Kawotettatu Issippetettay kessido irpporttee yootiyogaadan:

•   Gaazatinne Israaˈeelati olettiyo olan, Xiqimita 7ppe Xiqimita 23, 2023 gakkanaashin, 6,400ppe dariya asay hayqqiis, qassi 15,200ppe dariya asay qohettiis, hageetuppe daroti aynne mooribeennaageeta. Hegaa bollikka, xeetu shaˈan qoodettiyageeti bantta keettaa olidi baqatidosona.

•   Raashiyanne Yukireene olan, Masqqala 24, 2023ppe doommidi, Yukireenen deˈiya aynne mooribeenna 9,701 asay hayqqiis, qassi 17,748 asay qohettiis.

 Geeshsha Maxaafay olaa gaasuwan waayettiyageeta minttettiya ayba hidootaa yootii?

 Geeshsha Maxaafay Xoossay “sa7aa gaxaa gakkanaassi de7iya olaa” teqqanaagaa yootees. (Mazamure 46:9) I, saluwa kawotettay asaa kawotetta ubbaa xayssanaadaaninne he sohuwan haaranaadan oottana. (Daaneela 2:44) Xoossaa kawotettan asa ubbay woppu giidi deˈana.

 Xoossaa kawotettaa kawoy Yesuus Kiristtoosi oottanabaa beˈa:

•   “A xeesiya hiyyeesata, naaqettidaageetanne maaddiyaabi bainnaageeta i ashshees. Hiyyeesatussinne manqqotussi i qarettees; hiyyeesatu shemppuwaa ashshees. Eta naaquwaappenne makkalaappe i wozees.”—Mazamure 72:12-14.

 Xoossay ba kawotettaa baggaara, olanne makkalaa gaasuwan yiida metuwanne waayiya muleera xayssana.

•   “Xoossai eta aifiyaappe afutta ubbaa quccana. Hagaappe sinttanau haiqoinne kayyoi woi waasoinne sahoi de7enna. Aissi giikko, ceegabai xayiis.”—Ajjuutaa 21:4.

 Mata wode, Xoossaa Kawotettay ha saˈan gita laamiya ehaana. Geeshsha Maxaafay nuuni ha wodiyan beˈiyo “olaabaa” kasetidi yootiis. (Maatiyosa 24:6) Hegeenne hegaa mala hara hanotati, nuuni asaa haaruwa ‘wurssetta gallassan’ deˈiyogaa bessoosona.—2 Ximootiyoosa 3:1.