1, 2. (a) Aqo laggeti woqqu wodiyau issippe deꞌanaadan halchettidee? (b) Hegaadan oottana danddayiyoy ayba ogiyaanee?

 XOOSSAY koyro bitaniyaanne maccaasiyo aqo duussan issippe wottido wode, he issippetettay guutta wode xallaassa gidiyoogaa bessiyaabi baawa. Addaameenne Hewaana bantta deꞌo laytta ubban issippe deꞌanaadan i koyiis. (Doomettaabaa 2:24) Xoossay bonchissiya aqo deꞌuwau kessido maaray, issi attumaageenne issi maccaara issippe deꞌanaadaana. Aqo laggeti paraman shaahettidi hara uraa ekkana woy gelana danddayiyoy azinay woy machiyaa, woy naaꞌꞌaykka shori baynna asho gaytotettaa poliyo wode xallaana gidiyoogaa Geeshsha Maxaafay yootees.—Maatiyoosa 5:32.

² Naaꞌꞌu asati bantta deꞌo laytta ubban ufayttidi issippe deꞌana danddayiyoonaa? Ee, hegaadan deꞌanaadan maaddiya keehippe koshshiya naaꞌꞌubata Geeshsha Maxaafay yootees. Azinaynne maccaasiyaa he naaꞌꞌubata goꞌettiyaaba gidikko, ufayssaanne daro anjjuwaa demmana danddayoosona. Keehi koshshiya he naaꞌꞌubati aybee?

3. Aqo laggeti bessana koshshiyo heezzu qommo siiqoy awugee?

³ Keehi maaddiyaabatuppe koyroy siiquwaa. Geeshsha Maxaafay dumma dumma qommo siiquwaabaa yootees. He siiqotu qommuwaappe issoy keehi mata laggeti siiqettiyo siiquwaa. (Yohaannisa 11:3) Haray qassi so asaa giddon deꞌiya siiquwaa. (Roome 12:10) Heezzanttoy  qassi attumaagee maccaaro siiqiyo siiquwaa. (Leemiso 5:15-20) Ha ubba qommo siiquwaa azinaynne machiyaa bessana koshshiyoogee qoncce. SHin ha siiqo qommo ubbaappe aadhiya oyddanttoy deꞌees.

4. Oyddantto qommo siiqoy aybee?

⁴ Giriiketto Geeshsha Maxaafaa kifilee koyro xaafettido doonan, oyddantto qommo siiqoy agaappe geetettiis. He qaalay “Xoossai siiqo” geetettido, 1 Yohaannisa 4:8n deꞌees. “Xoossai koiro nuna siiqido gishshau, nuuni a siiqoos.” (1 Yohaannisa 4:19) Issi Kiristtaanee hegaa mala siiquwaa koyro Xoossaa Yihoowayyo, hegaappe simmin hara asatuyyo bessees. (Marqqoosa 12:29-31) Agaappe giya qaalay, “Kiristtoosi nuna siiqidi, ba huuphiyaa . . . immidoogaadan, inttekka siiquwan de7anau bessees”  giya Efisoona 5:2nkka deꞌees. Yesuusi hagaa mala siiqoy tumuppe bana kaalliyaageeta shaakkidi erissiyoogaa yootiis: “Intte issoi issuwaara siiqettikko [agaappe], ta erissiyo ashkkarata gidiyoogaa asai ubbai erana.” (Yohaannisa 13:35) “Ammanoi, hanana giidi ufaissan naagiyoogeenne siiqoi, hageeti heezzai minnidi de7oosona. De7inkka hageetuppe aadhdhiyaagee siiquwaa [agaappe]” giya 1 Qoronttoosa 13:13⁠nkka agaappe giya qaalay deꞌiyoogaa akeeka.

5, 6. (a) Siiqoy ammanuwaappenne hanana giidi ufayssan naagiyoogaappe aadhiyoy aybissee? (b) Aqo deꞌoy laalettennaadan siiqoy maaddiyaaba gidanaadan oottidabati aybee?

⁵ Agaappe geetettiya ha siiquwaa qommoy ammanuwaappenne hanana giidi ufayssan naagiyoogaappe aadhanaadan oottiyaabay aybee? Agaappee baaso siraataa, giishin Xoossaa Qaalan deꞌiya suure gidida baaso siraataa kaallees. (Mazamure 119:105) He siiqoy, Xoossaa xeelan haratuyyo suurenne loꞌꞌo gididabaa qoppanaadaaninne oottanaadan denttettees; he uri hegaa malabi bessiyo ura woy bessenna ura gidana danddayees. He siiqoy aqo laggeti Geeshsha Maxaafan deꞌiya ha zoriyaa kaallanaadan oottees: “Issoi issuwaabaa danddayite; ooninne ba laggiyaa bolli hanqqettidobai de7ikko, issoi issuwau atto yaago. Kiristtoosi [“Yihooway,” NW] intteyyo atto giidoogaadan, inttekka atto giite.” (Qolasiyaasa 3:13) Dosettiya aqo laggeti “siiqoi [agaappe] daro nagaraa kammiyo gishshau, . . . issoi issuwaara wozanappe” siiqettoosona. (1 PHeexiroosa 4:8) Siiqoy mooruwaa kammiyoogaa hassaya. Nagarancha asi balabaa oottiyo gishshau, siiqoy balabaa xayssenna.—Mazamure 130:3, 4; Yaaqoobaa 3:2.

⁶ Aqo laggeti Xoossaanne issoy issuwaa siiqiyo wode, “siiqoi mulekka xayenna” gishshau, aqoy laalettennan eti ufayttiiddi deꞌana danddayoosona. (1 Qoronttoosa 13:8) Siiqoy “ubbabaa issippe shiishshi” qachees. (Qolasiyaasa 3:14) Neeni aqo oyqqidaba gidikko, neeninne ne aqo laggee ha siiqo qommuwaa waatidi bessana danddayeetii? Xoossaa Qaalaa issippe nabbabite; qassi  nabbabidobaa haasayite. Yesuusa siiquwaa leemisuwaa xannaꞌite; qassi a leemisuwaa kaallanau, aagaadan qoppanaunne oottanau malite. Qassi Xoossaa Qaalaa tamaariyo gubaaꞌe shiiqotun shiiqite. Hegaadankka, Xoossaa ayyaanaa ayfiyaa macaratuppe issuwaa gidida ha dumma siiqo qommuwaa bessanau Xoossay maaddanaadan woossite.—Leemiso 3:5, 6; Yohaannisa 17:3; Galaatiyaa 5:22; Ibraawe 10:24, 25.

7. Bonchoy aybee, aqo deꞌuwan bonchana koshshiyay oonee?

⁷ Aqo laggeti issoy issuwaa siiqiyaaba gidikko, eti issoy issuwaa bonchoosona; bonchiyoogee qassi aqo deꞌuwan ufayttanaadan keehi maaddiyaabatuppe naaꞌꞌanttuwaa. Bonchiyoogee “haratussi qoppiyoogaa, eta xoqqu oottidi xeelliyoogaa” geetettidi birshshettiis. Xoossaa Qaalay azinatanne machota gujjin, ubba Kiristtaaneta, “Issoi issuwaa bonchchiyoogan ufaittite” giidi zorees. (Roome 12:10) Kiitettida PHeexiroosi, “Azinatoo, intte maccaasati daafuranchcha mereta gidiyoogaa eridi, etaara issippe de7ite; . . . eta bonchchite” yaagidi xaafiis. (1 PHeexiroosa 3:7) Qassi machiyaa “azinaa bonchchanau bessees.” (Efisoona 5:33) Neeni issi ura bonchiyaaba gidikko, au kehabaa oottaasa; a hanotaanne xeelaa xoqqu ootta xeellaasa; qassi neeni oottanaadan i koyiyoobaa polanau giigettidaagaa gidaasa.

8-10. Aqo laggeti woppu giidi ufayssan deꞌanaadan, bonchiyoogee maaddiyo issi issi ogeti aybee?

⁸ Aqo deꞌuwan ufayttanau koyiyaageeti bantta aqo laggeta bonchanau “issoi issuwaa go77iyaabaa koyanaappe attin, [bantta] huuphe xalaalaa go77iyaabaa” koyana bessenna. (Piliphphisiyuusa 2:4) Yaaretokkona woykko bantta huuphe xallaa goꞌꞌiyaabaa qoppokkona. Yaatiyoogaappe, bantta aqo laggiyaukka kehabaa qoppoosona. Ubba bantta aqo laggiyau koshshiyaabaa kaseyoosona.

⁹ Aqo laggeti issoy issuwaa bonchiyoogee bantta giddon deꞌiya qofaa dummatettaa akeekanau maaddees.  Naaꞌꞌu asatuyyo ubbaban issi mala qofay deꞌees giidi qoppiyoogee bessiyaaba gidenna. Azinay koshshiyaabadan xeelliyoobaa machiyaa koshshennabadan xeellana danddayawusu; qassi machiyaa dosiyoobay azinay dosennaba gidana danddayees. SHin hegee Yihoowa higgiyaanne baaso siraataa kanttanaadan oottiyaaba gidana xayikko, issi uraa qofaanne i dooriyoobaa haray bonchana koshshees. (1 PHeexiroosa 2:16; Pilimoona 14⁠ra gatta xeella.) Hegaa bollikka, asaara deꞌiyo wode gidin aggin, borennan woy toochennan aggiyoogan issoy issuwaa bonchana koshshees.

¹⁰ Ee, giiga aqo deꞌuwau keehi koshshiya naaꞌꞌubati Xoossaa siiqiyoogaanne issoy issuwaa siiqiyoogaa, qassi issoy issuwaa bonchiyoogaa. Aqo deꞌuwan keehi koshshiya issi issi hanotatun ha naaꞌꞌubata waati goꞌettana danddayettii?

11. Geeshsha Maxaafay yootiyoogaadan, aqo deꞌuwan huuphe gidiyay oonee?

¹¹ Attuma asi bessiyaagaadan so asau huuphe gidanaadan koshshiya eeshshay deꞌiyoogaa gididi merettidoogaa Geeshsha Maxaafay yootees. Hegaa gishshau, ba keettaayeessinne ba naatussi ayyaanaabaaninne asatettan koshshiyaabaa kunttana mala Yihooway attumaagau aawatettaa immiis. Azinay Yihoowa sheniyaara moggiya ogiyan loꞌꞌo kuushshaa kuuyana bessees; qassi Xoossaa ufayssiya eeshshay deꞌiyoogaa gidiyoogan loꞌꞌo leemiso gidana bessees. “Maccaasatoo, Godaayyo haarettiyoogaadan, intte azinatuyyo haarettite. Aissi giikko, Kiristtoosi qassi woosa keettaayyo huuphe gidiyoogaadan, azinaikka ba maccaaseeyyo huuphe.” (Efisoona 5:22, 23) Gidikkokka, azinaukka huuphe gidiya Uri deꞌiyoogaa Geeshsha Maxaafay yootees. Kiitettida PHauloosi, “Kiristtoosi attumaasa ubbaayyo huuphe gidiyoogaa, attumaasi maccaasassi huuphe gidiyoogaanne qassi Xoossai Kiristtoosassi huuphe gidiyoogaa intte  erana mala koyais” giidi xaafiis. (1 Qoronttoosa 11:3) Erancha gidida azinay baassi huuphe gidida, Kiristtoos Yesuusa leemisuwaa kaalliyoogan waati haaranaakko tamaarees.

12. Yesuusi haarettiyoogaaninne haariyoogan loꞌꞌo leemiso gidiyaabaa ay oottidee?

¹² Yesuusaukka huuphe gidiya, Yihooway deꞌees; qassi Yesuusi au bessiyaagaadan haarettees. Yesuusi, “Taani tana kiittidaagee dosiyoobaa oottiyoogaappe attin, taani dosiyoogaa oottikke” yaagiis. (Yohaannisa 5:30) Ayba loꞌꞌo leemisoo! Yesuusi “merettidabaa ubbaappe aadhdhiya baira Na7a.” (Qolasiyaasa 1:15) I Mase gidiis. I ubba kiitanchatuppe keehi xoqqu giidi, ayyaanan tiyettida Kiristtaanetu gubaaꞌiyau Huuphe gidanaagaanne Xoossaa Kawotettau Kawo gidanaagaa erees. (Piliphphisiyuusa 2:9-11; Ibraawe 1:4) Yesuusi hegaa mala xoqqa maataanne gita bonchuwaa demmanaagaa eriyaaba gidikkonne, i iita, morgge zozzanne haratuppe darobaa naagiya asa gidibeenna. Erissiyo ashkkarati baassi azazettanaadan ubbatoo hassayissiisippe attin, eta naaqqibeenna. Yesuusi siiqiyaanne qarettiya asa; ubba qassi metootanchata siiqeesinne etau qarettees. I hagaadan giis: “Daafuranchchatoo, deexuwaa tookkiyaageetoo, ubbati taakko haa yiite; taani inttena shemppissana. Taani ashkkenne wozanappe kauyyiyaagaa gidido gishshau, ta qambbaran waaxettite; taappe tamaarite; intte shemppuwaukka intte shemppo demmana. Aissi giikko, ta qambbarai giiga; qassi taani inttena toossidoogeekka kaushsha.” (Maatiyoosa 11:28-30) Aara takkiyoogee keehi ufayssees.

13, 14. Siiqiya issi azinay Yesuusa leemisuwaa kaalliyoogan huuphe gidiyo maataa waati goꞌettii?

¹³ Aqo deꞌoy ufayssiyaagaa gidanaadan koyiya azinay Yesuusa loꞌꞌo eeshshaa loytti qoppana koshshees. Loꞌꞌo azinay huuphe gidiyo maataa goꞌettidi, ba maccaasiyo yashissiya, iitanne huqqunniya asa gidenna. Yaatiyoogaappe, o siiqeesinne bonchees. Balabaa oottenna Yesuusi  “wozanappe kauyyiyaagaa” gidikko, balabaa oottiya azinay hegaadan oottana bessiyo daro gaasoy deꞌees. I hegaadan oottiyo wode, ba maccaasiyaa qarettanaadan oottees. Hegaa gishshau, “Taani mooraas; neeni giidobay likke” giyoogee deexxiyaaba gidana danddayikkokka, ba huuphiyaa kawushshiya azinay ba balaa ammanees. Issi machiyaa otorettiyaanne morgge zozza gidida azinaa bonchiyoogaappe bana kawushshiya azinaa bonchanau metootukku. Qassi ba azinaa bonchiya machiyaa ba mooruwaa ammanausu.

¹⁴ Xoossay, aqo deꞌoy ufayssiyaagaa gidanaadan maaddiya loꞌꞌo eeshshay maccaasau deꞌanaadan oottidi medhiis. Erancha gidida azinay hegaa akeekiyo gishshau, a yootiyoobaa karenna. Daro maccaasay keehi qaretteesinne hara asau koshshiyaabaa sohuwaara akeekees; ha eeshshati so asaa loytti oyqqanaunne hara asaara deꞌiya hanotan keehi maaddoosona. Darotoo maccaasay keettay ufayssiya soho gidanaadan oottiyoogan gooba. Leemiso shemppo 31⁠n ibay odettido ‘wozannaama macheeyyo’ daro loꞌꞌo eeshshaynne eray deꞌees; qassi i soo asay a gooba gidiyoogan goꞌettees. Aybissi giikko, “i keettaawai o ubbabankka ammanees.”—Leemiso 31:10, 11.

15. Azinay ba maccaasiyo Kiristtoosaagaadan siiqananne bonchana danddayiyoy ayba ogiyaanee?

¹⁵ Issi issi wogan asay azinaa godadan xeelliyo gishshau, a issi issibaa oychiyoogaakka kariyoobadan qoppees. I ba machiyo ashkkaradan xeellana danddayees. Huuphe gidiyo maataa hegaadan bessenna ogiyan goꞌettiyoogee, maccaaseera deꞌiya dabbotaa xalla gidennan, Xoossaara deꞌiya dabbotaakka moorees. (1 Yohaannisa 4:20, 21⁠ra gatta xeella.) Hara baggaara qassi, issi issi azinati bantta aawatettaa aggi bayin maccaasati son aawatoosona. Kiristtoosau suure haarettiya azinay ba maccaasiyo qohenna woy karenna. SHin, Yesuusi ba goꞌꞌaa aggiyoogan bessido siiquwaa leemisuwaa i kaallees; qassi PHauloosi, “Azinatoo, Kiristtoosi woosa keettaa siiqidi, ba huuphiyaa ayyo immidoogaadan, inttekka  intte maccaasata siiqite” giidi yootido zoriyaa oosuwan peeshshees. (Efisoona 5:25) Kiristtoos Yesuusi bana kaalliyaageeta keehippe siiqiyo gishshau, ba shemppuwaa etau aattidi immiis. Loꞌꞌo azinay ba macheeppe darobaa naagiyoogaappe, iyyo maaddiyaabaa qoppidi, yaaretennan Yesuusaagaa mala eeshshaa bessees. Azinay Kiristtoosayyo haarettiyaagaa, qassi Kiristtoosaagaadan siiqiyaagaanne bonchiyaagaa gidikko, maccaasiyaa ayyo ba dosana haarettausu.—Efisoona 5:28, 29, 33.

16. Maccaasiyaa ba azinau ay mala eeshshaa bessana koshshii?

¹⁶ Addaamee merettoosappe amarida wodee aadhi simmin, “GODAI Xoossai, ‘Bitanee barkka de7iyoogee lo77o gidenna; taani ayyo injjetiyaabaanne maaddiyaabaa kessana’ yaagiis.” (Doomettaabaa 2:18) Xoossay Hewaano medhidoy annaacettiyaaba gidanaadaana gidennan, ‘injjetiyaaba’ gidanaadaana. Aqo deꞌoy annaacettiya naaꞌꞌu asi laaggiyo markkabe mala gidenna. Azinay ba maataa siiquwan goꞌettana koshshees; qassi maccaasiyaa siiqana, bonchananne haarettana bessees.

17, 18. Maccaasiyaa ba azinau tumuppe maaddiyaaro gidana danddayiyo issi issi ogee aybee?

¹⁷ SHin, issi machiyo loꞌꞌo giissiyay haarettiyoogaa xalla gidenna. Ba azinay kuuyiyoobaa maayiyoogan, ba azinaa tumuppe maaddiyaaro gidanau baaxetausu. I kuuyiyoobay a maayiyooba gidiyo wode hegee iyyo metennaagee qoncce. SHin i kuuyiyoobaa a maayenna wodekka, hegaa kaafiyoogee kuuyidobay ushachanaadan maaddana danddayees.

¹⁸ Maccaasiyaa azinay ba maataa loyttidi goꞌettanaadan harabankka maaddana danddayawusu. Azinay so asaa kaalettanau oottiyoobaa boriyoogaappe woy o mule ufayssana danddayennabadan i qoppanaadan oottiyoogaappe nashshada haasayana danddayausu. A ba azinaa oyqqiyo loꞌꞌo hanotay azinaa sintta xallan gidennan, “Xoossaa sinttan . . . daro al77o gididi, xayenna ashkkenne  woppu giida ayyaana” gidana koshshiyoogaa a akeekana bessees. (1 PHeexiroosa 3:3, 4; Qolasiyaasa 3:12) I azinay Yihoowa ammanennaagaa gidikko shin? I ammaniyaagaa gidin aggin, maccaasay “Xoossaa qaalai borettenna mala, bantta keettaawatanne bantta naata siiqiyaageeta, banttanakka naagiyaageeta, geeshshata, bantta keettan oottiyaageeta, kehatanne bantta keettaawatussikka azazettiyaageeta gidana mala” Geeshsha Maxaafay zorees. (Tiitu 2:4, 5) Zoriya wozanaa goꞌettidi kuuyiyoobay merettiyo wode, maccaasiyaa “ashkketettaaninne yashshatettan” azinau yootiyaaba gidikko, ammanenna azinay i qofaa bonchana danddayees. Ammanenna azinatuppe issoti issoti ‘bantta maccaasati palamettennan, yashshatettaaninne geeshshatettan etau haarettiyoogaa beꞌidi ammanidosona.’—1 PHeexiroosa 3:1, 2, 15; 1 Qoronttoosa 7:13-16.

19. Machiyaa Xoossaa higgiyaa kanttana mala azinay oychiyo wode a ay oottana koshshii?

¹⁹ Xoossay koyennabaa ba maccaasiyaa oottanaadan issi azinay koyikko shin? Hegaa malabay merettiyo wode, a azazettana koshshiyoy Xoossaassa gidiyoogaa hassayana bessees. Xoossaa higgiyaa kanttanaadan, aawatetta maatay deꞌiyoogeeti azazido wode, kiitettidaageeti oottidoogaadan oottawusu. Oosuwaa 5:29y, “PHeexiroosinne Yesuusi kiittido harati zaaridi yaagidosona; ‘Nuuni asau azazettanaappe Xoossau azazettanau bessees’” yaagees.

20. Siiqiyoogeenne bonchiyoogee keehippe koshshiyoy awudee?

²⁰ Aqo laggeti issoy issuwaara haasayiyo wodekka siiqiyoogeenne bonchiyoogee keehippe maaddees. Siiqiya azinay ba machee oosuwaabaa, i metuwaabaanne dumma dummaban i xeelay aybakko iira issippe haasayees. Hegee a koyiyooba. Ba maccaaseera haasayiyaanne a yootiyoobaa wozanappe siyiya azinay o siiqeesinne  bonchees. (Yaaqooba 1:19) Issi issi maccaasati azinati banttanaara darotoo haasayenna gishshau amassaloosona. Hegee azzanttiyaaba. Bichaarissiyaabay darido ha wodiyan, azinati daro saatiyau oosuwan takkiyoogeenne ikkonoomiyaa hanotaappe denddidaagan issi issi maccaasati qaxaretti oottiyoogee tuma. SHin aqo laggeti issoy issuwaara haasayiyo wodiyaa koshshees. Hegee xayikko, issoy issuwaara gayttennan aggana danddayoosona. Eta hanotay, eti aqo laggiyaappe banttau qarettiya hara uraara laggetanau koyanaadan oottikko, hegee wolqqaama metuwaa kaalettana danddayees.

21. Aqo deꞌoy ufayssiyaagaa gidana mala bessiyaagaadan haasayiyoogee waati maaddii?

²¹ Azinaynne machiyaa issoy issuwaara haasayiyo ogeekka keehi koshshiyaaba. “Lo77o qaalai . . . mal77ees; bollaakka maaddeesinne pattees.” (Leemiso 16:24) Aqo laggee ammaniyaagaa gidin aggin, “Intte haasayai ubba wode, siyanau kehiyaagaanne ufaissiyaagaa gidanau bessees” giya Geeshsha Maxaafaa zoriyaa oosuwan peeshshana koshshees. (Qolasiyaasa 4:6) Aqo laggetuppe issoy ufayssenna hanotan peꞌidaba gidikko, hankko uri kehatettaaninne qaretan haasayiyoobay minttettana danddayees. “Koshshiyo wodiyan haasayettida likke qaalai biraa bolli tigido worqqaa alleequwaa mala.” (Leemiso 25:11) SHonggaara deꞌiya liiqo qaalaa haasayiyoogee keehippe koshshees. Leemisuwau, issi uri yiilluwan, “Kariyaa gordda!” giidi azazana danddayees. SHin shonggaara deꞌiya liiqo qaalan, “Hayyanaa kariyaa gordduutii?” giyoogee siyanau ay keena ‘kehiyaanne ufayssiyaabee’!

22. Aqo laggeti issoy issuwaara loꞌꞌo hanotan haasayanau koshshiya eeshshay aybee?

²² Issoy issuwaa keha ayfiyan xeelliiddi, liiqo qaalan, kehatettan, qofaa akeekiyoogaa bessiya hanotaaninne qarettidi haasayiyoogee keehi minttettees. Azinaynne machiyaa bantta koyiyoobaa yootiyoogan issoy issuwaara loꞌꞌo hanotan haasayanau baaxetana danddayoosona; yaatiyoogan hidootaa qanxxissiyaabay gakkiyo wode issoy  issuwaa minttettananne maaddana danddayoosona. Xoossaa Qaalay, “Unꞌꞌettidaageeta minttettite” yaagees. (1 Tasalonqqe 5:14, NW) Azinaykka machiyaakka azzaniyo wodee deꞌana danddayees. Eti issoy issuwaa ‘minttettiyaabaa’ haasayiyoogan gazddissana danddayoosona.—Roome 15:2.

23, 24. Maayettenna wode siiqiyoogeenne bonchiyoogee waati maaddii? Leemisuwaa yoota.

²³ Issoy issuwaa siiqiyaanne bonchiya azinaynne machiyaa maayettibeennaba ubbaa gita metodan xeellokkona. Eti issoy issuwaara “woppu giidi” deꞌana bessees. (Qolasiyaasa 3:19) ‘Liiqo qaalay hanqquwaa zarbbissiyoogaa’ eti hassayana koshshees. (Leemiso 15:1) Aqo laggee ba wozanaabaa ubbaa yootiyo wode karennaadan woy toochennaadan naagettana bessees. Yaatiyoogaappe, hegaadan i yootiyo wode, a qofaa loytta akeekanau hegee injje wode gidiyoogaadan qoppa. Intte giddon deꞌiya dummatettaa giigissanau baaxetite.

²⁴ Issi metoy merettido wode, hegaa giigissanau Saara ba azinaa Abrahaamayyo yootidobaanne a yootidobaa Abrahaami maayibeennaagaa hassaya. SHin Xoossay Abrahaama, “Saara neeyyo yootiyoobaa ubbaa siya” yaagiis. (Doomettaabaa 21:9-12) Abrahaami hegaadan oottido gishshau anjjettiis. Hegaara issi mala hanotan, azinay qoppidobaappe dummatiyaabaa machiyaa yootiyo wode, hegaadan oottana xayikkokka a yootiyoobaa siyana bessees. Qassi machiyaa haasayada aggennaaro gidana bessenna; shin azinay yootiyoobaa ezggana koshshees. (Leemiso 25:24) Azinay woy machiyaa ubbatoo ba koyiyooba xallay hananaadan baaxetiyaaba gidikko, hegee siiqiyoogaanne bonchiyoogaa bessennaba.

25. Aqo laggeti loꞌꞌo hanotan haasayiyoogee asho gaytotettaara gayttidaagan ufayttanau waati maaddii?

²⁵ Issoy issuwaara loꞌꞌo hanotan haasayiyoogee aqo laggeti asho gaytotettaa poliyoogaara gayttidaagankka keehi koshshees. Yaaretiyoogeenne ba huuphiyaa naagennaagee aqo laggetu giddon deꞌiya ha mata dabbotaa  keehippe moorana danddayees. Qoncce gidida hanotan issoy issuwaara haasayiyoogeenne danddayay keehi koshshiyaaba. Ba goꞌꞌa xallaa xeellennan issoy issuwaa hanotaa qoppiyaaba gidikko, asho gaytotettaara gayttidaagan darotoo wolqqaama metoy merettenna. Ha allaalliyaara gayttidaagankka, “Ooninne hara asa go77iyaabaa qoppoppe attin, harai atto issoinne bana go77iyaabaa qoppoppo.”—1 Qoronttoosa 7:3-5; 10:24.

26. Ubba aqo deꞌuwan ufayssiyaabaynne ufayssennabay deꞌiyaaba gidikkokka, Xoossaa Qaalaa siyiyoogee aqo laggeti ufayttanaadan waati maaddii?

²⁶ Xoossaa Qaalay keehippe loꞌꞌo zore zorees. Aqo deꞌo ubban ufayssiyaabaynne ufayssennabay deꞌiyoogee tuma. SHin aqo laggeti Geeshsha Maxaafan qonccida, Yihoowa qofaa kaalliyoogaaninne bantta dabbotay baaso siraataa kaalliya siiquwaaninne bonchuwan baasettanaadan oottiyoogan, aqo deꞌoy laalettennan ufayttidi deꞌanaagaa ammanettana danddayoosona. Yaatiyoogan, eti issoy issuwaa xalla gidennan, aqo deꞌuwaa Giigissida, Xoossaa Yihoowakka bonchoosona.