Nu websaytiyawu koyro sinttan, suure wozanaa koshshay deꞌiyogeeta ufayssiya xuufetinne biidoti deꞌoosona. (Oos 13:48) Hegan darotoo, oduwan kiyiyabaara woy asaa qofissiyabaara gayttida huuphe yohoti kiyoosona.

Haggaazuwan jw.org saytiyawu koyro sinttaa waati goꞌettana danddayeetii?

• Websaytiya ubbatoo xomoosite. Hegan ooratti kiyidabaa akeekite; qassi tumaa siyanawu koyiyageeta maaddanawu hegaa waati goꞌettanaakko qoppite. (Koyro sinttan ooratti kiyida harabaa demmanawu koyikko, “Gujjada Eranawu” giyagaa bochchite.) Nu websaytiyan ooratti kiyidabaa intte ubbatoo xomoosiyogee haggaazuwawu goꞌettiyo ooratta qofaa demmanaadan inttena maaddees.

• Asaa haasayissiyogaa doommanawu koyro sinttan deꞌiya xuufetanne biidota goꞌettite. Hegeeti asaa qofissiyabaa nuuni eranaadan maaddana danddayoosona.

• Websaytiyawu koyro sinttaa asaa bessite. Amarida huuphe yohota qonccissite; yaatidi he uri nu websaytiya waati demmanaakko bessite.

• Linkkiya kiittite. Issoti issoti nunaara gayttidi haasayanawu koyennaba gidikkonne, nu websaytiya xomoosanawu keehi koyoosona. Yaatiyo gishshawu, tuma siyanawu koyiya urawu, koyro sinttaa linkkiya woykko hegan deꞌiya issi xuufiya woy biiduwa linkkiya kiittanawu mammottoppite.