Kumetta saꞌan, 2024n hanno gakkanawu issi layttaa giddon hani eriyagaappe aadhdhiya dooroy daro sohotun deꞌana. Gidikkonne, daro asay polotikaa asatun ammanettiyogaa aggiiddi deꞌees.

•   “Daro polotikaa asata denttettiyabay bantta xallaa siiqiyogaappe attin” harata goꞌꞌiyabaa oottiyogaa gidennaagaa, pilggida Amarkkaa asatuppe daroti yootoosona. a—Piwu Pilggettaa Eqotaa, Masqqala 19, 2023.

 Daro yelagatikka polotikaa asatun ammanettokkona.

•   “Ha wodiyan deꞌiya yelagata gita metuwa pagaliyo ogiyabay qofissees, shin xannaꞌanawu oychchido yelagati polotikaa asati he metuwa pagaliiddi deꞌennaagaa yootidosona.”—Ze Niwu York Taymis, Ichchashe 29, 2024.

•   Issi xinaatee qonccissiyogaadan, “yelagati polotikaa asatuppe aaruwan, Yuutuubiyan erettida asatun ammanettoosona.”—Ze Koriya Taymis, Ichchashe 22, 2024.

 Polotikaa asay sinttappe loꞌꞌobaa ehaana giidi ammanettana danddayiyoo? Nuuni oonan ammanettana danddayiyoo?

 Asay oonan ammanettanaakko akeekan dooriyogee keehi koshshiyaba. Geeshsha Maxaafay “eeyya asi ubbabaa ammanees; shin cinccai akeekidi tanggees” yaagees.—Leemiso 14:15.

•   Neeni siyiyobay tumakko worddokko shaakka eranawu maaddiya qofaa demmanawu, “Worddo Oduwappe Naagetta” giya huuphe yohuwa nabbaba.

 Ubbaappe aaruwan, haray atto keehi ammanettiyanne harata maaddanawu wozanappe koyiya polotikaa asatikka oottana danddayiyobay keehi guutta. Geeshsha Maxaafay hagaadan giidi yootiyoy hegaassa:

•   “Asi ashshanau danddayenna gishshau, asaa halaqatun ammanettoppite.”—Mazamure 146:3.

 Loyttidi haarana danddayiyanne ammanttiya kaalettiya ura Xoossay dooridoogaa Geeshsha Maxaafay yootees; I Yesuus Kiristtoosa. (Luqaasa 1:32, 33) Saluwan gididi haariya Xoossaa Kawotettaassi Kawoy Yesuusa.—Maatiyosa 6:10.

•   Neeni Yesuusan ammanettana danddayiyoy aybissakko, qassi nuna gakkiya metuwa xayssanawu I ay oottanaakko era. “Xoossaa Kawotettaa Kawoy Oonee?” qassi, “Xoossaa Kawotettay Ay Oottanee?” giya huuphe yohota nabbaba.