Nuuni loꞌꞌuwaa iita, qassi iitaa loꞌꞌo giidi qoppanaadan oottanawu maliya alamiyan deꞌoos. (Isi 5:20) Mattuman issi mala gididaageeti issoy issuwaara shori baynnabaa oottiyoogaa gujjin, issi issi asay Yihooway ixxiyoobaa oottiyoogee azzanttiyaaba. Nu siiqo yelagata tamaare keettan deꞌiya laggeti woy harati banttana kaallanaadan cimmanawu malana danddayoosona. Intte naati hegaanne hegaa mala paaciyaa xoonanaadan kasetidi waati maaddana danddayeetii?

Intte naati Yihooway kessido maarata eranaadan tamaarissite. (Wog 18:3) Mattumaa gaytettaa xeelliyaagan Geeshsha Maxaafay yootiyoobaa eta loddan loddan tamaarissite. Intte hegaa eta layttaadaaninne eti akeekana danddayiyoogaadan tamaarissana koshshees. (Zaa 6:7) Inttena hagaadan oychite: ‘Ta naati bessiyaagaadan siiqana koshshiyoogaa, giiga maayuwaa maayana koshshiyoogaanne bantta borsso bollaa harata bessana koshshennaagaa tamaarissidanaa? Ta naati issi uri eta pornograafiyaa bessanawu malikko, woy Yihooway mooro giyoobaa oottanaadan oychchiyaakko waatanaakko eriyoonaa?’ Kasetidi eriyoogee eta daro metuwaappe ashshana danddayees. (Lee 27:12; Era 7:12) Intte naata tamaarissiyoogan Yihooway inttessi immido alꞌꞌo imotaa siiqiyoogaa besseeta.—Maz 127:3.

MINNIDI DEꞌIYA KEETTAA KEEXXITE—INTTE NAATA ‘IITABAAPPE’ NAAGITE GIYA BIIDUWAA BEꞌITE; YAATIDI KAALLIDI DEꞌIYA OYSHATA ZAARITE:

• Mattumaa gaytettaa xeelliyaagan issooti issooti bantta naata tamaarissanawu mammottiyoy aybissee?

• Yelidaageeti bantta naata ‘Yihoowa seeraaninne zoriyan’ loohissana koshshiyoy aybissee?—Efi 6:4

• Mattumaa gaytettaa xeelliyaagan yelidaageeti bantta naata tamaarissanawu maaddiyaabaa Yihoowa dirijjitee ay giigissidee?—w19.05 12, saaxiniyaa

• Metoy gakkanaappe kasetidi intte naatuura ubbatoo haasayana koshshiyoy aybissee?