Kumetta saˈan, wolqqaama diˈoy daro asaa qohiiddi deˈees. Ha irpportteta beˈa:

•   “Amarida gallassaappe kase, Chaynaa waanna kataman, 744.8 miili metire gidiya iray Qeeraappe Oruwa gakkanawu bukkiis; 140 layttaa giddon hegaa mala wolqqaama iray bukki erenna.”—AP Oduwa, Naase 2, 2023.

•   “Hamuusa gallassay, Kanun giyo wolqqaama gotee tohossa Jaappaanen iray soosidi bukkanaadaaninne yashshiya carkkoy carkkanaadan oottido naaˈˈantto gallassa; hegaappe denddidaagan guuxxiis giishin naaˈˈu asay hayqqiis. . . . Gotee, deretiya giddo Taywaanen, 0.6 metire gakkanawu wolqqaama iray bukkanaadan oottana danddayees geetettidi qofettees.”—Dochche Velle, Naase 3, 2023.

•   “Aadhdhida Qeeraanne Woggaa, [Nova Iskoshiya biittan] diˈoy diˈanaadan oottida wolqqaama iray bukkidi, Kanaadan, Atilanttike ano abbaa doonan deˈiya heerata keehi qohiis; 50 layttaa giddon hegaa mala iray bukki erenna.”—BBC Oduwa, Isiine 24, 2023.

 Hegaa mala hanotatubaa Geeshsha Maxaafay woygii?

 Geeshsha Maxaafay nuuni deˈiyoy ‘wurssetta gallassatuuna’ gidiyogaa qonccissees. (2 Ximootiyoosa 3:1) Nuuni ‘yashshiyabata’ woy shabbirssiyabata beˈanaagaa Yesuusi kasetidi yootiis. (Luqaasa 21:11) Carkkuwa hanotaa laamee carkkuwa hanotay ubbatoo kaseegaappe yaa iiti iiti baanaadaaninne qoppennan wolqqaama qohoy gakkanaadan oottiiddi deˈees.

 Ha wodiyan saˈan polettiiddi deˈiya yashshiya darobay nuussi hidootay deˈanaadan oottiyaba gidiyogaa Geeshsha Maxaafay yootees. Aybissi? Yesuusi hagaadan giis: “Intte hegee haniyoogaa be7iyo wode, Xoossaa kawotettai gakkana matattidoogaa erana.”—Luqaasa 21:31; Maatiyosa 24:3.

 Ha wodiyan haniyabay, Xoossaa Kawotettay haattaara gayttidabaa gujjin, saˈan deˈiya mereta ubbaa mata wode giiga oottanaagaa bessees.—Iyyooba 36:27, 28; Mazamure 107:29.

 Xoossaa Kawotettay saˈaa giiga soho oottanay ayba ogiyanakko gujjada eranawu, “Ha Saˈaa Ashshanay Oonee?” giya huuphe yohuwa nabbaba.