Usuppune 24, 2022n Raashiyaa wotaaddarati Yukireene woraajjidosona. Hegee keehi daro asay ba shemppuwaa ashshanawu he biittappe betanaadan oottiya wolqqaama metuwaa kaalettiis. a

 “Yan han bombbee xuuqqees. Hanotay ay keena deexxiyaabakko qonccissanawu metees. Yaappe betidi biyaageeta efiya baabureti deꞌiyoogaa siyido wode nuunikka nu biittaappe kiyanawu kuuyida. Nuuyyo deꞌiya ubbabaa aggidi baana koshshiis; ayssi giikko, ooninne guutta borssappe harabaa ekkidi baana danddayenna. Nuuni xaliyaa, miyo guttabaanne haatta mala keehi koshshiyaaba xallaa ekkidi kiyida. Nuuni ubbabaa aggidi baabureti eqqiyoosaa biyo wode bombbee yan han xuuqqees.”—Yukireenen Karkive kataman deꞌiya Nataliyo.

 “Oli daana giidi nuuni I doommana gakkanaashin mule qoppibookko. Kataman issi issisan xuuqqiyaabaa siyaas; qassi hegee maskkooteta qaattees. Keehi koshshiyaabatu xallaa ekkada kiyanawu kuuyaas. Yaatiyo gishshawu baaburiyan Levifa baanawu guuran 2:00 saatiyan sooppe kiyaas; yaatada otobisiyan Poolandde baas.”—Yukireenen Karkive kataman deꞌiya Nadiyo.

Ha huuphe yohuwan

•  Asay betanaadan oottida waannabati aybee?

•  Betiya asay hidootaa awuppe demmana danddayii?

•  Betiyaageeta Geeshsha Maxaafay ha wodiyan maaddana danddayii?

 Asay betanaadan oottida waannabati aybee?

 Asay Yukireeneppe betidoy Raashiyaa wotaaddarati he biittaa woraajjido gishshataassa. SHin he ubbabawu waanna gaasoy aybakko Geeshsha Maxaafay yootees:

•   Asa kawotetti asaayyo koshshiyaabaa kunttana danddayibeenna. Kawotettati darotoo bantta maatan asaa naaqqoosona.—Eranchchaa 4:1; 8:9.

•   Ha ‘saꞌaa haariya’ Seexaanaa Dabloosi asaa bolli keehi iitabaa gattiyo gishshawu, Geeshsha Maxaafay hagaadan gees: ‘Ha mule saꞌay xalahe halaqan haarettees.’—Yohaannisa 14:30; 1 Yohaannisa 5:19.

•   Hanno gakkanawu asaa keehi daro layttawu metoy gakkidoogaa bolli, Geeshsha Maxaafay ‘wurssetta gallassi genccanawu wayssiya wodee yaana’ giido wodiyan nuuni deꞌoos. (2 Ximootiyoosa 3:1) Hegaa bollikka ha wurssetta gallassan olay, meretay gattiyo daafabay, koshaynne wurssiya harggee daranaagee odettiis; hegeeti asay betanaadan oottoosona.—Luqaasa 21:10, 11.

 Betiya asay hidootaa awuppe demmana danddayii?

 Geeshsha Maxaafay nuna Medhdhida Yihooway, b betiyaageetuyyo qarettiyaanne siiqiya Xoossa gidiyoogaa yootees. (Zaarettido Wogaa 10:18) Yihooway betiyaageeta gakkiya metuwaa saluwan deꞌiya ba Kawotettaa baggaara muleera xayssanawu qaalaa geliis; he Kawotettay asa kawotettaa xayssidi saꞌaa haarana. (Daaneela 2:44; Maatiyoosa 6:10) Yihooway ba Kawotettaa baggaara Seexaanaa Dabloosa xayssana. (Roome 16:20) He Kawotettay asa kawotettay shaakkido zawaa xayssidi kumetta saꞌaa haarana. Kumetta saꞌan deꞌiya asay issi keetta asadan deꞌana. Xoossaa Kawotettay saꞌaa hariyo wode, ooninne betenna; ayssi giikko, Geeshsha Maxaafay hagaadan gees: “SHin asi ubbi ba woiniyaa turaa kuwaaninne balasiyaa kuwan woppu giidi uttana; ai asinne eta yashissenna. Aissi giikko, Ubbaappe Wolqqaama GODAI hagaa haasayiis.”—Mikiyaasa 4:4.

 Ha wodiyan betiyaageeta gakkiya metuwaa muleera xayssana danddayiyay Xoossaa Kawotettaa xalla. Asay betanaadan oottiya meto ubbaa Yihooway ba Kawotettaa baggaara xayssana. Hegeetuppe amaridaageeti hageeta:

•   Olaa. ‘Yihooway olaa teqqana.’ (Mazamure 46:9) Xoossay olaa waati xayssanaakko eranawu “Saꞌa Ubban Sarotettay Waani Deꞌanee?” (Amaarattuwaa) giya huuphe yohuwaa nabbaba.

•   Naaquwaanne makkalaa. ‘Eta naaquwaappenne makkalaappe Yihooway wozana.’ (Mazamure 72:14) Asay ixuwaa waati aggana danddayiyaakko eranawu “Ixuwaa Xoonana Danddayoos” giya kaalli kaalli kiyiya huuphe yohota nabbaba.

•   Hiyyeesatettaa. ‘A xeesiya hiyyeesata, Yihooway ashshana.’ (Mazamure 72:12) Hiyyeesatettawu gaaso gididabata Xoossay waati xayssanaakko eranawu, “Ikkonoomiyaaban Zaggiyoobi Baynna Wodee Yaanee?” (Amaarattuwaa) giya huuphe yohuwaa nabbaba.

•   Koshaa. “Biittan daro kattai [mokkana].” (Mazamure 72:16) Ay asinne namisettennaadan Xoossay waati oottanaakko eranawu “Namisay Baynna Alamiyaa?” (Inggilizettuwaa) giya huuphe yohuwaa xeella.

 Betiyaageeta Geeshsha Maxaafay ha wodiyan maaddana danddayii?

 Ee. Betiyaageetuyyo Geeshsha Maxaafay minttettiya hidootaa yootiyoogaa xalla gidennan, ha wodiyan gakkiya metuwaara gayttidaagankka eta maaddana danddayees.

 Geeshsha Maxaafay yootiyo maaraa: “Xoossaa intte woossiyo woosa ubban a keehi galatiiddi, inttena koshshiyaabaa ubbau woossiteppe attin, issibaukka hirggoppite. Qassi asa eratettaa ubbaappe aadhdhiya Xoossaa sarotettai intte wozanaanne intte qofaa . . . naagana.”—Piliphphisiyuusa 4:6, 7.

 Hegee woygiyoogee? Ne hanotay ayba gidikkonne, Xoossay sarotettaa immanaadan woossa. “Piliphphisiyuusa 4:6, 7—‘Issibaukka Hirggoppite’” (Amaarattuwaa) giya huuphe yohuwaa nabbaba.