Beettiyaabaa goꞌettidi tamaarissiyoogee tamaariya uri I tamaaridobaa akeekanaadaaninne hassayanaadan maaddees. Gita Asttamaaree Yihooway beettiyaabaa goꞌettidi keehi koshshiyaabaa tamaarissiis. (Doo 15:5; Erm 18:1-6) Gita Asttamaaree Yesuusikka hegaadan oottiis. (Maa 18:2-6; 22:19-21) Mata wodeppe haa simmin beettiyaabaa goꞌettidi tamaarissiyo loꞌꞌo ogetuppe issoy biiduwaa gidiyoogee qoncciis. Intte Geeshsha Maxaafaa xannaꞌissiyoogeeta tamaarissanawu biidota loytti goꞌetteetii?

Xoossaappe Yiya Mishiraachuwaa! giyo brooshuriyan deꞌiya timirtteta tamaarissanawu nuna maaddana mala tammu biidoti giigidosona. Xaaxi waaxiyo wode, biidotu huuphe yoho ubbay brooshuriyan borxxu giidi xaafettida oyshatuppe issuwaara issi mala. Nuuni issi issi biidota awude bessanaakko hassayissiya linkkee Jw.org saytiyan giigida brooshuriyan deꞌees. Qassi, nuuni xannaꞌissiyo hara xuufetussi maaddiya biidoti Tamaarissanawu Goꞌettiyo Miishshatu giddon deꞌoosona.

Intte xinaatee akeekanawu metiya huuphe yohuwaa xannaꞌissiiddi deꞌeetii? Woy qassi intte xinaatiyaa paacciyaabay deꞌii? Jw.org® qassikka JW Broadcasting® giddon deꞌiya biidotuppe A maaddiya biiduwaa koyite. Inttenne intte xinaateti biidotuppe issuwaa issippe beꞌi simmidi tobbana danddayeeta.

Aginan aginan, ooratta biidoti kiyoosona. Intte eta beꞌiyo wode, harata tamaarissiyo wode waati goꞌettanaakko qoppite.