Masqqala aginan, Merinawu Ufayttada Deꞌa! giyo broshuriyaa goꞌettiyoogan ubba asaa Geeshsha Maxaafaa xannaꞌissanawu loytti baaxetana. Aassiyaageeti 30u saatiyaa haggaaziyoogan, kaafiya aqinye gidana danddayoosona. He dumma zamachan waati haggaazana danddayiyoo?

• Koyro Haasayissiyo Wode: He broshuriyawu zokko baggan deꞌiya qofaa goꞌettiyoogan, keettaway siyanawu koyanaadan maaddananne waati xannaꞌissiyaakko A bessana danddayoos. Qassi, zaaretta oychchidoogeeta gujjin siyanawu koyidaageeta hassaya. Ayssi giikko, eti kase Geeshsha Maxaafaa xannaꞌanawu koyennaba gidikkonne, nuuni he broshuriyaa goꞌettidi xannaꞌissiyo ooratta hiillaa beꞌidi xannaꞌanawu koyana danddayoosona. He broshuriya, asa demmibeenna keettan wottidi baana woy postta keettaa baggaara kiittana koshshenna. Gubaaꞌiyaa Haggaazo Konttee, he aginan haggaazuwawu shiiqiyo hara shiiqota giigissana danddayees.

• Hara Ogeta: Intte gubaaꞌee xuufiyaa wottiyo gaariya goꞌettidi dabaaban markkattiyaaba gidikko, Merinawu Ufayttada Deꞌa! giyo broshuriya gaariyan wottana danddayeeta. Siyanawu koyidi he broshuriyaa ekkidaageeti, miishsha qanxxennan Geeshsha Maxaafaa xannaꞌana danddayiyoogaa etawu yoota. He broshuriyaa waati xannaꞌiyaakko he sohuwan qanttan bessa, woy haroode bessanawu keera. Haggaazuwaa xomoosiya ishay, ayyaanaaban mino gidida aassiyaageeti zalꞌꞌe heeratun Geeshsha Maxaafaa xannaꞌissiyoogaa doommanaadan hanotaa giigissana danddayees. Qassi, neeni haggaazuwaa kiyennan markkattaydda demmidoogeeta woy nenaara oottiyaageeta Geeshsha Maxaafaa xannaꞌissana danddayaasa.

Nuuni ‘asa ubbaa tamaarissiyoogan A kaalliyaageeta oottana malaa’ Yesuusi azaziis. (Maa 28:19, 20) Merinawu Ufayttada Deꞌa! giyo broshuriyaa goꞌettiyoogan, nuuni Yesuusa azazuwaa azazettanaadan ha dumma zamachay maaddanaagaa ammanettoos.