Meretay Yihoowa bonchuwaa awaajjees. (Maz 19:​1-4; 139:14) SHin Dabloosa alamee deꞌuwaa doomettaa xeelliyaagan Xoossaa bonchissennabaa yootees. (Roo 1:​18-25) Hegaa mala qofay intte naatu guuggiyaaninne wozanan xaphuwaa yeddennaadan waati teqqana danddayeetii? Eti naatettan deꞌiyo wodiyaappe doommidi, Yihooway deꞌiyoogaanne etawu qoppiyoogaa ammananaadan maaddite. (2 Qor 10:​4, 5; Efi 6:16) Eti timirtte keettan tamaariyoobaa xeelliyaagan bantta qofaa yootanaadan oottidi, eta maaddanawu giigida daro miishshata loytti goꞌettite.​—⁠Lee 20:5; Yaaq 1:⁠19.

NE LAGGETI WOYGIYOONAA?​—⁠XOOSSAN AMMANIYOOGAA GIYO BIIDUWAA BEꞌIDI, KAALLIDI DEꞌIYA OYSHATA TOBBITE:

• Xoossaa ammaniyoogaa xeelliyaagan asay darotoo yootiyo haysee awugee?

• Intte timirtte keettan woygi tamaarissiyoonaa?

• Yihooway deꞌiyoogaa neeni ammanaadan oottiyaabay aybee?

• Xoossay ubbabaa medhidoogaa issi uri akeekanaadan waata maaddana danddayay?