Kumetta saˈan, polotikaa gaasuwan daro asay shaahettiis. Piw Riserch Senter geetettiya dirijjitee 2022n xannaˈidobay qonccissiyoogaadan, “xinaatee oosettido 19 biittatun deˈiya gastta asatuppe 65 kushe gidiyaageeti eta biittan deˈiya dumma dumma polotikaa kaafiya asatu giddon wolqqaama shaahotettay deˈiyoogaa yootidosona.”

 Neeni deˈiyo heerankka asay awudeegaappenne aaruwan polotikaa gaasuwan shaahettiyoogaa akeekadii? Hegawu gaasoy aybee? Hegee giigana danddayii? Geeshsha Maxaafay yootiyoobaa akeeka.

 ‘Wurssettaa gallassaa’ geetettiya nu wodiyan, daro asawu deˈiya eeshshay issippetettan deˈiyoogee metanaadan oottanaagaa Geeshsha Maxaafay kasetidi yootiis.

•   “Wurssetta gallassi waissiya wodee yaanaagaa akeeka. Aissi giikko, asati banttana siiqiyaageeta, . . . sigettennaageeta [gidana.]”—2 Ximootiyoosa 3:1-3.

 Daro asay loˈˈo kawotettay deˈanaadan baaxetikkonne, hegee hanana danddayibeenna. Asay qoppiyooban issoy issuwaara maayettennaagee, metuwaa giigissanawu issippetettan oottennaadan diggiis. Hegaa gaasuwaa Geeshsha Maxaafay daro wodiyaappe kase yootiis.

•   “Asi bau de7iya haariyo maataa hara asa qohanau [goˈettees.]”—Eranchchaa 8:9.

 SHin hegee giigana danddayiyo ogiyaabaa, hegeekka asay ha wodiyan waayettanaadan oottiya metota xayssana danddayiya issi uri haarana kawotettaabaa Geeshsha Maxaafay yootees.

 Geeshsha Maxaafay he metota muleera xayssana danddayiya haariya Yesuus Kiristtoosabaa yootees. Asay issippetettaaninne sarotettan deˈanaadan oottanawu Yesuusawu wolqqay, maataynne koshshay deˈees.

•   “I de7iyo laitta ubban xillotettai daayo; . . . sarotettai daro.”—Mazamure 72:7.

•   “Kawotettati ubbai ayyo kiitettona.”—Mazamure 72:11.

 Yesuusi loˈˈo kawo, ayssi giikko I asawu, ubba qassi naaqettidaageetussi qoppeesinne eta maaddanawu koyees.

•   “A xeesiya hiyyeesata, naaqettidaageetanne maaddiyaabi bainnaageeta i ashshees. Hiyyeesatussinne manqqotussi i qarettees; hiyyeesatu shemppuwaa ashshees. Eta naaquwaappenne makkalaappe i wozees.”—Mazamure 72:12-14.

 Yesuusi haariyo Xoossaa Kawotettaabaa gujjada era. He haaroy nena waati maaddiyaakko, qassi he haaruwawu neeni waana exatana danddayiyaakko akeeka.

•   Xoossaa Kawotettay Aybee? giya biiduwaa beˈa.

•   “Xoossaa Kawotettaa—Balibakkoy Baynna Kawotettaa” giya huuphe yohuwaa nabbaba.