Metoy adussa wodiyawu takkiyaaba gidikko, nuna hidootaa qanxxissana danddayees. Kawuwaa Saaꞌooli gattiyo metoy guyyeppe xayanaagaa Daawiti erees; qassi Yihooway qaalaa gelidoogaadan kawotanaagaakka Daawiti ammanettiis. (1Sam 16:13) Daawiti danddayan Yihoowa naaganaadan ammanoy maaddiis.

Nuna metoy gakkiyo wode, nu hanotaa laammanawu cincca, akeekanchchanne yuushshi qoppiyaageeta gidana bessees. (1Sam 21:12-14; Lee 1:4) SHin, nuuni Geeshsha Maxaafay yootiyo maaraa oosuwan peeshshanawu nuussi danddayettida ubbabaa oottishinkka, issi issi metoti nuna gakkoosona. Hegaa malabati gakkiyo wode, nuuni danddayan Yihoowa naagana bessees. Mata wodiyan I nu meto ubbaa xayssananne nu “aifiyaappe afutta ubbaa quccana.” (Ajj 21:4) Yihooway oottidobaa gaasuwan woy harabaa gaasuwan nuuni metuwaappe woppaa demmidaba gidikkonne, meto ubbay matan xayanaagaa ammanettoos. Hagaa eriyoogee amarida hanotan nuna minttettana danddayees.

SHAAHETTIDA ALAMIYAN ISSIPPETETTAN DEꞌIYA ASAA, GIYA BIIDUWAA BEꞌITE; YAATIDI KAALLIDI DEꞌIYA OYSHATA ZAARITE:

• Amarkkan tohossa baggan deꞌiya amarida Kiristtaaneta gakkida metoy aybee?

• Eti danddayanchanne siiqiyaageeta gidiyoogaa waati bessidonaa?

• Eti ‘keehi koshshiyaabaa’ ubbatoo waati qoppidonaa?—Pili 1:10