Ha Wodiyan Deˈiya Koshaabaa Geeshsha Maxaafay Woygii?
“Ooninne namisettoppo.” Hagee saˈaa kawotettan haariyageeti asaa naatu gita metotuppe issuwa gididaagaa qaaranawu halchchidi haasayidoba; hegeekka ha saˈan deˈiya ooninne namisettennaadan oottanaassa. a Shin ha saˈaappe koshay xayanee? Geeshsha Maxaafay woygii?
Ha wodiyan deˈiya koshaabay Geeshsha Maxaafan kasetidi odettiis
Geeshsha Maxaafay ‘wurssetta gallassaa’ giyo nu wodiyan koshay deˈanaagee kasetidi odettiis. (2 Ximootiyoosa 3:1) Koshay deˈanaadan oottiday Xoossaa gidenna, shin I hegaabaa nuussi yootiis. (Yaaqooba 1:13) Geeshsha Maxaafan kasetidi odettida naaˈˈubaa akeeka.
“Dumma dumma heeran koshay denddana.” (Maatiyosa 24:7) Darosan koshay deˈanaagee Geeshsha Maxaafan kasetidi odettiis. Kattaa mokissiyonne asawu gattiyo ogiyabaa pilggiyageeti giigissido issi iripporttee hagaadan gees: “Koshaara, qassi bollawu goˈˈiyanne gidiyagaa keena kattay baynnaagaara gayttidaagan alamiya hanotay yaa iiti iiti bees.” b Daro biittatun xeetu miilooniyan qoodettiya asay koshshiya qumaa demmana danddayenna. Hegaappe denddidaagan he asaappe daroy hayqqiyogee azzanttiyaba.
“Amara parai kiyidaagaa be7aas; qassi he paraa toggidaagee ba kushiyan meezaanaa oiqqiis.” (Ajjuutaa 6:5) Ha hiraagan odettida leemiso paraynne A toggidaagee ha wurssetta gallassatun deˈiya koshaa bessees. c Paraa toggidaagaa kushiyan deˈiya meezaanay kattaa meezaanidi gishiyogaa bessiyaba. He paraaway toggidaashin, issi cenggurssay kattaa waagay keehi gujjanaagaanne asay kattaa qoraphphana koshshiyogaa yootiis. (Ajjuutaa 6:6) Hagee, biilooniyan qoodettiya asay bollawu goˈˈiya qumaa demmana woy shammana danddayenna, ubbasan kattay qaxuwatiyo nu wodiya loytti qonccissiyaba.
Koshay waanidi xayanee?
Biittay ha saˈan deˈiya asawu gididi palahiya kattaa mokissiyogaa eranchchati yootoosona. Yaatin, kattay qaxuwatanaadan oottidabay aybee? Nuna Medhdhidaagee, Yihooway d ha metuwa qaaranawu ay oottanaagaa Geeshsha Maxaafay yootii?
Metuwa: Kawotettati asay namisettanaadan oottiya hiyyeesatettaanne pirdda pacaa xayssana danddayokkona.
Metoy qaarettiyo ogiya: Polo gidenna asaa kawotettay xayin polo, gidida Xoossaa kawotettay haarana. (Daaneela 2:44; Maatiyosa 6:10) Ha wodiyan, hiyyeesa gidida daro asay qumaa shammanawu keehi metootees, shin Xoossaa Kawotettan hegee laamettana. Geeshsha Maxaafay Xoossaa Kawotettaa Kawo gidida Yesuus Kiristtoosabaa hagaadan gees: “A xeesiya hiyyeesata, naaqettidaageetanne maaddiyaabi bainnaageeta i ashshees. . . . Biittan daro kattai mokko; dereti kattan kamettona.”—Mazamure 72:12, 16.
Metuwa: Olay bashshaanne miishshaa metuwa kaalettees; hegaappe denddidaagan asay koshshiya qumaa demmanawu metootees.
Metoy qaarettiyo ogiya: “[Yihooway] sa7aa gaxaa gakkanaassi de7iya olaa teqqees; wonddafiyaa menttees; tooraa kinchchees; gonddalliyaakka taman xuuggees.” (Mazamure 46:9) Xoossay olaa miishshatanne olawu gaaso gidida asata xayssana. Hegaappe denddidaagan ubba asay metootennan qumaa demmana. Geeshsha Maxaafay hagaadan gees: “Xillotettai daayo; . . . sarotettai daro.”—Mazamure 72:7.
Metuwa: Iita carkkuwa hanotaynne meretay gattiyo daafabay kattay qohettanaadaaninne mehee hayqqanaadan oottees.
Metoy qaarettiyo ogiya: Xoossay kattay loytti mokkanaadan oottiya ogiyan, ha saˈaa carkkuwa hanotaa giigissana. Geeshsha Maxaafay hagaadan gees: “[Yihooway] gotiyaa co77u oottiis; abbaa dambbalaakka sirphphi oottiis. . . . I mela bazzuwan haattai eellanaadan, qassi mela biittan pulttoi xuuqqanaadan oottiis. Namisettidaageeta he sohuwan wottiis; . . . Eti bantta goshshan zeridi, woiniyaa tokkidi, daro murutaa shiishshidosona.”—Mazamure 107:29, 35-37.
Metuwa: Yaaretiyanne bessennabaa oottiya asati bollaa qohiya kattaa zeroosona woy kattay koshshiyo asawu gakkennaadan oottoosona.
Metoy qaarettiyo ogiya: Ammanettennanne bessennabaa oottiya asaa ubbaa Xoossaa Kawotettay xayssana. (Mazamure 37:10, 11; Isiyaasa 61:8) Geeshsha Maxaafay Xoossaa Yihooway “naaqettidaageetau pirddiyaagaa; namisettidaageetau qumaa immiyaagaa” gidiyogaa yootees.—Mazamure 146:7.
Metuwa: Alamiyan deˈiya kattay heezzaappe issi kushee coo moorettees woy xayees.
Metoy qaarettiyo ogiya: Xoossaa Kawotettaa haaruwan, aawatettay deˈiyogeeti ubba asay kattaa bessiya ogiyan demmanaadan oottana. Yesuusi saˈan deˈiyo wode, qumay coo moorettennaadan oottiis. Leemisuwawu, I issi wode 5,000ppe dariya asaa malaaliya ogiyan qumaa miziis. Guyyeppe, I bana kaalliyageeta, “Issibaikka moorettenna mala, attida xarzzaa shiishshite” giidi azaziis.—Yohaannisa 6:5-13.
Xoossaa Kawotettay asay namisettanaadan oottiya waanna gaasuwa xayssiyo gishshawu, ubba asawu bollawu goˈˈiya loˈˈo qumay kumi palahana. (Isiyaasa 25:6) Xoossaa Kawotettay hegaa oottanay awudekko eranawu, “Xoossaa Kawotettay Saˈaa Awude Haaranee?” giya huuphe yohuwa xeella.
a 2030wu Ammanttiya Dichchaa, 2015n Kawotettatu Issippetettaa Yara Biittati ubbay maayettidoogaa.
b Kawotettatu Issippetettaa Qumaanne Goshshaa Dirijjitee, Kumetta Saˈaa Goshshaa Dichchaa Fanddee, Kawotettatu Issippetettaa Naatu Fanddee, Kawotettatu Issippetettaa Alamiya Qumaa Prograamee, qassi Alamiya Payyatettaa Dirijjitee issippe kessido irpporttiya.
c Ajjuutaa maxaafan odettida oyddu para asatubaa gujjada eranawu, “Oyddu Paraasata—Eti Oonee?” giya huuphe yohuwa nabbaba.
d Yihoowa giyogee Xoossawu buzo sunttaa. (Mazamure 83:18, NW) “Yihooway Oonee?” giya huuphe yohuwa nabbaba.
Hageeta Beˈadii?
GEESHSHA MAXAAFAABAA OYCHCHIYOOBATU ZAARUWAA
‘Wurssettaa Gallassaa,’ Woy ‘Wodiyaa Wurssettaa’ Malaatay Aybee?
Wurssettaa gallassaa shaakki erissiya darobati bolli bollan hananaagaa Geeshsha Maxaafay kasetidi yootiis.
