido asee? Metoy ubba asaakka gakkees. Daro Kiristtaaneta issi kutti daro metoy gakkees. Gidikkokka, Yihooway mata wode ha metota nu bollaappe qaaranaagaa eroos.—2Qor 4:16-18.

Hegee gakkanaashin, Yihooway nuuni baaxetiyoogaa akeekiyoogaa, nu ammanettiyoogaanne gencciyoogaa I xoqqu ootti xeelliyoogaanne I nuna keehi anjjanaagaa eriyo gishshawu minettoos. (Erm 29:11, 12) Yesuusikka nuna xoqqu oottidi xeellees. Nuuni Kiristtaanetuppe koyettiyaabaa oottiyo wode, ‘I nunaara deꞌanaagawu’ qaalaa geliis. (Maa 28:20) Nuuni sinttappe Xoossaa Kawotettan demmana laꞌatettaa takki giidi qoppiyo wode, nu hidootay minnees; qassi ha wodiyan nuna gakkiya metuwaa genccanawu kaseegaappe aaruwan murttoos.—Roo 8:19-21.

WOLQQAAMA CARKKOY MATATTIYO WODE YESUUSA XEELLITE!—KAWOTETTAY EHAANA ANJJUWAA GIYA BIIDUWAA BEꞌITE. YAATIDI KAALLIDI DEꞌIYA OYSHATA ZAARITE:

• Asay Xoossaappe waani duuxxidee, qassi hegee ay kaalettidee?

• Yihoowawu ammanettiyaageeta sinttappe aybi naagii?

• He ufayssiyaabaa waati demmanee?

• Neeni ooratta alamiyan demmanawu ufayssan naagiyo anjjoti aybee?