Qeeraa, Hosppune 13, 2024n Iraanee Israaꞌeela biittaa qohidoogaa xeelliyagan, Kawotettatu Issippetettaa Waanna Xaafee Anttoniyo Gutereezi hagaadan giis: “Ha wodee hanotaa zarbbissiyonne irxxissiyo wode. Ha wodee nu koshshaa teqqiyo wode.”

 Giddon Arshshon deꞌiya olay kumetta saꞌan haniiddi deꞌiyabaappe issuwa.

 “Naaꞌꞌantto Alamiya Olaappe doommidi kumetta saꞌan daro olay denddiis; qassi 2 biiloone asay, hegeekka alamiya asaappe missa gidiyagee qohettiis.”—Kawotettatu Issippetettaa Sarotettaa Naaguwa Zoreta Keettaa, Ichchashe 26, 2023.

 Israaꞌeelee, Gaazi, Sooree, Azerbajaanee, Yukireenee, Suudaanee, Toophphee, Nijeree, Miyanmaareenne Heyti olay deꞌiyo heerata. a

 Olay eqqiyo wodee yaanee? Alamiya kawotettan haariyageeti sarotettaa ehaana danddayiyonaa? Geeshsha Maxaafay woygii?

 Ha wodiyan alamiyan deꞌiya olay, ubba olay muleera xayiyo wodee matidoogaa bessees. Ha wodiyan deꞌiya olay Geeshsha Maxaafay nu wodiyabaa yootido hiraagay polettanaadan oottees. Geeshsha Maxaafay nu wodiya, ‘wodiya wurssettaa’ yaagees.—Maatiyosa 24:3.

•   “Intte matasankka haahosankka denddiya olaabaa siyana. . . . Deree deriya bolli, qassi kawotettay kawotettaa bolli denddana.”—Maatiyosa 24:6, 7.

 Ha wodiyan deꞌiya olay Geeshsha Maxaafaa hiraagay polettanaadan waati oottiyakko eranawu, “‘Wurssettaa Gallassaa,’ Woy ‘Wodiyaa Wurssettaa’ Malaatay Aybee?” giya huuphe yohuwa nabbaba.

 Geeshsha Maxaafan asay olettiyogee attanaagee kasetidi odettiis. Hegee waani hananee? Hegee hananay asay oottiyobaana gidennan, “Ubbaappe Wolqqaama Xoossaa gita [gallassaa]” olaana, hegeekka Armmageedoonaana. (Ajjuutaa 16:14, 16) Ha olay asay merinawu sarotettan deꞌanaadan Xoossay gelido qaalay polettanaadan oottana.—Mazamure 37:10, 11, 29.

 Ola ubbaa xayssiya Xoossaa olaabaa gujjada eranawu, “Armmageedoona Olay Aybee?” giya huuphe yohuwa nabbaba.