Asawu immiyo maxeetee 2018⁠ppe doommidi issuwawu issuwawu issi huuphe yohoy deꞌees. He maxeeteti ubbay Tamaarissanawu Goꞌettiyo Waanna Miishshatun deꞌoosona. Yaatiyo gishshawu nuuni eta haggaazuwan goꞌettana danddayoos. Nuuni oge woy giyaa biyo wodekka amarida maxeeteta oyqqidi baana danddayoos. He maxeeteti asaa Geeshsha Maxaafaa xannaꞌissanawu giigidaba gidokkona; shin he maxeeteti issi uri ayyaanaabaa tamaaranaadan koyanaadan denttettana danddayoosona.

Haasayissiyoogaa doomma simmada, issi xiqisiyaa nabbabada he maxeetiyaa huuphe yohuwaa qonccissiyoogee he uri ufayttidi siyaanaadan oottana danddayees. Leemisuwawu, I yelidaagaa woy kayyuwaa woy unꞌꞌissiyaabaa gencciiddi deꞌiyaaba gidikko, hagaadan gaana danddayaasa: “Hegaa xeelliyaagan issi loꞌꞌo xuufiyaa mata wode nabbabaas. Taani nena bessoo?” He uri eranawu koyees gaada neeni qoppikko, koyro haasayissiyo wodekka, attamettida xuufiyaa immana woy elektiroonike meran giigidaagaa kiittana danddayaasa. Nuuni maxeetiyaa asawu immanawu baaxetiyaageeta xalla gidana xayikkonne, tamaaridobaa oosuwan peeshshanawu eeno giya asata demmanaadan he maxeeteti nuna maaddana danddayoosona.—Oos 13:48.