Alame Bankkiyaa Citaa pirezddanttee Tamme 2022 irpporttiyan, “Alamiyaa ikkonoome zaarettidi keehi iitiis” yaagidi yootiis. “Ubbabaa waagay eesuwan gujji gujji bees; qassi deꞌuwawu koshshiyaabaa shammiyo miishshay asaswu keehi guutta.”

 “Nadaajiyaanne qumaa waagay keehi alꞌꞌidoogee hiyyeesa biittatun deꞌiya asay keehi qohettanaadan oottidoogaa” Alamiyaa Miishshaa Eqotay akeekiis.

 Hegaa mala ikkonoomiyaa metoy nuna aybissi gakkiyaakko, nuuni hegaa waanidi genccana danddayiyaakko, qassi hegee merinawu waani giiganaakko nuuni akeekanaadan Geeshsha Maxaafay maaddees.

•    Geeshsha Maxaafay nuuni deꞌiyo wodiyaa ‘wurssetta gallassa’ yaagees.—2 Ximootiyoosa 3:1.

•    Ha wodiyan ‘yashissiyaabay’ woy daganttiyaabay hananaagaa Yesuusi yootiis. (Luqaasa 21:11) Ubbabaa waagay keehi alꞌꞌiyo wode asay keehi yayyees. Asay sinttanaabaanne bantta so asawu koshshiyaabaa kunttiyoogaa xeelliyaagan keehi hirggees.

•    Ha wodiyan kattaa waagay keehi alꞌꞌanaagaa Ajjuutaa maxaafay kasetidi yootiis. “Taani . . . cenggurssa milatiyaabaa siyaas, He cenggurssai, ‘Issi gallassa oosuwaayyo damoozai issi guruure gistte; qassi issi gallassa oosuwaayyo damoozai heezzu guruure bangga’ yaagishin siyaas.”—Ajjuutaa 6:6.

 ‘Wurssettaa gallassaabaanne’ Ajjuutaa maxaafan odettida hiraagaa xeelliyaagan gujjada eranawu Alamee 1914ppe Doommidi Laamettiis giyaa biiduwaa xeella; qassi “Oyddu Paraasata—Eti Oonee?” giya huuphe yohuwaa nabbaba.

•    “He wodetun asati keettata keexxidi, etan de7ana; woiniyaa turatakka tokkidi, eta aifiyaa maana. Eti keexxin, harai de7enna; harai maanau tokkiyoobaa tokkokkona.”—Isiyaasa 65:21, 22.

•    “Biittan daro kattai mokko; dereti kattan kamettona.”—Mazamure 72:16.

•    “[Yihooway, NW] ‘Hiyyeesati un77ettido gishshaunne, metootanchchatu ooliyaa gishshau, ha77i taani denddana.’ yaagees.”—Mazamure 12:5. a

 Xoossay mata wode issi biittaappe xalla gidennan, kumetta saꞌaappe ikkonoomiyaa metuwaa ubbaa xayssana. Hegee waani hananaakko eranawu, “Ubbaykka Ikkonoomiyan Issi Mala Gidiyo Wode Yaanee?” giya huuphe yohuwaa nabbaba.

 Ubbabaa waagay gujjido ha wodiyankka hegaa genccanaadan Geeshsha Maxaafay nena maaddana danddayees. Ayba ogiyan? Miishsha akeekan waata goꞌettana danddayiyaakko maaddiya zoriyaa Geeshsha Maxaafay yootees. (Leemiso 23:4, 5; Eranchchaa 7:12) Hegaabaa gujjada eranawu, “Ne Aquwaa Naaga” giyaagaanne “Guutta Miishshan Deꞌana Danddayiyo Ogiyaa” giya huuphe yohota nabbaba.