Uddufune 24, 2022n, Amarkkan, Teksasen, Yuvalde giyo guutta kataman keehi azzanttiyaabay haniis. Ze Niwu York Taymis giyo maxeetee yootiyoogaadan, “Robbe Koyro Xekkaa Timirtte Keettan, . . . issi naˈay 19 naatanne naaˈˈu asttamaareta tokkosidi woriis.”

 Hegaa mala keehi qohiyaabati darotoo asaa gakkiyoogee azzanttiyaaba. USA Tudey giyo oduwaa dirijjitee yootidoogaadan, Amarkkaa xallan “zillaytti timirtte keettan 249 tokisee tokkosettiis; hegee 1970ppe simmin hanida ay wodeegaappenne aadhdhiyaaba.”

 He keehi yashshiyaabati asaa gakkiyoy aybissee? Hegaa mala danobata waani genccana danddayiyoo? Makkalay xayana giidi ammaniyoogee bessiyaabee? Geeshsha Maxaafay hegaa zaaruwaa yootees.

•    Geeshsha Maxaafay ‘wurssetta gallassa’ giidi qonccissiyo nuuni deˈiyo ha wodiyan daro asati “siiqoi bainnaageeta” qassi, “kehennaageeta” gidana; hegee eti meqettaa iitanne makkalabaa oottoosona giyoogaa. Hegaa mala asati “kaseppe iiti iiti boosona.” (2 Ximootiyoosa 3:1-5, 13) Gujjada eranawu, “Nu Wodiyan Deˈiya Asaa Eeshshaabaanne Hanotaabaa Geeshsha Maxaafay Kasetidi Yootii?” giya huuphe yohuwaa nabbaba.

 Daro asay hagaadan qoppana danddayees: ‘Timirtte keettan tokkosiyoogaa mala, keehi qohiyaabay gakkennaadan Xoossay teqqennay aybissee?’ Geeshsha Maxaafay hegaa woygi zaariyaakko eranawu, “Loˈˈo Asaa Iitabay Gakkees—Aybissi?” giya huuphe yohuwaa nabbaba.

•    “Xoossaa maxaafai nuuyyo immiyo . . . minttettuwan nuuni demmana giidi ufaissan naagi uttidoogee de7ana mala, Xoossaa maxaafan xaafettida ubbabai nuna tamaarissanau xaafettiis.”—Roome 15:4.

 Makkalay kumido ha alamiyan neeni genccanaadan Geeshsha Maxaafay yootiyo maarati maaddana danddayoosona. Gujjada eranawu, “Makkalay Xayanee?” giya Beegottite! maxeetiyaa xeella.

 Yelidaageeti bantta naati oduwan odettiya yashshiyaabaa beˈiyo woy siyiyo wode unˈˈettennaadan maaddanawu waatanaakko maaddiya qofaa demmanawu, “Yashshiya Oduwaanne Intte Naata” giya huuphe yohuwaa nabbaba.

•    “Eta naaquwaappenne makkalaappe i wozees.”—Mazamure 72:14.

•    “Eti bantta bisuwaa marasha, bantta tooraakka baaca kessanau qoxxana; kawotettai kawotettaa bolli bisuwaa denttenna. Hagaappe guyyiyan, eti muleera olaa timirttiyaa tamaarokkona.”—Mikiyaasa 4:3.

 Asay oottana danddayennabaa Xoossay oottana danddayees. Saluwaa Kawotettay ola miishsha ubbaanne makkala ubbaa xayssana. Xoossaa Kawotettay oottanabaa gujjada eranawu, “Xoossaa Kawotettan ‘Sarotettay Darana’” giya huuphe yohuwaa nabbaba.