Kumetta saˈan carkkoy keehi suullidoogee Isiine 2022n oduwan kiyiis:

•   “CHayna biittan deˈiya 70 katamatun carkkoy wolqqaama hanotan suullanaagee odettiis. Qassi asay naagettana mala kawotettaa sunttati ha aginan naaˈˈanttuwaa hegaa yootidosona.”—Isiine 25, 2022, CNN Wayer Servis.

•   “Kumetta Awurooppan kaseegaappe dumma hanotan carkkoy keehi suullido gishshawu daro biittan woraa tamay dariis.”—Isiine 17, 2022, Ze Gardiyan.

•   “Woggaa gallassi Amarkkan daro katamatun carkkoy dumma hanotan keehi suulliis. Qassi suuloy Arshsho abbaa doonaa heerata gujjin Tohossaaninne giddo Arggo baggan keehi daridoogee odettiis.”—Isiine 24, 2022, Ze Niwu York Taymis.

 Ha ubbabay ay bessii? Amarida wodeppe simmin saˈan deˈanawu danddayettenna giyoogee? Geeshsha Maxaafay woygii?

 Ee. Kumetta saˈan carkkoy suulliyoogee nu wodiyaa xeelliyaagan Geeshsha Maxaafay yootiyoobaara maayettees. Leemisuwawu, “yashissiyaabainne gita malaatai” hananaagaa Yesuusi hiraagiis. (Luqaasa 21:11) Kumetta saˈan carkkoy keehi suulliyoogee asay oottiyoobaa gaasuwan sinttappe saˈay deˈanawu danddayenna soho gidana giidi daro asay hirgganaadan oottiis.

 Akkay. Xoossay saˈaa medhdhidoy merinawu asay deˈiyo soho gidanaadaana. (Mazamure 115:16; Eranchchaa 1:4) I saˈaa asay xayssanaadan paqqadenna. Yaatiyoogaappe ‘sa7aa xaissiyaageeta’ xayssanawu qaalaa geliis.—Ajjuutaa 11:18.

 Xoossay qaalaa gelido naaˈˈu hiraagata ane beˈa:

•   “Bazzoinne mela biittai ufaittana; bazzoi ufaissaa poocu giiddi, ciishshaa ciyyana.” (Isiyaasa 35:1) Xoossay saˈay aybinne baynna bazzo gidanaadan paqqadenna. Qassi I saˈan moorettida baggaa giigissana.

•   “Neeni biittaa naagada haattaa ushshaasa; yaatada daro dureyaasa. Asaayyo kattai mokkana mala, Xoossaa shaafai haattai kumidoogaa; hegaadan oottada neeni giigissadasa.” (Mazamure 65:9) Xoossay saˈay gannate gidanaadan oottana.

 Carkkoy laamettiyo hanotaa xeelliyaagan Geeshsha Maxaafaa hiraagaabaa gujjada eranawu, “Carkkuwaa Hanotay Laamettiyoogee Nuna Xayssanee?—Geeshsha Maxaafay Woygii?” giya huuphe yohuwaa nabbaba.

 Saˈay ooraxxanaagaa xeelliyaagan odettida hiraagaabaa gujjada eranawu, “Saˈaa Ashshanay Oonee?” giya huuphe yohuwaa nabbaba.