Mata wodeppe doommidi, kawotetta haariyageti, sayinttistettinne eranchati artefishal intelejens (AI) giyobay maaddiyo ogiyabaa qonccissidosona. Hegee maaddiyaba gidiyogaa eti ammanikkonne hegaa bala ogiyan goꞌettikko asa qohana danddayiyogaakka qonccissidosona.

•   “Artefishal intelejens (AI) giyobay ha wodiyan asa deꞌuwa loyttana danddayiya keehi maaddiya wolqqaama tekinoloje . . . Shin, artefishal intelejens (AI) giyobay asay naagettidinne woppan deꞌnnaadan, eta maatay bonchettennaadaninne asay demokraasya bolli kaseegaappe aaruwan ammanettennaadan oottana danddayes.”—Kamala Hariso, Amarkka sima pirezidanttiya, Uddufune 4, 2023.

•   Dottore Prederek Pedesepeli kaalettiyo, kumetta alamiyan deꞌiya dottoretu citaanne payyatettaa naaguwa eranchati Uddufune 9, 2023n BMJ Global Helz a giya xuufiyan kessido huuphe yohoy hagaadan gees: “Artefishal intelejens (AI) giyobay amarida ogiyan payyatetta naagiyogaara gayttidaagan maaddiyaba gidikkonne hara baggara qassi nu asatettaanne qofaa payyatetta qohana danddayes.”

•   “Worddo odduwa aassanawu asay Artefishal intelejens (AI) giyoba goꞌettana danddayes. Hegee mata wodee asay ba oosuwa xayanaadan oottana danddayes. Tekinoloje eranchati issoti issoti Artefishal intelejens (AI) giyobay sinttappe asa naata qohana gidi kehii hirggoosona.”—Ze Niwu York Taymis, Uddufune 1, 2023.

 Artefishal intelejens (AI) giyobay asa naata goꞌꞌanaakko qohanaakko wodee qonccissana. Geeshsha Maxaafay woygii?

 Asay medhdhiyo ooratta teknolojeti loꞌꞌbawu xalla hanana giidi ammanttiyabaa eti yootana danddayennay aybissakko Geeshsha Maxaafay yootees.

1.  1. Asay loꞌꞌobaa qoppidi oottikkonne, hegee haraata qohana danddayes giidi qoppennan aggana danddayoosona.

   •   “Asaassi likke milatiya ogee de7ees; shin bin, a wurssettai haiquwan kessi yeggees.”—Leemiso 14:12.

2.  2. Issi uri I medhdhidoba asay hegaa loꞌꞌobawu goꞌettanaadan woy iitabawu goꞌettanaadan oottana danddayenna.

   •   “Ta [ooso] ubbaa taappe guyyiyan yiya urau yeggada [bays] . . . Taappe guyyiyan yiya bitanee aadhdhida eranchchakko eeyyakko ooni erii? SHin i oona gidinkka, taani keehi daafuridobaanne ta cinccatettan taani demmidobaa ubbaa bau ekkidi, goda gidana.”—Eranchchaa 2:18, 19.

 Asay oottiyobati hegaadan ammanttana danddayennaagee, nuna Medhdhidaagaa kaaletoy nuussi koshshiyogaa qonccissees.

 Asay woy eti medhdhido teknolojee saꞌaa woy asaa naata mule xayssennaagaa nuna Medhdhidaagee qaalaa geliis.

•   “Ha biittai merinaukka laamettennan de7ees.”—Eranchchaa 1:4.

•   “Xilloti biittaa laattananne yan merinau de7ana.”—Mazamure 37:29.

 Nuna Medhdhidaagee Sinttappe nuuni sarotettaaninne woppan deꞌanaadan maaddiya kaaletuwaa Geeshsha Maxaafaa baggaara qonccissiis. Geeshsha Maxaafay hegaabaa woygiyaakko gujjada eranawu, “Ufayssiya Deꞌuwaa Deꞌanawu Ammanttiya Kaaletuwaa Awuppe Demmana Danddayiyoo?” qassi “Keha Wodee Yaanaagaa Ammanettana Danddayiyoo?” giya huuphe yohota nabbaba.