Yesuusi wurssettan bochchido Paasika baalay keehi xoqqu oottidi xeelliyooba. I hayqqiyo wodee matattido gishshawu, ba erissiyo ashkkaratuura Paasika maanawunne layattan layttan bonchchettana Godaa Kahuwaa Baalaa erissanawu halchchiis. Yaatiyo gishshawu, kahuwaa miyo kifiliyaa giigissanaadan PHeexiroosanne Yohaannisa kiittiis. (Luq 22:7-13; koyro sinttan deꞌiya misiliyaa xeella.) Nuunikka Laappune 27n bonchchiyo Godaa Kahuwawu giigettana koshshiyoogaa hagee hassayissees. Gubaaꞌeti haasaya haasayiyaageetanne hegaa malabata giigissoosona. SHin, nuuni buzo xekkan Godaa Kahuwawu giigettanawu ay oottana danddayiyoo?

Intte wozanaa giigissite. Godaa Kahuwaa wodiyawu giigida Geeshsha Maxaafaa nabbabitenne wotti dentti qoppite. Nabbabiyo prograamee Geeshsha Maxaafaa Galla Galla Pilggiyoogaa giya bukleetiyan deꞌees. Xoossaa Qaalaa Xannaꞌanawu Maaddiyaabaa giyo bukleetiyan shemppo 16n daro gujo qofay deꞌees. (Qassi Hosppune 2020 Kiristtaanetu Deꞌuwaanne Haggaazuwaa Xannaꞌiyo Xuufiyaa xeella.) So asay bantta soo asaa goynuwan wozuwaa goꞌꞌaabaa tobbanawu, Wach Tawur Pablikeeshins Indeks, qassi Yihoowa Markkati Geeshsha Maxaafaa Xannaꞌanau Maaddiya Xuufiyaa giyaagan pilggana danddayoosona.

Harati shiiquwaa yaanaadan shoobbite. SHoobbiyo zamachan minnidi oottite. Zaaretti oychchiyoogeeta, Geeshsha Maxaafaa kase xannaꞌidaageeta, intte eriyo asatanne intte dabbota shoobbanawu qoppana danddayeeta. Cimati ayyaanaaban shuggidaageeta shoobbana koshshees. Qassi intte shoobbiyo issi uri intte heeran deꞌennaba gidikko, jw.org saytiyan, koyro sinttan huuphessan NUBAA giyaagaa bochchidi, “Hassayuwaa” giyaagaa garssan, Godaa Kahoy A heeran bonchchettiyoosaanne saatiyaa demmana danddayiyoogaa dogoppite.

Nuuni giigettanawu oottana danddayiyo harabay aybee?