Xinaateti Yihoowa ufayssanawu, etawu mino ammanoy deꞌana koshshees. (Ibr 11:6) Merinawu Ufayttada Deꞌa! giyo maxaafaa goꞌettidi, eti hegaadan oottana malaa maaddana danddayoos. Xannaꞌissanawu giigida ha maxaafan, keehi maaddiya xiqiseti, akeekanawu waayissenna qonccissoti, oyshati, oosuwawu denttettiyaa biidotinne keehi loꞌꞌiya misileti deꞌoosona. Xinaateti Xoossaa ufayssiya eeshshati deꞌiyoogeeta gidanaadaaninne Xoossaara dabbotanaadan maaddiyoogan, eta ammanuwaa minttana danddayoos.—1Qor 3:12-15.

Xoossay beettenna gishshawu aara dabbotana danddayettenna giidi issooti issooti qoppoosona. Yaatiyo gishshawu, eti Yihoowa eranaadaaninne an ammanettanaadan, nuuni maaddana koshshees.

“MERINAWU UFAYTTADA DEꞌA! GIYO MAXAAFAA GOꞌETTIYOOGAN, XINAATETI YIHOOWA MINTTI AMMANANAADAN MAADDITE” GIYA BIIDUWAA BEꞌITE; YAATIDI KAALLIDI DEꞌIYA OYSHATA ZAARITE:

• Michchiya xannaꞌissanawu loytta giigettidoogaa waati eriyoo?

• Isiyaasa 41:10, 13 xeelliyaagan xinaatiyaa ba qofaa qonccissanaadan maaddiya amarida oyshata michchiyaa waata goꞌettadee?

• Geeshsha Maxaafaa xiqisetinne biidoti xinaatiyo waati maaddidee?

Daroti wozuwaa goꞌꞌaa akeekokkona woy Xoossay etawu immido imotadan xeellokkona. (Gal 2:20) Yaatiyo gishshawu, eti Yesuusa wozuwaa yarshshuwan mintti ammanaadan, nuuni maaddana koshshees.

“MERINAWU UFAYTTADA DEꞌA! GIYO MAXAAFAA GOꞌETTIYOOGAN, XINAATETI YESUUSA MINTTI AMMANANAADAN MAADDITE” GIYA BIIDUWAA BEꞌITE; YAATIDI KAALLIDI DEꞌIYA OYSHATA ZAARITE:

• Ishay xannaꞌissanawu loytti giigettidoogaa waati erana danddayiyoo?

• “Pilgga” giya sohuwan deꞌiya qofaa xinaatiyaa maaddanawu xannaꞌissiyaagee waati goꞌettidee?

• Xinaateti woossiyoogee keehi koshshiyoy aybissee?