Xiqimita 9, 2024n, Alamiya Woraa Doꞌatu Fanddee asay oottiyobay woraa doꞌata ay keena qohiyakko qonccissiya keehi daganttiya irppottiya kessiis. He irpporttee, “aadhdhida 50 layttaa giddon (1970-2020), woraa doꞌatu amakkaaye yesoy 73% guuxxidoogaa” qonccissiis. Gujjidikka, hagaadan giis: “Kaalliya ichchashu layttaa giddon haniyabay saꞌan paxa deꞌiyabata keehi qohana giyogee coo odo gidenna.”

 Ha irpporttee darota daganttidoogee bessiyaba. Nuuni loꞌꞌiya ha saꞌaa keehi siiqoos, qassi woraa doꞌati qohettishin beꞌanawu koyokko. Nuuyyo hegaadan siyettiyoy Xoossay nuuni medoosatuyyo koshshiyabaa kunttanaadan oottidi nuna medhdhido gishshataassa.—Doomettaabaa 1:27, 28; Leemiso 12:10.

 Yaaniyo gishshawu, hagaadan qoppana danddayoos: ‘Nuuni woraa doꞌata qohuwappe naagana danddayiyoo? Geeshsha Maxaafay Woygii?’

 Nuuni woraa doꞌata qohuwappe naaganawu ay keena baaxetiyaba gidikkokka, tumuppe yaatana danddayiyay nuna gidennan Xoossaa xalaala. Geeshsha Maxaafay Ajjuutaa 11:18n yootiyogaadan, Xoossay ‘saꞌaa xayssiyageeta xayssana.’ Ha xiqisiyappe naaꞌꞌubaa tamaaroos:

1.  1. Asay saꞌaa muleera bashshennaadan woy xayssennaadan Xoossay teqqana.

2.  2. Xoossay matan issibaa oottana. Hegaa aybin eriyoo? Asaa naati ha wodiyan awudeegaappenne aaruwan woraa doꞌati xayanaadan oottiiddi deꞌoosona.

 Xoossay ha metuwa pagalanawu ay oottanee? I ba saluwa haaroy woy Kawotettay kumetta saꞌaa haaranaadan oottana. (Maatiyosa 6:10) He haaroy azazettiya asay woraa doꞌatuyyo koshshiyabaa kunttanawunne qohuwappe naaganawu oottana bessiyabaa tamaarissananne loohissana.—Isiyaasa 11:9.