Nuuni ubbay 2023y doommiyo wode, nuuyyoonne nu so asawu loꞌꞌobay hanana giidi hidootoos. Nuuni loꞌꞌobay hanana giidi hidootana danddayiyoy aybissee?

 Geeshsha Maxaafay ha wodiyan nuna gakkiya metoy guutta wodiyaassa gidiyoogaanne matan xayanaagaa qonccissiya mishiraachchuwaa yootees. “Xoossaa maxaafai nuuyyo immiyo . . . minttettuwan nuuni demmana giidi ufaissan naagi uttidoogee de7ana mala, [Geeshsha Maxaafay] nuna tamaarissanau xaafettiis.”—Roome 15:4.

•   Geeshsha Maxaafay yootiyo hidootaabaa gujjada eranawu, “Loꞌꞌo wodee yaana giidi hidootan naagana danddayiyoo?” giya huuphe yohuwaa nabbaba.

 Geeshsha Maxaafay yootiyo hidootay “nu shemppuwaayyo markkabiyaa oiqqiya qaaxxenna birata mala.” (Ibraawe 6:19) He hidootay nuuni woppu gaanaadan maaddana danddayees. Hegee nuuni ha wodiyan nuna gakkiya metuwaa genccanaadan, loꞌꞌobaa qoppanaadaaninne ubbatoo ufayttanaadan maaddana danddayees. Leemisuwawu:

•   Geeshsha Maxaafay yootiyo hidootay ushshay amale gidido bitaniyaa waati maaddidaakko akeeka. Ufayssi Baynna Deꞌuwaa Deꞌiyoogaa Aggaas giya biiduwaa beꞌa.

•   Nuuni siiqiyoogeeti hayqqiyo wode Geeshsha Maxaafay yootiyo hidootay nuna waati maaddana danddayiyaakko akeeka. Kayyottiyaageeta Minttettiyaabaa giya biiduwaa beꞌa.

 Sinttappe loꞌꞌobay hanana giidi daro asay hidootan naagees, shin eti naagiyoobay polettanaagaa ammanettana danddayokkona. Geeshsha Maxaafay yootiyo hidootay hegaappe dumma. Aybissi? Geeshsha Maxaafan deꞌiya hidootaa, “worddotenna Xoossai” Yihooway a yootido gishshataassa. (Tiitu 1:2) Ba gelido qaala ubbaa polanawu wolqqay deꞌiyoy Yihoowa xallaassa; I “ba dosidobaa ubbaa” oottana danddayees.—Mazamure 135:5, 6.

 Geeshsha Maxaafay yootiyo ammanttiya hidootaappe goꞌettanaadan nena shoobboos. “Xoossaa maxaafata” pilggiyoogan Geeshsha Maxaafay yootiyo ammanttiya hidootan ne ammanuwaa minttana danddayaasa. (Oosuwaa 17:11) Nuuni miishsha qanxxissennan xannaꞌissiyo Geeshsha Maxaafaa nunaara xannaꞌiyoogan hegaa akeeka. Loꞌꞌobay hanana ga hidootaydda 2023 doomma!