“Saꞌan sarotettay deꞌanaadan asay danddayanchcha gidana bessees.”—YUNESKO Diklareshin of Prinsiplis on Tolerans, 1995.

 Hara baggaara, danddayanchcha gidennaagee asay issoy issuwa bonchchennaadaaninne ixxanaadan oottana danddayees. Asay hegaa mala eeshshaa ixo haasayan, zaggiyogaaninne makkaliyogan qonccissana danddayees.

 Shin danddayanchcha gidiyogaa xeelliyagan asawu dumma dumma qofay deꞌees. Issoti issoti, danddayanchcha uri harati oottiyo aybanne dosana bessees giidi qoppoosona. Harati qassi, Geeshsha Maxaafay minttettiyo, danddayanchcha uri I maayettennaba gidikkonne, harati xoqqu ootti xeelliyobaanne ammaniyobaa dooriyo maataa bonchchees giya qofaa kaalloosona.

 Ha wodiyan asay tumuppe danddayanchcha gidanaadan Geeshsha Maxaafay maaddana danddayii?

Danddayanchcha gidanaadan Geeshsha Maxaafay yootiyobaa

 Geeshsha Maxaafay danddayanchcha gidanaadan minttettees. Hagaadan gees: “Asai ubbai intte ashkketettaa ero.” (Piliphphisiyuusa 4:5) Geeshsha Maxaafay nuuni haratussi qoppanaadan, eta bonchchanaadaaninne etawu bessiyabaa oottanaadan minttettees. Ha zoriya oosuwan peeshshiyageeti harati xoqqu ootti xeelliyobaa maayettennan woy eta qofaa ekkennan aggana danddayoosona; shin harati bantta dooridobaa oottiyogaa diggokkona.

 Gidikkokka, asaa eeshshaa xeelliyagan Xoossay kessido maaraa Geeshsha Maxaafay qonccissees. Hagaadan gees: “Hai asau, GODAI neeyyo lo77obaa odi wottiisttenne.” (Mikiyaasa 6:8) Danddayettida keenan asay loꞌꞌo deꞌuwa deꞌanaadan maaddanawu Xoossay immido kaaletuwa Geeshsha Maxaafay qonccissees.—Isiyaasa 48:17, 18.

 Haratu bolli pirddiyo maataa Xoossay nuussi immibeenna. Geeshsha Maxaafay hagaada gees: “Higgiyaa immiyaageenne pirddiyaagee Xoossaa xalaala . . . ne shooruwaa bolli pirddiyaagee neeni oonee?” (Yaaqooba 4:12) Nuuni nu aawatettan koyidobaa dooriyo maataa Xoossay immiis.—Zaarettido Wogaa 30:19.

Bonchchiyogaa xeelliyagan Geeshsha Maxaafay woygii?

 Nuuni ‘asa ubbaa bonchchana’ koshshiyogaa Geeshsha Maxaafay yootees. (1 Pheexiroosa 2:17) Yaatiyo gishshawu, Geeshsha Maxaafaa maaraadan deꞌanawu dooriyageeti, harati ammaniyobay woy eti deꞌiyo hanotay aybanne gido, asa ubbaa bonchchoosona. (Luqaasa 6:31) Hegaa giyogee, Geeshsha Maxaafaa maaraa kaalliyageeti harati ammaniyo woy qoppiyo ubbabaara maayettoosona woy eti kuuyido ubbabaa kaafoosona giyogaa gidenna. Shin eti eqettiyogaa woy harata bonchchennaagaa bessiyabaa oottokkona; hegaappe Yesuusi harata oyqqido ogiya kaallanawu banttawu danddayettidabaa oottoosona.

 Leemisuwawu, issi wode Yesuusi I kaallenna haymaanootiya kaalliya maccaaseera gayttiis. Ha maccaasiya ba azina gidenna uraara issippe deꞌawusu. Hegee Yesuusi kaafenna deꞌo maara. Gidikkonne, I he maccaasiyo bonchchuwan haasayissiis.—Yohaannisa 4:9, 17-24.

 Yesuusaagaadan, Kiristtaaneti siyanawu koyiyageetussi bantta ammaniyobaa yootanawu giigi uttidosona; shin hegaa bonchchuwan oottoosona. (1 Pheexiroosa 3:15) Kiristtaaneti bantta qofaa ekkanaadan harata giddana bessennaagaa Geeshsha Maxaafay yootees. Kiristtoosa kaalliya uri, dumma ammanoy deꞌiyogeeta gujjin, “ubbaayyo kehiyaagaa, gidanau besseesippe attin, ooyettanau” bessennaagaa Geeshsha Maxaafay yootees.—2 Ximootiyoosa 2:24.

Ixuwa xeelliyagan Geeshsha Maxaafay woygii?

 Geeshsha Maxaafay nuuni “asa ubbaara saro” deꞌanadan zorees. (Ibraawe 12:14) Saruwan deꞌanawu koyiya uri harata ixxenna. I ba ammaniyobaa aggana xayikkonne, haratuura saruwan deꞌanawu bawu danddayettidabaa oottees. (Maatiyoosa 5:9) Kiristtaaneti banttana qohiyageetussikka loꞌꞌobaa oottiyogan bantta morkketa siiqanaadan Geeshsha Maxaafay zorees.—Maatiyoosa 5:44, 45.

 Harata bonchchennaagaa bessiyabaa woy qohiyabaa oottiyogaa Xoossay ‘ixxiyogaa’ woy ‘shenetiyogaa’ Geeshsha Maxaafay yootees. (Leemiso 6:16-19) Shin Geeshsha Maxaafay ha sohuwan ‘ixuwa’ giya qaalaa, iita oosota dosennaagaa qonccissanawu goꞌettees. Xoossay I kessido maaraadan deꞌanawu bantta deꞌuwa hanotaa laammiyageetussi atto gaanawunne eta maaddanawu koyiyogaa Geeshsha Maxaafay qonccissees.—Isiyaasa 55:7.

Danddayiyogaabaanne bonchchiyogaabaa yootiya Geeshsha Maxaafaa xiqiseta

 Tiitu 3:2, NW: ‘Bessiyagaadan qoppite, qassi asa ubbawu ashkketettaa bessite.’

 Maatiyoosa 7:12: “Hara asi intteyyo oottanau koyiyo ubbabaa inttekka asau oottite.”

 Yaasa 24:15: “Intte goinnanaagaa hachchi doorite.”

 Oosuwaa 10:34, 35: “Xoossai asa som77o xeellenna.”

 Imbbaaqooma 1:12, 13: ‘Xoossay iitabay oosettiyo wode beꞌiiddi coꞌꞌu gaanawu danddayenna.’

 Roome 12:19: “[Xoossaa] hanqquwaassi a aggiigite. Aissi giikko, Xoossaa maxaafai, “[Yihooway, NW] ‘Taani haluwaa kessana; taani kushiyaa zaarana’ yaagees” yaagees.” a

 Xoossaa Yihooway ooninne haluwa kiyanaadan paqqadenna. I ba keerido wodiyan suure pirdday deꞌanaadan oottanaagaa yootiis. Gujjada eranawu, “Asay Suure Pirddaa Demmanawu Waassiyogaa Siyiyabi Daanee?” giya huuphe yohuwa nabbaba.