Kumetta Saꞌan Haattay Qaxuwatiyogaabaa Geeshsha Maxaafay Woygii?
Deꞌuwan deꞌanawu nu ubbaassi geeshsha haattay koshshees. Gidikkonne, Kawotettatu Issippetettaa Waanna Xaafee Antoniyo Gutereezi, “Kumetta alamiyan geeshsha haattaa koyiya asay keehi darido gishshawu, haattaara gayttida metoy keehi dariis” yaagiis. Kumetta alamiyan biilooniyan qoodettiya asay uyiyo geeshsha haattaa demmenna.
Strdel/AFP via Getty Images
Nuuni nu ubbawu gidiya geeshsha haattaa demmana wodee yaaneeyye, geeshsha haattaa demmanawu ubbatoo metootiiddi daanee? Geeshsha Maxaafay woygii?
Haattaara gayttidaagan Geeshsha Maxaafay yootiyobaa
Haattaara gayttida metoy issi galla xayanaagaa Geeshsha Maxaafay yootees. Uyiyo xillo haattay ubbasan deꞌanaagaa I yootees.
“Bazzon haattai melosan pulttoi xuuqqana. Xuuggiya shafee dagattida haatta gidana; mela biittai haattaa pulttana.”—Isiyaasa 35:6, 7.
Geeshsha Maxaafay yootiyobaa nuuni ammanana danddayiyoy aybissee? Ha saꞌay waani giigidaakko Geeshsha Maxaafay yootiyobaa ane beꞌoos.
Saꞌaabaanne haattaara gayttidaagan simmi simmi haniyabaa Geeshsha Maxaafay woygii?
“GODAI, biittaakka giigissidi oottidaagee, . . . asi de7anaadaanappe attin, biittaa coo medhdhibeenna.”—Isiyaasa 45:18.
Xoossay saꞌaa, deꞌoy deꞌanaadan oottidi medhdhido gishshawu, gidiyagaa keena geeshsha haattay deꞌanaadan oottiyabaa giigissiis.
“Xoossai haattaa sa7aappe pude saluwaa efees; efiidi yan ira kessees. He irai shaaraappe kiyidi, asau daro bukkanaadan oottees.”—Iyyooba 36:27, 28.
Ha qofay Xoossay haattaara gayttidaagan meretan simmi simmi haniyabaanne haattay xayennaadan oottiyabaa giigissidoogaa qonccissees. Haattay biittaappenne abbaappe penttuwan pude bees, shaara kiyees, qassi ira gididi bukkees; hegee asaynne mehee uyanawu haniya xillo haattaa ubbatoo demmanaadan oottees.—Eranchchaa 1:7; Amoxa 5:8.
“Taani intteyyo iraa wodiyan bukissana; biittaikka kattaa darissidi mokkana; dembbaa mittatikka aifiyaa aifana.”—Wogaabaa 26:4.
Xoossay goshshaa goyiya beni Israaꞌeelatuyyo wodiyan iraa bukissidi loꞌꞌo ayfiya demmanaadan oottiyogan eta anjjanawu qaalaa geliis. Kattay loꞌꞌo ayfiya ayfanaadan, iray wodiyan bukkana koshshiyogaa I erees.
Xoossay beni Israaꞌeelatussi oottidobaa mata wode kumetta saꞌan oottana. (Isiyaasa 30:23) He wodee gakkanaashin, darosan haattay metiyogee gujji gujji bees, qassi hegawu issi gaasoy iray xayiyogaa. Ha wodiyan deꞌiya haattaa metoy giiganaagaa xeelliyagan harabaa Geeshsha Maxaafay ay yootii?
Haattaa metoy waani xayanee?
Ha wodiyan haattay qaxuwatiyogaa gujjin, ha saꞌaa qohiiddi deꞌiya metota Xoossay ba Kawotettaa baggaara xayssanaagaa Geeshsha Maxaafay yootees. (Maatiyosa 6:9, 10) Xoossaa Kawotettay saꞌaa haarana saluwan deꞌiya ayso. (Daaneela 2:44; Ajjuutaa 11:15) Hegaa bollikka, Xoossaa Kawotettay haattay qaxuwatanaadan oottida metuwa xayssiyogaa gujjin, asaa kawotettay oottana danddayennabaa oottana.
Metuwa: Carkkuwa hanotay laamettiyogee haattaara gayttida metoy daranaadan oottiis. Hegee iray xayanaadaaninne daro iray bukkiyogaa woy abbaa yesoy gujjiyogaa gaasuwan diꞌoy wolqqaamanaadan oottiis.
Qaarettiyo Ogiya: Xoossaa Kawotettay ha saꞌay zaarettidi giiganaadan, heeraa carkkoy moorettanaadan oottidabaa xayssana. Xoossay, “Taani ubbabaa ooraxissais” yaagiis. (Ajjuutaa 21:5) Mela biittan daro haattay deꞌana, hegee ha wodiyan asi deꞌana danddayenna sohoy deꞌiyosa gidanaadan oottana. (Isiyaasa 41:17-20) Yesuus Kiristtoosi kawo gidido Xoossaa Kawotettay, ha saꞌan deꞌiya meretaa wolqqaa haarana.
Yesuusi saꞌan deꞌiyo wode wolqqaama gotiya woppu oottidi, Xoossay ayyo immido wolqqaa guuttan bessiis. (Marqqoosa 4:39, 41) Kiristtoosi Xoossaa Kawotettaa Kawo gididi haariyo wode, meretay gattiyo daafabay xayana. Asay ayba daafabawukka yayyennan, tumu sarotettaaninne woppan deꞌana.
Metuwa: Eti oottiyobay kaalettiyo qohuwa qoppenna asatinne etaara hashetiya yaaretiyageeti shaafaa, abbaanne biitta giddo haattaa mooriyogee geeshsha haattay qaxuwatanaadan oottees.
Qaarettiyo Ogiya: Xoossay saꞌaa geeshshana, qassi qohettida shaafaa, qeeri abbaa, ano abbaanne biittaa kase sohuwawu zaaridi giiga oottana. Saꞌay gannate gidana. Geeshsha Maxaafay hagaadan giidi ufayssiya ogiyan yootees: “Bazzoinne mela biittai ufaittana; bazzoi ufaissaa poocu giiddi, ciishshaa ciyyana.”—Isiyaasa 35:1.
Heeraa carkkuwabay woy haratubay qofissenna asata aybi gakkanee? Xoossay ‘saꞌaa xayssiyageeta xayssanawu’ qaalaa geliis.—Ajjuutaa 11:18; Leemiso 2:21, 22.
Metuwa: Asay haattaa bessenna ogiyan goꞌettiyo gishshawu, moorettiya haattay saꞌan deꞌiya haattaappe daro.
Qaarettiyo Ogiya: Xoossaa Kawotettay bantta xallaa siiqiya asaa shenee gidennan, Xoossaa ‘shenee saꞌan hananaadan’ oottana. (Maatiyosa 6:9, 10) Xoossaa Kawotettay bawu haarettiyageeta aybippenne aadhdhiya timirttiya tamaarissana. Isiyaasa 11:9y, “Sa7ai [Yihoowa] eriyoogan kumana” yaagees. a He eray, qassi Xoossaanne I medhdhidobata minttidi siiqiyogee, asay ubbay keehi loꞌꞌiya saꞌaanne an deꞌiyabata qohuwappe naaganaadan oottana.
Xoossaa Kawotettay ay oottanaakko gujjada eranawu, “Xoossaa Kawotettay Ay Oottanee?” giya huuphe yohuwa nabbaba.
Geeshsha Maxaafan Isiyaasa maxaafaa shemppo 35 dooyada, saꞌay waanidi gannate gidanaakko neeyyo nabbaba.
Xoossay saꞌawunne asawu halchchidobaa gujjada eranawu, Xoossay Saꞌaa Medhdhidoy Aybissee? giya biiduwa beꞌa.
a Yihoowa giyogee Xoossawu buzo suntta. (Mazamure 83:18, NW) “Yihooway Oonee?” giya huuphe yohuwa nabbaba.
Hageeta Beꞌadii?
NAAGI UTTITE!
Iray Bukkenna Adussa Iita Wodeta—Geeshsha Maxaafay Woygii?
Ha kumetta saꞌaa gakkida metoy xayana danddayii? Sinttanawu ayba hidooti deꞌii?
NUBAA
Geeshsha Maxaafaa Tamaaranawu Oychcha
Geeshsha Maxaafaabaa woy Yihoowa Markkatubaa loytta erana.
