Veegan Gidiyogaa—Geeshsha Maxaafay Woygii?
Saꞌa ubban, daroti veeganiizime gididi deꞌanawu koyoosona.
“Veeganiizim giyobay danddayettida keenan mehiyanne doꞌaa miyobawu, maayiyobawu, woy harabawu goꞌettennan woy qohennan deꞌiyogaa bessiya qofa.”—Ze Veegan Soosayti.
Issoti issoti mehiyawunne doꞌawu qoppiyo gishsha xalaalawu gidennan, bantta heeraa, bantta payyatettaanne bantta haymaanootiya gishshawu Veegan gidanawu koyoosona.
“Veeganiizimee, ammaniyogaara, kandduwan dooriyogaara, qassi issi uri ha saꞌaa loꞌꞌobawu laammanawu koyiyogaara gayttidaba oottidi asay xeelliyo gishshawu, qumaa lagiyo hara hanotaappe dummatiyaba.”—Britanika Akademik.
Veeganiizimee ha saꞌaa metuwa qaariyabee? Geeshsha Maxaafay woygii?
Nuna Medhdhidaagee asaanne mehiya waati xeellii?
Nuna Medhdhida Xoossaa Yihooway, a asaa mehiyappe xoqqu ootti xeellees, qassi asay eta haaranaadan maataa immiis. (Doomettaabaa 1:27, 28) Xoossay guyyeppe, asay mehiya ashuwa maanaadan paqqadiis. (Doomettaabaa 9:3) Gidikkonne, Xoossay mehiya asay qohanaadan koyenna.—Leemiso 12:10.
Ashuwa miyogee woy aggiyogee nu kuushsha gidiyogaa Geeshsha Maxaafay yootees. b Nu kuushshay Xoossay nuna haratuppe aatti xeellanaadan oottenna. (1 Qoronttoosa 8:8) Issi uri maanawu dooridobaa gaasuwan ooninne he ura borana bessenna.—Roome 14:3.
Sinttappe yaana loꞌꞌo wodiyawu kaalettiya ogiya
Nuuni deꞌanawu dooriyo hanotay ha alamiya metuwa qaarennaagaa Geeshsha Maxaafay qonccissees. Ha alamiyan polotikaara, deretettaaranne miishshaara gayttida daro metoy asi giigissana danddayennaba. Geeshsha Maxaafay hagaadan gees:
“Geellai sittanau danddayenna.”—Eranchchaa 1:15.
Nuna gakkiya metuwa qaaranay nuna Medhdhidaagaa. I oottanabaa Geeshsha Maxaafay leemisuwan qonccissees.
“Hegaappe guyyiyan, taani ooratta saluwaanne ooratta sa7aa be7aas. Koiro saloinne koiro sa7ai xayiis. Abbaikka xayiis.”—Ajjuutaa 21:1.
Xoossay asa kawotettaa, woy ‘koyro saluwa,’ ‘ooratta saluwan’ woy saluwa kawotettan laammana. A Kawotettay ‘koyro saꞌaa,’ hegeekka iitata xayssana; qassi “ooratta sa7aa”, woy bantta dosan ayyo haarettiyageeta haarana.
Asay bali baynna hanotan, mehiyaranne bantta heeraara maayettidi deꞌanay Xoossaa Kawotettaa haaruwana.—Isiyaasa 11:6-9.
a Yihoowa giyogee Xoossawu buzo sunttaa. (Mazamure 83:18, NW)
b Geeshsha Maxaafay nuuni ‘suuttaappe’ haakkanaadan azazees. (Oosuwaa 15:28, 29) Hegaa giyogee, nuuni suuttaa uyana woy suuttay gukkibeenna ashuwa maana koshshenna; woykko suuttaara kaꞌida ay qumanne maana bessenna.
Hageeta Beꞌadii?
GEESHSHA MAXAAFAN DEꞌIYA WAANNA TIMIRTTETA
Xoossay Saꞌaa Medhdhidoy Aybissee?
Nuuni deꞌiyo alamee loꞌꞌiyaaban kumiis. I saꞌay awa ayfiyaappe haakkidi deꞌiyoosaanne yuuyiyo eesuwaa likkiyaa koshshiyaagaadan oottiis. Xoossay saꞌaa medhdhanawu hegaa keena daafuridoy aybisee?
GEESHSHA MAXAAFAA TIMIRTTETA
Geeshsha Maxaafaa xannaꞌiyo prograamiyaa
Issi uraara Geeshsha Maxaafaa xannaꞌa.
