Yesuusi danobaynne naaqoy ay keena waayissiyabakko erees. A wordduwan mootidosona, shocidosona, danobaa oottidabadan shilootan essidosona, worddobaa pirddidosonanne barchcheyidi woridosona. I aynne mooribeennaba gidikkonne, ba dosaaninne ba xallaa siiqennan “darota wozanawu qanxxiyoba oottidi ba shemppuwa [immiis].” (Maatiyosa 20:28; Yohaannisa 15:13) I ha wodiyan Xoossaa Kawotettaa Kawo gidiyo gishshawu, matan danobaa muleera xayssiyogan kumetta alamiyan suure pirdday deꞌanaadan oottana.—Isiyaasa 42:3.

 Yesuusi tangguwa ekki simmin, ha saꞌan hanotay ay mala gidanaakko Geeshsha Maxaafay hagaadan gees:

•   “Iitaa oottiyaageeti . . . de7okkona; neeni eta koyiyaakkokka eti beettokkona. SHin ashkketi biittaa laattana; eti sarotettaaninne duretettaani ufaittidi daana.”—Mazamure 37:10, 11.

 Yesuusi nuuyyo kase oottidonne mata wode oottana ubbabaa gishshawu galatiyogaa waati bessana danddayiyoo? Yesuusi Luqaasa 22:19n, bana kaalliyageeti A hayquwa hassayanaadan yootiis. Yihoowa Markkati layttan layttan A hayquwa hassayanawu issippe shiiqiyoy hegaassa. Yesuusa Hayquwa Hassayuwa Baalaa bonchchanawu Woggaa, Laappune 15, 2016 M.Ln (Laappune 24, 2024n) nunaara shiiqanaadan nena shoobboos.

Hassayuwa Baalaa Bonchchiyo Sohuwa