1. Nuussi deꞌuwaa immiday oonee?

 YIHOOWAY ‘deꞌo Xoossaa.’ (Ermmaasa 10:10) I nuna Medhidaagaanne nuuyyo deꞌuwaa immidaagaa. Geeshsha Maxaafay, “Ubbabaa neeni medhdhadasa; qassi ubbabaikka neeni koyidoogaadan haniisinne de7iis” yaagees. (Ajjuutaa 4:11) Ee, Yihooway nuuni deꞌanaadan koyees. Deꞌoy i immido alꞌꞌo imota.—Mazamure 36:9 nabbaba.

2. Nuuni deꞌuwan ufayttanawu ay oottana koshshii?

² Yihooway nuuni deꞌuwan deꞌanaadan koshshiya qumaa, haattaanne hegaa malabaa nuussi immiis. (Oosuwaa 17:28) SHin hegaappe aaruwan, i nuuni deꞌuwan ufayttanaadan koyees. (Oosuwaa 14:15-17) Nuuni deꞌuwan ufayttanawu, Xoossaa higgiyaa azazettana koshshees.—Isiyaasa 48:17, 18.

3. Qaayeeli Aabeela worido wode Yihooway oottidobay aybee?

³ Yihooway nu deꞌuwaanne hara asaa deꞌuwaa xoqqu oottidi xeelliyoogaa Geeshsha Maxaafay tamaarissees. Leemisuwawu, Addaameenne Hewaani naꞌay Qaayeeli ba kaalo ishaa Aabeela bolli keehi yiillotido wode, Yihooway i yiilluwaa aggana koshshiyoogaa Qaayeelawu yootiis. Gidoppe attin, Qaayeeli azazettibeenna; qassi i keehi yiillotidi “ba ishaa Aabeela bolli denddinne wori aggiis.” (Doomettaabaa 4:3-8) Qaayeeli Aabeela worido gishshawu, Yihooway Qaayeela qaxxayiis. (Doomettaabaa 4:9-11) Yiilloynne ixoy iitaba; ayssi giikko, nuuni makkalancha woy meqettaa iita gidanaadan oottana danddayoosona. Hegaa mala asi merinaa deꞌuwaa demmana danddayenna. (1 Yohaannisa  3:15 nabbaba.) Yihoowa ufayssanawu, nuuni ubba asaa siiqiyoogaa tamaarana koshshees.—1 Yohaannisa 3:11, 12.

4. Xoossay Israaꞌeelatussi immido azazotuppe issoy deꞌuwaa imotaabaa nuna ay tamaarissii?

⁴ SHaꞌan qoodettiya layttay aadhi simmin, Yihooway Muuseyyo Tammu Azazota immido wode deꞌuwaa xoqqu oottidi xeelliyoogaa bessiis. “Asa woroppa,” giyaagee he azazotuppe issuwaa. (Zaarettido Wogaa 5:17) Issi uri eriiddi asa worikko, hayqqana bessees.

5. SHahaara kesissiyoogaa Xoossay waati xeellii?

⁵ SHahaara kesissiyoogaa Xoossay waati xeellii? Yelettibeenna naꞌaa deꞌuwaakka Yihooway xoqqu oottidi xeellees. Yihooway Israaꞌeelatussi immido azazuwan, issi uri abbe ixeta maccaasiyo dechin i naꞌay hayqqikko, he uri hegaa gaasuwan hayqqana bessiyoogaa Yihooway yootiis. “Naaꞌꞌu asati issoy issuwaara warettiiddi abbe ixeta maccaasiyo dechikkonne a boshettikko, hegaappe hara iita deshetti xayikko, he maccaasee azinay oychidobaa . . . qanxxo. SHin shahaaray keehi deshettidi hayqqikko, shemppuwaa gishshaa shemppuwaa ekkanawu koshshees.” (Kessaabaa 21:22, 23, NW; Mazamure 127:3) SHahaara kesissiyoogee bala gidiyoogaa hegaappe nuuni tamaaroos.—Wurssetta Qofaa 28 xeella.

6, 7. Nuuni deꞌuwaa xoqqu oottidi xeelliyoogaa Yihoowayyo waati bessana danddayiyoo?

⁶ Nu deꞌuwaanne hara asaa deꞌuwaa xoqqu oottidi xeelliyoogaa Yihoowayyo waati bessana danddayiyoo? Nu deꞌuwaa woy hara asaa deꞌuwaa qohiya aybanne oottennan aggiyoogaana. Qassi tambboy, jimay woy jallissiyaabay nuna qohananne worana danddayiyo gishshawu goꞌettana koshshenna.

⁷ Yihooway nuuyyo deꞌuwaanne asatettaa immiis; qassi hegaa i koyiyoogaadan nuuni goꞌettana bessees. Yaatiyo gishshawu, nu asatettaa loytti oyqqanawu koshshees. Nu  yaatana xayikko, Xoossaa sinttan geeshsha gidokko. (Roome 6:19; 12:1; 2 Qoronttoosa 7:1) Nuuni deꞌuwaa xoqqu ootti xeellana xayikko, nuuyyo deꞌuwaa immida Yihoowawu goynnana danddayokko. Iita meeziyaa aggiyoogee metana danddayikkonne, nuuni deꞌuwaa xoqqu ootti xeelliyo gishshawu iita meeziyaa agganawu baaxetikko, Yihooway nuna maaddana.

8. Nu deꞌuwaa woy haratu deꞌuwaa qohiyaabaa oottenna mala ay oottana danddayiyoo?

⁸ Nuuni deꞌoy alꞌꞌo imota gidiyoogaa tamaarida. Nuuni nu deꞌuwaa woy haratu deꞌuwaa qohiyaaba oottennan agganawu nuuyyo danddayettidabaa ubbaa oottanaagaa Yihooway ammanettees. Nuuni kaamiyaa, motoriyaa woy harabaa laaggiyo wode hegaa oottoos. Nuuni hanttaara woy daafan yeggiya ispporttiyaa oottokko. (Mazamure 11:5) Nuuyyo danddayettida ubban nu sonkka qohiyaabay deꞌenna mala naagettoos. Yihooway Israaꞌeelata hagaadan azaziis: “Ooratta keettaa keexxiyo wode, xoqqa kaaraappe asi kunddi haiqqin ne oishettennaadan, zemppidi attiyoogaa giigissa.”—Zaarettido Wogaa 22:8.

9. Nuuni mehiyaa woy doꞌaa waati xeellana bessii?

⁹ Yihooway nuuni mehiyaa bessiyaagaadan xeellanaadan koyees. Yihooway nuuni miyoobaanne maayiyoobaa demmanawu woykko qohuwaappe naagettanawu mehiyaa woy doꞌaa worennaadan diggibeenna. (Doomettaabaa 3:21; 9:3; Kessaabaa 21:28) SHin qareta xayidi mehiyaa woy doꞌaa coo kaassawu worokko.—Leemiso 12:10.

10. Suuttay deꞌo gidiyoogaa nuuni waati eriyoo?

¹⁰ Suuttay deꞌo gidiyo gishshawu, Yihoowayyo geeshsha. Qaayeeli Aabeela wori simmin, Yihooway Qaayeela, “Ne ishaa suuttai biittaappe taakko waassees” yaagiis. (Doomettaabaa 4:10) Aabeela suuttay a deꞌo; qassi Qaayeeli Aabeela  worido gishshawu Yihooway a qaxxayiis. Nohe wode Bashshaa Haattaappe simmin, suuttay deꞌo gidiyoogaa Yihooway zaarettidi qonccissiis. Yihooway Noheenne a so asay ashuwaa maanaadan paqqadiis. I, “Taani mokkiya dumma dumma kattata intteyyo immidoogaadankka, paxa de7iya woxxi qaaxxiya mereta ubbai intteyyo quma gidana” yaagiis. SHin Yihooway eta, “Biron shemppoora de7iya suuttai a giddon de7iyo ashuwaa mooppite” giidi azaziis.—Doomettaabaa 1:29; 9:3, 4.

11. Xoossay Israaꞌeela deriyaayyo suuttaa xeelliyaagan immido azazoy aybee?

¹¹ Suuttaa meennaadan Yihooway Noheyyo yootoosappe 800 gidiya layttay aadhi simmin, i ba asaa zaarettidi, “Israa7eela asaappe woikko eta giddon de7iya hara biittaa asaappe ooninne miyo do7a woi kafo shankkatidi worikko, a suuttaa sa7an gussidi, biittaa kammo” yaagidi azaziis. I he wode, “Suuttaa mooppite” giis. (Wogaabaa 17:13, 14) Yihooway ba asay he wodekka suuttaa geeshshabadan xeellanaadan koyiis. Eti suuttaa mookkona; shin ashuwaa maana danddayoosona. Eti maanawu mehiyaa woy doꞌaa shukkiyo wode, suuttaa saꞌan gussana bessees.

12. Kiristtaaneti suuttaa waati xeelliyoonaa?

¹² Yesuusi hayqqin amarida layttay aadhi simmin, Israaꞌeelatuyyo immettida azazotuppe Kiristtaaneti naagana bessiya azazoti awugeetakko kuuyanawu kiitettidaageetinne Yerusalaame gubaaꞌiyaa cimati shiiqidosona. (Oosuwaa 15:28, 29 nabbaba; Oosuwaa 21:25) Yihooway suuttaa he wodekka xoqqu oottidi xeelliyoogaanne etikka suuttaa geeshshabadan xeellana koshshiyoogaa eti akeekanaadan i maaddiis. Beni Kiristtaaneti suuttaa mookkona woy uyokkona woy shukkiyo wode suuttay maara gukkibeenna ashuwaa mookkona. Eti hegaadan oottikko, hegee eeqawu goynniyoogaa woy shaaramuxiyoogaa mala iitaba. He wodeppe doommidi, tumu Kiristtaaneti suuttaa mookkona  woy uyokkona. Nu wodiyan shin? Yihooway nuuni suuttaa haꞌꞌikka geeshshabadan xeellanaadan koyees.

13. Kiristtaaneti akkamuwawu suuttaa goꞌettennay aybissee?

¹³ Hegaa giyoogee Kiristtaaneti akkamuwawukka suuttaa goꞌettana koshshenna giyoogee? Ee. Nuuni suuttaa meennaadan woy uyennaadan Yihooway azaziis. Issi dottoree neeni ushshaa uyennaadan yootikko, neeni ushshaa suuttaa xaphuwaa baggaara marppiyan cadettuutee? Cadettennaagee qoncce! Hegaadankka, suuttaa meennaadan woy uyennaadan imettida azazoy nuuni akkamuwawu suuttaa goꞌettana koshshennaagaa bessees.—Wurssetta Qofaa 29 xeella.

14, 15. Issi Kiristtaanee deꞌuwaa bonchiyoogeenne Yihoowayyo azazettiyoogee ay keena koshshiyaabee?

¹⁴ Issi dottoree intte akkamuwawu suuttaa goꞌettana xayikko, hayqqeeta giidi nuussi yootikko shin? Suuttaa xeelliyaagan Xoossaa azazuwaa ubba asay azazettanawu woy agganawu kuuyana bessees. Kiristtaaneti Xoossay immido deꞌuwaa imotaa keehi bonchoosona; qassi akkamuwawu suuttaa goꞌettokkona; shin deꞌanawu koyiyo gishshawu suuttaa goꞌettennan hara ogiyan akkamettana koyoosona.

¹⁵ Nuuni payya gididi deꞌanawu keehi baaxetoos; shin Xoossay deꞌuwaa xoqqu oottidi xeelliyo gishshawu, nuuni akkamuwawu suuttaa goꞌettokko. Yihoowawu azazettennan ixxidi, nu baree aduqqanaadan baaxetiyoogaappe ayyo azazettiyoogee keehi koshshiyaaba. Yesuusi, “Ba shemppuwaa ashshana koyiya urai bashshana; shin ba shemppuwaa ta gishshau bashshiya urai ashshana” yaagiis. (Maatiyoosa 16:25) Nuuni Yihoowa siiqiyo gishshawu ayyo azazettanawu koyoos. I nuuyyo loꞌꞌo gididabaa erees; qassi nuuni Yihoowaagaadan deꞌuwaa alꞌꞌodaaninne geeshshadan xeelloos.—Ibraawe 11:6.

16. Xoossaa ashkkarati ayyo azazettiyoy aybissee?

¹⁶ Xoossaayyo ammanettida ashkkarati suuttaa xeelliyaagan  a azazuwaa azazettanawu murttidosona. Eti suuttaa mookkona woy uyokkona; qassi akkamuwawu suuttaa goꞌettokkona. a SHin, eti bantta shemppuwaa ashshanawu hara ogiyan akkamettoosona. Deꞌuwaanne suuttaa Medhidaagee etayyo loꞌꞌo gididabaa eriyoogaa ammanettoosona. Neeyyo loꞌꞌo gididabaa i eriyoogaa neeni ammanay?

17. Israaꞌeelan, suuttaa goꞌettanaadan Yihooway yootido mexi issi ogee aybee?

¹⁷ Muuseyyo immettida Higgiyan Yihooway Israaꞌeelatussi hagaadan giis: “Asho maayida ubbaa de7oi a suuttaa giddon de7ees; suuttaikka . . . nagaraa atto giissiyaagaa gidiyo gishshau, intte nagaraa atto giissanaadan, taani intteyyo yarshshiyoosaa bollan yarshshanaadan immaas.” (Wogaabaa 17:11) Israaꞌeelati nagaraa oottiyo wode, mehe yarshshidi beeta maqidasiyan deꞌiya yarshshiyoosan qeesee he suuttaappe amaridaagaa gussanaadan oychidi, Yihooway bantta nagaraa atto gaanaadan oychana danddayoosona. Suuttaa goꞌettanaadan Yihooway Israaꞌeelatuyyo yootido mexi issi ogee hegaa.

18. Yesuusa yarshshoy nuuni ay demmanaadan oottii?

¹⁸ Nu nagaraa atto giissanawu, mehiyaa yarshshuwaa higgiyaa gishshaa, Yesuusi saꞌaa yiido wode ba deꞌuwaa woy suuttaa nuussi immiis. (Maatiyoosa 20:28; Ibraawe 10:1) Yesuusa deꞌoy keehi alꞌꞌo gidido gishshawu, Yihooway Yesuusa hayquwaappe denttidi saluwaa efi simmidi, Xoossay ubba asay Yesuusa yarshshuwan merinaa deꞌuwaa demmanaadan oottiis.—Yohaannisa 3:16; Ibraawe 9:11, 12; 1 PHeexiroosa 1:18, 19.

19. Nuuni ubba asaa ‘suuttan ashettennaadan’ ay oottana bessii?

 ¹⁹ Yihooway nuuyyo maalaalissiya deꞌo imotaa immido gishshawu a galatoos. Qassi asay Yesuusa ammanikko merinawu deꞌana danddayiyoogaa etawu yootana koyoos. Nuuni asaa siiqoos; qassi eti deꞌuwaa demmanaadan eta tamaarissanawu nuuyyo danddayettida ubbabaa oottana danddayoos. (Hizqqeela 3:17-21) Hegaa gishshawu, kiitettida PHawuloosaagaadan, nuunikka hagaadan gaana danddayoos: “Intteppe issi urai bayikkokka taani hegan gelennaagaa [“a suuttan ashettennaagaa, NW”] hachchi intteyyo geeshshada yootais. Aissi giikko, Xoossai oottanau qoppidobaa ubbaa intteyyo ainne ashshennan yootaas.” (Oosuwaa 20:26, 27) Ee, nuuni Yihoowabaanne i deꞌuwaa keehi xoqqu oottidi xeelliyoogaa haratussi yootiyo wode, deꞌuwaanne suuttaa keehi bonchiyoogaa bessoos.