Hidaare 20ppe Tisaase 18, 2022 gakkanawu deˈiya FIFA Alamiyaa Wanccaa ichchashu biiloone gidiya asay beˈana danddayiyoogee odettiis. Hegaa mala ispportte kaassati asay beˈiyo wode issippetettay deˈanaadan oottiyoogaappe aadhdhiyaabawu maaddana danddayees giidi daroti qoppoosona.

•   “Ispporttiyawu alamiyaa laammiyo wolqqay deˈees. Ispporttee asaa denttettana danddayees. Ispporttiyawu maalaaliya ogiyan asay issippetettan deˈanaadan oottiyo wolqqay deˈees.”—Nelssen Manddeela, kase Tohossa Afirkkaa pirezddanttiyaa.

•   “Toho kuwaasiyaa kaassay . . . dummatettay deˈishinkka asay issi malabaa hidootanaadan, issippe ufayttanaadan, issi malabaa qoppanaadan, qassi siiqettanaadan oottees.”—Jani Infantiina, FIFA pirezddanttiyaa. a

 Alamiyaa Wanccay woy hara ispportte kaassay hegaa mala loˈˈobaa oottana danddayii? Sarotettaynne issippetettay yaana danddayii?

 Ha laytta Alamiyaa Wanccay asay kuwaasiyaa kaassaa xalla gidennan hegaappe aadhdhiyaabaa qoppanaadan oottiis. Ispportte kaassati asaa maataa, zariyan zaggiyoogaanne ikkonoomiyaa dummatettaa gujjin, deretettaanne polotikaa allaalleta xeelliyaagan asay haasayanaadan oottidosona.

 Alamiyaa Wanccaa mala kumetta saˈan deˈiya ispportte kaassata beˈiyoogan daro asay haˈˈikka ufayttees. Gidikkonne, he kaassati asay koyiyoogaa keena issippetettay deˈanaadan oottana danddayokkona. Ubba hegeeti, Geeshsha Maxaafay ‘wurssetta gallassaa’ malaata giidi yootiyo shaahettanaadan oottiya eeshshaanne oosuwaa bessoosona.—2 Ximootiyoosa 3:1-5.

 Kumetta saˈan issippetettay deˈanaagaa Geeshsha Maxaafay yootees. Saˈan deˈiya asa ubbay “Xoossaa kawotettaa” geetettiya saluwaa kawotettaa haaruwan issippetettan deˈanaagaa Geeshsha Maxaafay yootees.—Luqaasa 4:43; Maatiyoosa 6:10.

 He Kawotettaa Kawoy Yesuus Kiristtoosi kumetta saˈan sarotettay deˈanaadan oottana. Geeshsha Maxaafay hagaadan gees:

•   “Xillotettai daayo; aginai xayana gakkanaassi sarotettai daro.”—Mazamure 72:7.

•   “A xeesiya hiyyeesata . . . naaquwaappenne makkalaappe i wozees.”—Mazamure 72:12, 14.

 Ha wodiyankka, Yesuusi tamaarissidobay 239 biittan deˈiya daro miiloone asay issippetettan deˈanaadan oottiis. Eti harata ixxiyoogaa aggana koshshiyoogaa tamaaridosona. Gujjada eranawu, “Ixuwaa Xoonana Danddayoos” giya huuphe yohuwaa xeella.