NAAGI UTTITE!
Jarmanen Asaa Buttidoogaanne Yihoowa Markkata—Geeshsha Maxaafay Woygii?
Ichchashe 27, 2023n, Jarmanen Asaa Buttido Gallassaa Hassayiyo Baalaa daro asay bonchchees. ‘Xoossay 75 layttaappe kase hanida he iitabaa teqqibeennay aybissee?’ gaada qoppana danddayaasa.
Geeshsha Maxaafay yootiyoobaa eranawu, “Jarmanen Asaa Aybissi Buttidonaa? Xoossay Hegaa Teqqibeennay Aybissee?” giya huuphe yohuwaa nabbaba.
Jarmanen asaa buttido wode Ayhudati keehi qohettidosona. Miilooniyan qoodettiya asaa halchchidi woridosona. Jarmanen asaa buttido wode harati yedetettidosonanne hayqqidosona. Hegeetu giddon, Geeshsha Maxaafay yootiyoobaa ammaniyo gishshawu yedetettida Yihoowa Markkatikka deˈoosona.
Gujjada eranawu, “Jarmanen Asaa Buttido Wode Yihoowa Markkata Gakkidabay Aybee?” giya huuphe yohuwaa nabbaba.
‘Sintta wodiyaanne hidootaa’
Asaa buttidi woriyoogaa malabay zaarettidikka denddana danddayees giidi daro asay hirggees. SHin ufayssiyaabay, hegaa malabay zaarettidi hanana danddayenna wodee yaanaagaa Geeshsha Maxaafay yootees.
“Aissi giikko, taani intteyyo halchchiyo halchchuwaa taani [Yihooway, NW] erais; hegeenne, intteyyo sintta wodiyaanne ufaissaa immana mala, saro halchchoppe attin, iita halchcho gidenna.”—Ermmaasa 29:11. a
Xoossaa Yihooway iitabaanne hegee kaalettido qohuwaa xayssiyo wode, he hidootay polettana. I mata wode:
Harata qohiya iitata xayssana.—Leemiso 2:22.
Sahuwan waayettiya ubbaa pattana.—Ajjuutaa 21:4.
Hayqqidaageeti saˈan deˈanaadan denttana.—Yohaannisa 5:28, 29.
Geeshsha Maxaafay yootiyo minttettiya hidootan ammanettana danddayaasa. Neeni hegaa ammanettana danddayiyoy aybissakko eranawu, nunaara miishsha qanxxennan Geeshsha Maxaafaa xannaˈanaadan shoobboos.
a Yihoowa giyoogee Xoossaa buzo sunttaa.—Mazamure 83:18, NW.