HEGEE KEEHI KOSHSHIYOY AYBISSEE? Eti giigettiyaaba gidikko, nuuni tamaarissiyoobaa sohuwaara akeekananne hassayana danddayoosona. Eti loytti akeekikkonne hassayikko, ayyaanaaban elle diccana. Eti xammaqetti simmidikka, gubaaꞌe shiiquwawunne haggaazuwawu giigettiyoogee eti ‘naagi uttanawu’ woy beegottidi naganawu maaddees. (Maa 25:13) Hegaa gishshawu, waati xannaꞌanaakko eriyoogeenne ubbatoo xannaꞌiyo meezee deꞌiyoogeeta gidiyoogee deꞌo laytta ubban eta maaddana. Koyruwaappe doommidi, nu Geeshsha Maxaafaa xannaꞌissiyoogeeti xannaꞌanawu giigettanaadan loohissana koshshees.

WAATANA DANDDAYIYOO?

• Loꞌꞌo leemiso gidite. (Roo 2:21) Xannaꞌissanawu giigettiyo wode ubban xannaꞌissiyo uraabaa qoppiiddi giigettite. (km 11/15 3) Intte giigettiiddi xuufiyan wottido malaataa I beꞌanaadan oottite

• I giigettana mala minttettite. Xinaatiyaa aggennan xannaꞌiyoogee erettikko, xannaꞌiya uri giigettiyoogee Geeshsha Maxaafaa xannaꞌiyo oge gidiyoogaanne hegee goꞌꞌiyoogaa awu yootite. Giigettiyo wodiyaa I waati bazzana danddayiyaakko maaddiyaabaa zorite. Xannaꞌissiya issoti issoti bantta xuufiyan wottido malaataa xannaꞌissiyo wode tamaareti beꞌidi hegaa goꞌꞌaa akeekanaadan oottoosona. Xinaateti giigetti yiyo wode eta galatite

• Waati giigettanaakko A bessa. Xannaꞌissiya issoti issoti xinaatiyaa doomissiyo koyro heeran, bantta xinaateti waati giigettanaakko bessanawu, issi xinaate prograamiyaa goꞌettoosona