•  Doommiyo Wode Haasayiyobaa 2

•  Xoossaa Qaalan Deꞌiya Alꞌꞌobaa 3-5

  •  Haasayaa 3

  •  Ayyaanaaban Alꞌꞌobaa 4

  •  Geeshsha Maxaafaa Nibaabiya 5

•  Minnada Haggaaza 6

  •  Haasayissiyogaa Doommiyogaa 7

  •  Zaaretti Oychchiyogaa 8

  •  Erissiyo Ashkkara oottiyogaa 9

  •  Ne Ammaniyobaa Qonccissiyogaa 10

  •  Haasayaa 11

  •  Gomppaa 12

  •  Wodiyanne Hanotaa 13

  •  Biidotanne Xuufeta Goꞌettiyogaa 14

•  Kiristtaanetu Deꞌuwa 15-16

  •  Galchchaa Geeshsha Maxaafaa Xinaatiya 16

•  Kuuyiyo Wode Haasayiyobaa 17

•  Galataanne Zoriya 18

•  Wodiya 19

•  Woradaa Xomoosiyagee Galchchaa Xomoosiyo Wode 20

•  Woradaa Woy Killiliya Shiiquwa Saaminttaa 21

•  Hassayuwa Baalaa Bonchchiyo Saaminttaa 22

•  Deꞌuwanne Haggaazuwa Shiiquwa Xomoosiyagaa 23

•  Deꞌuwanne Haggaazuwa Shiiquwa Liqambbariya 24

•  Zoriyogan Maaddiyagaa 25

•  Gujo Addaraashata 26

•  Biidota 27

1. Ha xuufiyan deꞌiya kaaletoy, Kiristtaanetu Deꞌuwanne Hagaazuwa Shiiquwan kifiliya shiishshiya ubbaa maaddana. Kifiliya shiishshiyageeti, bantta kifiliya giigettanaappe kase Kiristtaanetu Deꞌuwanne Hagaazuwa Shiiquwa Xuufiyaninne ha xuufiyan deꞌiya bantta kifiliyara gayttida kaaletota zaarettana koshshees. Aassiyageeti ubbay tamaaretu kifiliya shiishshanaadan shoobettana koshshees. Galchchaara hashetiya haratikka eta deꞌoy Geeshsha Maxaafaa timirttiyaranne Kiristtaaneti kaalliyo maaraara maayettiyaba gidikko kifiliya shiishshana danddayosona. Deꞌuwanne Haggaazuwa Shiiquwa Xomoosiyagee mazggafettana koyiya aassiyageeta gidibeennaageetuura eti kunttana bessiya gidaa xeelliyagan zorettana bessees; yaatidi he izaawu gidaa kunttiyogaanne aggiyogaa yootana koshshees. Hegaa tobbiyo wode, izaawa Geeshsha Maxaafaa xannaꞌissiyagee (woy Yihoowa Markka gidida A yelidaagee) deꞌana koshshees. He izaawuppe koyettiya giday haattan muukettibeenna aassiyagaa gidaara issi mala.—od shem. 8 ment. 8.

2. Issi daqiiqa. Saaminttan saaminttan, Deꞌuwanne Haggaazuwa Shiiquwa liqambbaree doometta mazamuriyanne woosaappe simmin, ezggiyageeti prograamiya yeemuwan naaganaadan oottiyabaa haasayees. Liqambbaree galchchaa keehi maaddiya qofata yootana koshshees.

 3. Haasayaa: Tammu daqiiqa. Huuphe yohoynne naaꞌꞌu woy heezzu waanna qofati Deꞌuwanne Haggaazuwa Shiiquwan Xannaꞌiyo Xuufiyan deꞌoosona. Ha haasayay cimawu woy galchchawu oottiya giday deꞌiyo ishawu imettees. Saaminttaa Geeshsha Maxaafaa nibaabiyan ooratta maxaafay doomettiyo wode, hegaa erissiya biidoy deꞌees. Haasayiyagee biidoy huuphe yohuwara waani gayttiyakko qonccissana danddayees. Shin, I Xannaꞌiyo Xuufiyan deꞌiya waanna qofata qonccissiyogaa dogana bessenna. Qassi, danddayettikko timirttiya kaafanawu giigida misiliya I loytti goꞌettana koshshees. Waanna qofata qonccissanawu hara gujo xuufetakka goꞌettana danddayees.

 4. Ayyaanaaban Alꞌꞌobaa: Tammu daqiiqa. Ha kifilee doometta woy kuushsha qofi baynnan oyshaaninne zaaruwan tobbiyoba. Ha kifilee cimawu woy galchchawu oottiya giday deꞌiyo ishawu imettees. Kifiliya shiishshiya ishay ezggiyageeta naaꞌꞌu oyshatakka oychchana bessees. Qassi, imettida xiqiseti nabbabettana koshshiyakkonne koshshennaakko I kuuyana danddayees. Zaariyageeti 30 sokonddiyan woy hegaappe garssan zaarana koshshees.

 5. Geeshsha Maxaafaa Nibaabiya: Oyddu daqiiqa. Ha kifiliya attumaageeti shiishshoosona. Tamaaree nabbabanaadan imettida kifiliya doometta qofaa woy kuushsha qofaa yootennan nabbabees. Shiiquwa liqambbaree tamaareti nabbabiyobaa suure, qofaa akeekidi, tololayidi, koshshiyosan minttidi, cenggurssaa laammi laammidi, koshshiyosan takki giidi qassi shonggaa naagidi nabbabanaadan maaddees. Issi issi Geeshsha Maxaafaa nibaabe kifileti adussa, harati qassi qantta gidiyo gishshawu, Deꞌuwanne Haggaazuwa Shiiquwa xomoosiyagee kifileta battiyo wode tamaaretu abbiya qoppana koshshees.

6. Tammanne ichchashu daqiiqa. Ha kifilee haggaazuwawu loohiyo injjiya medhdhanawunne tamaareti asaara haasayiyo hiillaa qassi sabbakiyonne tamaarissiyo gidaa poshanaadan maaddanawu giigiis. Koshshiyo wodiyan tamaaretu kifileti cimatussikka imettana danddayoosona. Issi issi tamaaree Deꞌuwanne Haggaazuwa Shiiquwa Xuufiyan awu imettida kifiliyappe sinttaara hookkuwa giddon uttida Tamaarissanawu woy Asaa Siiqite giya biroshuriyappe ekettida xinaate qofaa oosuwan peeshshana koshshees. Issi issitoo, tobbiyo kifilee imettana danddayees. Hegaa mala kifilee issi cimawu woy giday deꞌiyo galchchawu oottiyagawu imettees.—tobbiyan shiiqiya kifileta waati shiishshiyakko beꞌanawu  mentto 15 xeella.

 7. Haasayissiyogaa Doommiyogaa: Ha kifiliya attumaageeti woy maccaageeti shiishshana danddayoosona. Maaddiya uri mattuman issi mala woy he izaawu so asa gidana bessees. Shiishshiyageeti eqqidi woy uttidi shiishshana danddayoosona.—Ha kifiliya gomppaa, wodiyanne hanotaa xeelliyagan gujo qofaa demmanawu,  mentto 12nne  13 xeella.

 8. Zaaretti Oychchiyogaa: Ha kifiliya attumaageeti woy maccaageeti shiishshana danddayoosona. Maaddiya uri mattuman issi mala gidana bessees. (km 5/97-AM mentto 2) Shiishshiyageeti eqqidi woy uttidi shiishshana danddayoosona. Kifiliya shiishshiya uri kase haasayissido uraa zaaretti oychchiyo wode woygiyakko bessana koshshees.—Ha kifiliya gomppaa, wodiyanne hanotaa xeelliyagan gujo qofaa demmanawu,  mentto 12nne  13 xeella.

 9. Erissiyo Ashkkara Oottiyogaa: Ha kifiliya attumaageeti woy maccaageeti shiishshana danddayoosona. Maaddiya uri mattuman issi mala gidana bessees. (km 5/97-AM mentto 2) Shiishshiyageeti eqqidi woy uttidi shiishshana danddayoosona. Ha kifilee kase doomettida Geeshsha Maxaafaa xinaatiya kaalettiyogaa bessana koshshees. Tamaariyassi imettida xinaate qofay hegaa gidana xayikko, erissiyo qofaa woy kuushsha qofaa yootana koshshenna. Imettida menttota ubbaa cenggurssaa sissidi nabbabana danddayikkonne, yaatiyogee koshshiyaba gidenna.

 10. Ne Ammaniyobaa Qonccissiyogaa: Ha kifilee haasayan shiiqiyaba gidikko, attumaageeti shiishshana bessees. Ootti-besuwan shiiqiyaba gidikko, maccaageeti woy attumageetikka shiishshana danddayoosona. Maaddiya uri mattuman issi mala woy he izaawu so asa yara gidana bessees. He tamaaree imettida xuufiyan deꞌiya qofaa goꞌettidi denddiya oyshawu qoncciyaninne hiillan zaarana koshshees. Tamaaree kifiliya shiishshiyo wode, goꞌettido xuufiya yootanawu woy agganawu kuuyana danddayees.

 11. Haasayaa: Ha tamaare kifiliya attumaageeti galchchawu haasayan shiishshana bessees. Haasayay Asaa Siiqite giya brooshuriyan gujo qofaa A, giyagaappe ekettiyo wode, xiqisiya woy xiqiseta haggaazuwan waati goꞌettana danddayiyakko tamaaree qonccissana koshshees. Leemisuwawu, issi xiqisiya awude goꞌettana danddayiyakko, xiqisiya birshshettay aybakko, qassi he xiqisiya izaawussi waati yootanaakko qonccissana danddayees. Haasayay Asaa Siiqite giya birooshuriyan deꞌiya issi qofan baasettiyo wode, tamaaree hegaa haggaazuwan waati goꞌettana danddayiyakko qonccissana koshshees. I he timirttiyan koyro qofan deꞌiya leemisuwa woykko maaddees giidi qoppikko, he timirttiyan deꞌiya kaafiya xiqisetuppe issuwa qonccissana danddayees.

   12. Gomppaa: Ha menttuwaninne kaalliya menttuwan deꞌiya qofay, “Haasayissiyogaa Doommiyogaanne” “Zaaretti Oychchiyogaa” giya kifiletussikka hanees. Dumma kaaletoy imettana xayikko, tamaariya halchchoy I haasayissiyo uri Geeshsha Maxaafaa tumaa eranaadan, oottiyogaanne zaaretti oychchanaassi hanotaa giigissiyogaa. Tamaaree wodiyawunne heeraa hanotawu haniya huuphe yohuwa doorana koshshees. Tamaarissanawu Goꞌettiyo Waanna Miishshatun deꞌiya xuufeta woy biidota erissanawu woy agganawu kuuyana danddayees. Tamaareti bantta guuggiyan oyqqido qofaa goꞌettiyogaappe asaa haasayissiyo hiillata, leemisuwawu siiquwa bessiyogaanne shonggaara deꞌiya hanotan haasayissiyogaa meezetana koshshees.

   13. Wodiyanne Hanotaa: Tamaaree bawu imettida kifiliya heerawu haniyadan goꞌettana koshshees. Leemisuwawu:

1.  (1) Sooppe Soo: Ha kifilee sooppe soo biyogan, silkkiyan woy dabddaabbiyan markkattiyogaanne sooppe soo kase biidi demmido ura zaaretti oychchiyogaa xaaxi waaxees.

2.  (2) Haggaazuwa Kiyennan Markkattiyogaa: Ha kifilee asaara haasayiyo injjiya markkattanawu goꞌettiyogaa bessees. Hegee ooso sohuwan, timirtte keettan, nu shooron, kaamiyan manddariiddi, woy nu biyo awaaninne nunaara gayttiya asawu Geeshsha Maxaafaa qofaa yootiyogaa gujjees.

3.  (3) Asa Demmidosa Ubban Markkattiyogaa: Ha kifilee xuufiya wottiyo gaariya goꞌettidi markkattiyogaa, giyan, ogiyan woy allaxxiyosan, kaamiya essiyosan woy asa demmiyo ubbasan markkattiyogaa gujjees.

 14. Biidotanne Xuufeta Goꞌettiyogaa: Hanotaadan issi tamaaree, biiduwa woy xuufiya goꞌettanawu kuuyana danddayees. Tamaariya kifiliyan biidoy deꞌiyaba, woy I biiduwa goꞌettanawu doorikko, I biiduwa erissidi tobbana koshshees; shin biiduwa dooyana bessenna.

15. Mazamuriyappe simmin, deꞌiya 15 daqiiqan shiiqiya issi woy naaꞌꞌu kifilee ezggiyageeti Xoossaa Qaalaa oosuwan peeshshanaadan maaddees. Dumma kaaletoy imettana xayikko, cimay shiishshana bessiya galchchawu koshshiyabaa giya kifiliyappe harata galchchaa cimay woy giday deꞌiyo galchchawu oottiyogee shiishshana danddayees. Tobbiyan shiiqiya kifileta shiishshiyagee, doommidi polana gakkanaashin imettidanne hara oyshata goꞌettidi shiishshana koshshees. Waanna qofata qonccissanawunne ezggiyageeti qofaa yootanawu gidiya wodee, deꞌana mala I doomettan haasayiyobay qantta gidana bessees. Oyshaa zaaroy deꞌiyo wode, danddayettikko zaariya izaawu uttosaappe gidennan madirakiya biidi zaarana koshshees.

  16. Galchchaa Geeshsha Maxaafaa Xinaatiya: Hasttamu daqiiqa. Ha kifilee giday deꞌiyo cimawu imettana koshshees. (Cimatu qooday guutta gididosan, ha kifilee giday deꞌiyo galchchawu oottiyageetussi imettana danddayees.) Galchchaa Geeshsha Maxaafaa Xinaatiya kaalettana bessiyageeta galchchaa cimati doorana koshshees. Kaalettanawu doorettidaageeti, xinaatiya imettida saatiyan wurssanawu, waanna xiqiseta loytti qonccissanawunne xinaatiyappe demmiyo goꞌꞌaa ezggiyageeti akeekanaadan maaddanawu xinaatiya loꞌꞌo ogiyan kaalettana bessees. Kaalettanawu doorettida ishantti oyshaaninne zaaruwan shiiqiya kifileta waati shiishshana bessiyakko imettida kaaletuwa zaarettiyogan goꞌettana danddayoosona. (w23.04 mentto 24, saaxiniya) He saaminttawu giigida qofay loꞌꞌo ogiyan shiiqidaba gidikko, xinaatiya coo adussana koshshenna. Danddayettikko, kaalettiyageetinne nabbabiyageeti saaminttan saaminttan laamettana koshshees. Xinaatiya qanttana mala Liqambbaree yootikko, kaalettiya ishay waati qanttanaakko kuuyana danddayees. Amarida menttoti nabbabettennaadan oottana danddayees..

17. Heezzu daqiiqa. Deꞌuwanne Haggaazuwa Shiiquwa Liqambbaree shiiquwan tamaarido keehi koshshiya qofata zaarettees. I kaalliya saaminttan tamaaranabaa qanttan erissana bessees. Wodee deꞌikko, kaalliya saaminttan tamaariya kifiliya shiishshiyageetu sunttaa yootana danddayees. Dumma kaaletoy imettana xayikko, koshshiya erissotanne dabddaabbeta liqambbaree kuushsha qofaa haasayiyo wode nabbabana koshshees. Haggaazuwawu giigissidobatanne geeshshiyo prograamiya mala meeze gidida erissota erissuwa saleedan kaqqana koshsheesippe attin, madirakiyappe yootana bessenna. Erissota yootanawu, woy dabddaabbeta nabbabanawu wodee gidennaba milatikko, liqambbaree Kiristtaanetu Deꞌuwa kifileta shiishshiya ishantti bantta kifiliya qanttanaadan yootana koshshees. ( Mentto 16nne  19 xeella.) Shiiqoy mazamuriyaninne woosan kuuyettees.

18. Tamaareti bantta kifiliya shiishshi simmin, Kiristtaanetu Deꞌuwanne Haggaazuwa Shiiquwa liqambbaree, imettida xinaate qofaa goꞌettidi issi daqiiqa gidiyagan tamaariya galateesinne zorees. Liqambbaree tamaaretu kifiliya erissiyo wode, imettida xinaate qofaa yootana koshshenna. Shin tamaaree ba kifiliya wurssi simmin, liqambbaree galati simmidi A zoriyo ginaa yootana danddayees; hegaappe simmidi, tamaaree ba kifiliya waati loytti qonccissidaakko woykko ayba ogiyan woy waatidi loytti qonccissana danddayiiddi aggidaakko kehatettan yootees. Liqambbaree tamaariya woy ezggiyageeta maaddana danddayees giidi qoppikko, ootti-besuwara gayttida hara qofatakka yootana danddayees. Asaa Siiqite giya broshuriyan, Tamaarissanawu giya birooshuriyan woy Haggaazo Timirtte Keettaa maxaafan deꞌiya tamaariyawu imettida woy hara qofan baasettida maaddiya zoriya shiiquwappe simmin, woy hara wode buzo zorana danddayettees.—Deꞌuwanne Haggaazuwa Shiiquwa liqambbariyanne zoriyogan maaddiyagaa beeraa xeelliyagan gujjada eranawu mentto   19,  24nne  25 xeella.

19. Kifiliya shiishshiyageeta gidin Deꞌuwanne Haggaazuwa Shiiquwa liqambbaree saatiya aattana koshshenna. Deꞌuwanne Haggaazuwa Shiiquwa Xannaꞌiyo Xuufee ubba kifiletuyyo imettida saatiya yootiyaba gidikkonne, kifilee loꞌꞌo hanotan shiiqikko saatiya kunttana gishsha xallawu gujo qofaa yootana koshshenna. Kifileta shiishshiya ishantti wodiya aattikko, Deꞌuwanne Haggaazuwa Shiiquwa liqambbaree woy zoriyogan maaddiyagee buzo xekkan zorana koshshees. (Mentto  24nne  25 xeella.) Mazamuriyanne woosaa gujjin, kumetta shiiqoy 1 saatenne 45 daqiiqan wurana koshshees.

20. Woradaa xomoosiyagee galchchaa xomoosiyo wode, kaallidi deꞌiyagaappe hara kifileta Deꞌuwanne Haggaazuwa Shiiquwan Xannaꞌiyo Xuufiyan deꞌiyagaadan shiishshana koshshees: Kiristtaanetu Deꞌuwa giyo shiiquwa shaahuwan deꞌiya Galchchaa Geeshsha Maxaafaa Xinaatiya gishshaa woradaa xomoosiyagee haggaazo haasaya 30 daqiiqan haasayees. Haggaazo haasayappe kase, Deꞌuwanne Haggaazuwa Shiiquwa liqambbaree tamaaridobaa zaarettees; kaalliya saaminttaa prograamiya qanttan yootees; koshshiyabaa erissees; koshshiya dabddaabbeta nabbabees; qassi woradaa xomoosiyagaa kifiliya erissees. Haggaazo haasayappe simmin, woradaa xomoosiyagee I doorido mazamuriyan shiiquwa kuuyees. Wurssetta woosaa hara ishaa shoobbana danddayees. Woradaa xomoosiyagee galchchaa xomoosiyo wode, naaꞌꞌantto addaraashan tamaareti kifiliya shiishshana koshshenna. Woradaa xomosiyagee citay deꞌiyo galchchaa xomosiyaba gidikko, citati bantta shiiqota shiiqana danddayoosona. Shin woradaa xomosiyagee haggaazo haasayaa haasayiyo wode, citati galchchaara issippe haasayaa siyana koshshees.

21. Woradaa woy killiliya shiiquwa saaminttan, galchchaa shiiqoy deꞌenna. He saaminttawu giigida prograamiya buzo woy so asaara issippe xannaꞌana koshshees.

22. Hassayuwa Baalay saaminttawu gidduwan deꞌiya gallassatun bonchchettikko, he saaminttan Deꞌuwanne Haggaazuwa Shiiqoy deꞌenna.

23. Cimati doorido issi cimay Deꞌuwanne Haggaazuwa Shiiquwa xomoosiyagaa gididi oottees. I ha kaaletuwadan shiiquwa prograamee maara polettiyogaa kaallees. I zoriyogan maaddiya ishaara koshshiyaban zorettana bessees. Deꞌuwanne Haggaazuwa Shiiquwan Xannaꞌiyo Xuufee gakkosaara Deꞌuwanne Haggaazuwa Shiiquwa xomoosiyagee naaꞌꞌu aginaa kifileta kessees. Hegee tamaaretu kifiliyanne hara kifileta gujjin cimati doorido ishanttuppe liqambbare gidiyageeta maddabiyogaakka xaaxi waaxees. (Mentto   3-16nne  24 xeella.) Tamaaretussi I kifiliya battiyo wode, eta bariya, meeziyanne eti he kifiliya laꞌatettan shiishshana danddayiyogaa akeekana koshshees. Shiiquwan deꞌiya hara kifileta battiyo wodekka I hegaadan oottana koshshees. He kifileti shiiqanaappe baa giishin heezzu saaminttaa kasetidi ubba kifiletakka immana koshshees. Kiristtaanetu Deꞌuwanne Haggaazuwa Shiiquwa Kifileta tamaaretussi immanawu (S-89) giyo qitsiya goꞌettana koshshees. Deꞌuwanne Haggaazuwa Shiiquwa xomoosiyagee kumetta shiiquwa prograamee saleedan kaqettidoogaa akeekana bessees. Cimati A maaddiya hara cimaa woy galchchawu oottiyagaa maddabana danddayoosona. Shin, tamaaretu kifiliyappe haraa cimatu xallay maddabana bessees.

24. Saaminttan saaminttan Deꞌuwanne Haggaazuwa Shiiquwawu issi cimay liqambbare gidees. (Cimatu qooday guutta gidikko, giday deꞌiyo galchchawu oottiyageetikka liqambbare gidana danddayoosona.) I shiiqoy doomettiyo wodenne kuuyettiyo wode haasayiyobaa giigettana koshshees. I ubba kifileta erissees; qassi galchchan deꞌiya cimati daro gidana xayikko hara kifileekka awu imettana, ubba qassi tobbiya koshshennan coo dooyidi ezggiyo biidota I dooyissana danddayees. Kifiletuppe gidduwan I haasayiyobay keehi qantta gidana bessees. Liqambbare gidanawu giday deꞌiyo cimati awugeetakko cimati kuuyana danddayoosona. Doorettida cimati kayan kayan liqambbare gididi oottana danddayoosona. Galchchaa hanotaadan, Deꞌuwanne Haggaazuwa Shiiquwa xomoosiyagee doorettida hara cimatuugaappe darotoo liqambbare gidana danddayees. Issi cimay Galchchaa Geeshsha Maxaafaa Xinaatiya kaalettanawu danddayees geetettidi doorettikko, Deꞌuwanne Haggaazuwa Shiiquwa liqambbarekka gididi oottana danddayees. Shin liqambbare gidiya cimay tamaareta maaddiya qofaa etawu siiquwan yootana, galatananne zorana bessiyogaa hassaya. Qassi liqambbaree shiiqoy wurana bessiya saatiyan wuranaadan oottana koshshees. (Mentto   17nne  19 xeella.) Liqambbaree koyiyabanne gidiya sohoy deꞌiyaba gidikko, hara maykraafoonee giigin hinkko ishay ba sohuwan eqqidaashin kaalliya kifiliya erissana danddayees. Qassi koyiyaaba gidikko, liqambbaree Geeshsha Maxaafaa nibaabiya wodenne Minnada Haggaaza giya kifileti shiiqiyo wode, madirakiyan xarapheezaanne wombbaraa giigissidi uttana danddayees. Yaatiyogee wodiya qoraphphanawu maaddees.

25. Danddayettikko, ha aawatettaa loytti haasayiyo meezee deꞌiyo cimaassi immiyogee loꞌꞌo. Zoriyogan maaddiya ishay Deꞌuwanne Haggaazuwa Shiiquwan kifilee deꞌiyogeeta, dere haasayaa haasayiyageeta, hegaadankka qassi Wochchiyo Keelaanne Galchchaa Geeshsha Maxaafaa Xinaatiya kaalettiyageeta, qassi he wode nabbabiya cimatanne galchchawu oottiyageeta koshshiyo wodiyan buzo zorana danddayees. (Mentto   19 xeella.) Loytti haasayiyanne gooba asttamaare gidida daro cimati galchchan deꞌiyaba gidikko, layttan layttan dumma dumma cimati ha oosuwa oottana danddayoosona. Ha ishay kifiliya shiishshido paydo ubban ishantta zorana koshshenna.

26. Tamaaretu qooday daro gidikko, tamaaretu kifiliyawu gujo addaraashatakka galchchati giigissana danddayoosona. He addaraashankka loytti zoriya uraa, danddayettikko cimaa maddabana bessees. Koshshiyo wode, galchchawu oottiya giday deꞌiyo ishay he aawatettaa polana danddayees. Hegaadan oottana danddayiyay oonakko, qassi kayan kayan laamettana koshshiyakkonne cimati kuuyana bessees. Zoriya ishay mentto  18n qonccida kaaletuwa kaallana koshshees. Gujo addaraashan kifileti shiiqiyaba gidikko, Xoossaa Qaalan Deꞌiya Alꞌꞌobaa giyo shiiquwa shaahuwan Ayyaanaaban Alꞌꞌobaa giyo kifilee wurosaara, tamaareti hara addaraashaa baanaadan yootana koshshees. Wurssetta tamaare kifilee wurosaara eti waanna addaraashaa simmana koshshees.

27. Ha shiiquwan amarida biidoti beꞌettana. Saaminttawu gidduwa shiiquwawu giigida biidota, dumma dumma miishshata goꞌettidi JW Laybreriya^® appiyappe demmana danddayettees.

© 2023 Watch Tower Bible and Tract Society of Pennsylvania

S-38-WL 11/23