Loꞌꞌo kanddoy xayiiddi deꞌees. Loꞌꞌo eeshshay baynna hargganchchati aakimetu bolli hanqqettidi haasayoosona; quma keettan qumaa miya harata bonchchenna asati yan oottiyageetu bolli canccoosona; horophphilliyan manddariya azazettenna asati horophphille giddon oottiyageeta qohoosona; makkalanchcha naati bantta asttamaareta qilliiccoosona, yashissoosonanne qohoosona; qassi amarida polotikaa sunttati yeelli baynnabaa oottiyo wode, hara polotikaa sunttati banttawu loꞌꞌo kanddoy deꞌiyogaa qonccissanawu baaxetoosona.

 Geeshsha Maxaafay tumuppe loꞌꞌo kanddoy aybakko eranawu maaddiya ammanttiya kaaletuwa yootees. Qassi ha wodiyan loꞌꞌo kanddoy xayidoy aybissakkokka qonccissees.

 Loꞌꞌo kanddoy, hegeekka asay dosiyo loꞌꞌo eeshshay kumetta saꞌan xayiiddi deꞌiyogee qoncce.

•   Amarkkan issi xinaatiyan asaa oychchidobay bessiyogaadan, Amarkkan deꞌiya asay kandduwa maaraa aadhdhida 22 layttaa giddon hanidaagaappe aaruwan ha wodiyan keehi ziqqi ootti xeelliyogaa yan deꞌiyageeti ammanoosona.

•   Hara xinaatiyan, 28 biittatun 32,000​ppe dariya asata oychchidoban 65 kushe gidiyageeti, loꞌꞌo kanddoy deꞌiyo asay ha wodiyan awudeegaappe aaruwan keehi guuxxidoogaa yootidosona.

 Geeshsha Maxaafay ha wodiya asaa eeshshaabaa kasetidi yootiis.

•   “SHin wurssetta gallassi waissiya wodee yaanaagaa akeeka. Aissi giikko, asati banttana siiqiyaageeta, miishshaa siiqiyaageeta, ceeqettiyaageeta, ayyiyaageeta, cayiyaageeta, banttana yelidaageetuyyo azazettennaageeta, galatennaageeta, . . . kehennaageeta, [qassi] lo77obaa dosennaageeta.”—2 Ximootiyoosa 3:1-3.

 Ha hiraagay waani polettiiddi deꞌiyakko gujjada eranawu, “Nu Wodiyan Deꞌiya Asaa Eeshshaabaanne Hanotaabaa Geeshsha Maxaafay Kasetidi Yootii?” giya huuphe yohuwa nabbaba.

 Loꞌꞌo kanddoy xayiiddi deꞌiyo ha alamiyan, Geeshsha Maxaafay loꞌꞌo eeshshay deꞌanaadan maaddiya kaaletuwa yootiyogaa miilooniyan qoodettiyageeti akeekidosona. Kandduwa xeelliyagan I zoriyobay ‘haꞌꞌikka, meri merinawukka ammanttiyagaa.’ (Mazamure 111:8) Amarida leemisota beꞌa:

•   Geeshsha Maxaafay yootiyobaa: “Asay intteyyo oottanaadan intte koyiyo ubbabaa inttekka etayyo oottana bessees.”—Maatiyosa 7:12.

   Hegaa birshshettaa: Nuuni harati nuna oyqqanaadan koyiyo ogiyan kehatettaaninne bonchchuwan harata oyqqana bessees.

•   Geeshsha Maxaafay yootiyobaa: “Simmi worddotoppite. . . . Asai ubbai ba ishau tumaa haasayanau bessees.”—Efisoona 4:25.

   Hegaa birshshettaa: Nuuni haasayiyonne oottiyo ubbaban ammanettiyageeta gidana koshshees.

 Ha huuphe yohuwara gayttidabaa gujjada eranawu, hayyanaa kaallidi deꞌiyageeta nabbaba:

•   “Likkebaanne Balabaa—Ammanttiya Kaaletuwa” giya Wochchiyo Keelaa.

•   “Danddayanchcha Gidanaadan Geeshsha Maxaafay Waati Maaddii?” giya huuphe yohuwa.