NAAGI UTTITE!
Polotikaa Gaasuwan Denddiya Makkalaa—Geeshsha Maxaafay Woygii?
Polotikaa gaasuwan denddiya makkalay kumetta saꞌan asay hirgganaadan oottiiddi deꞌees.
Mekisiikon polotikan doorettanawu annaacettiya 39 asaa woridoogee, qassi hara makkala oosoy asaa daganttiisinne 2023-2024 dooruwa asay doorennaadan xubbiis; he hayqqida asaa qooday awudeegaappenne darees.
Uddufune 15, 2024n Islobaakiya kiike moconaa woranawu malidoogaa gujjin, mata wodeppe doommidi Awurooppan polotikaara gayttidaagan daro makkalay denddiis.
Isiine 13, 2024n, Amarkkaa kase prezddanttiya Donald Tramppa woranawu malidoogee he biittaa asaa keehi daganttiis.
Polotikaara gayttidaagan daro makkalay denddiyoy aybissee? Hegee xayana wodee yaanee? Geeshsha Maxaafay woygii?
Polotikan shaahotettay deꞌanaagee kasetidi odettiis
‘Wurssetta gallassata’ geetettida nu wodiyan, makkalanaadaaninne sigettennaadan oottiya eeshshay daro asawu deꞌanaagaa Geeshsha Maxaafay kasetidi yootiis.
“Wurssetta gallassi waissiya wodee yaanaagaa akeeka. Aissi giikko, asati . . . galatennaageeta, geeshshatetti bainnaageeta, . . . sigettennaageeta, . . . kehennaageeta, . . . kashi erikke giyaageeta, eesotiyaageeta, otoruwan sugettiyaageeta . . . gidana.”—2 Ximootiyoosa 3:1-4.
Asay kawotettaa bolli makkaliyogaanne polotikan woppay xayiyogaa mala shabbirssay ha wodiyan deꞌanaageekka Geeshsha Maxaafan kasetidi odettiis. (Luqaasa 21:9) Gidikkokka, polotikaa gaasuwan denddiya makkalaynne shaahotettay muleera xayana.
Polotikaa gaasuwan denddiya makkalay xayiyo wodiya
Xoossay asaa kawotetta ubbaa sohuwan, saluwan deꞌiya ba kawotettaa essanaagaa Geeshsha Maxaafay yootees.
“Saluwaa Xoossai . . . kawotettaa essana. He eqqida kawotettai he [hara] kawotettata ubbaa gaaceretti xaissana; shin i merinau eqqidi daana.”—Daaneela 2:44.
Xoossaa Kawotettay asaa giddon tumu issippetettay, qassi kumetta saꞌan sarotettay deꞌanaadan oottana.
He Kawotettaa Kawoy Yesuus Kiristtoosi, “Sarotettaa Halaqaa” geetettiis, qassi I, ‘sarotettawu zaway deꞌennaadan’ oottana.—Isiyaasa 9:6, 7.
He Kawotettawu haarettiyageeti ha wodiyankka waanidi sarotettan deꞌanaakko tamaariiddi deꞌoosona. Hegaappe denddidaagan haniyabaa Geeshsha Maxaafay hagaadan gees: “Eti bantta bisuwaa marasha, bantta tooraakka baaca kessanau qoxxana. Kawotettai kawotettaa bolli bisuwaa denttenna. Hegaappe guyyiyan eti mulekka olaa timirttiyaa tamaarokkona.”—Isiyaasa 2:3, 4.
Gujjada eranawu, “Xoossaa Kawotettay Sinttappe Ay Oottanee?” giya huuphe yohuwa nabbaba, qassi Xoossaa Kawotettay Aybee? giya biiduwa beꞌa.