1, 2. (a) Kasetidi qoppiyoogee koshshiyaaba gidiyoogaa Yesuusi qonccissidoy ayba ogiyaanee? (b) Kasetidi qoppiyoogee keehi koshshiyoy aybiira gayttidaagaanee?

 KEETTAA keexxanau loytti giigettana koshshees. Baasuwaa baasanaappe kase, awu baggan ay mala keettaa keexxanaakko qoppana bessees. SHin hara issibay keehippe koshshees. Yesuusi, “Intteppe issi urai shuchcha keettaa keexxanau koyikko, keettaa polanau woqqu miishshaa koshshiyaakko, koiroora uttidi qoodennai oonee?” yaagiis.—Luqaasa 14:28.

² Keettaa keexxanau koshshiyaagaa malabay giiga aquwaa oyqqanaukka koshshees. Daroti, “Taani aqo oyqqanau koyays” goosona. SHin hegau koshshiyaabaa  takki giidi qoppiyay aappun asee? Geeshsha Maxaafay aqo deꞌoy loꞌꞌoba gidiyoogaa yootiyaaba gidikkokka, aqo deꞌuwan gakkiya metuwaakka yootees. (Leemiso 18:22; 1 Qoronttoosa 7:28) Hegaa gishshau, aqo oyqqanau koyiyaageeti appe demmiyo anjjuwaanne aqo oyqqiyoogee kaalettiyo aawatettaa loytti qoppana bessees.

3. Aqo oyqqanau koyiyaageeta Geeshsha Maxaafay keehi maaddana danddayiyoy aybissee, qassi woygiya heezzu oyshatu zaaruwaa eranau maaddii?

³ Hegaara gayttidaagan Geeshsha Maxaafay maaddana danddayees. Geeshsha Maxaafan deꞌiya zoriyaa xaafissidaagee aqo deꞌuwaa Doomissidaagaa, Xoossaa Yihoowa. (Efisoona 3:14, 15; 2 Ximootiyoosa 3:16) Beni wode xaafettidaba gidikkokka, ha wodiyau haniya kaaletuwaa oyqqida ha maxaafan deꞌiya baaso siraataa goꞌettiyoogan hagaappe kaallidi deꞌiyaabata ane pilggoos: (1) Issi uri ekkanau woy gelanau giigettidoogaa waati erana danddayii? (2) Ekkiyo woy geliyo uraappe ay naagana koshshii? qassi (3) Issoy issuwaa loytti eranau issippe aattiyo wodee bonchissiyaagaa gidana danddayiyoy ayba ogiyaanee?

4. Aqo deꞌoy ubbatoo giiga gidanaadan maaddiya issi keehi koshshiyaabay aybee, aybissi?

⁴ Keettaa keexxanau daro miishshaa koshshana danddayees; shin ubba wode a loyttidi oyqqanaukka miishshaa koshshees. Aqo deꞌuwaara gayttidaagankka hanotay hegaa mala. Aquwaa oyqqiyoogee deexxiyaaba milatana danddayees; shin aqo deꞌuwaa ubbatoo loytti oyqqanau qoppiyoogeekka bessiyaaba. Hegaadan loytti oyqqanau waatana koshshii? Hegau keehippe koshshiya issibay wozanappe maacettiyoogaa. Aqo laggeta xeelliyaagan Geeshsha Maxaafay, “Asi ba aawaanne ba aayyiyo aggi bayidi, ba machcheera issippe de7ees; eti naa77ai issi asho gidoosona” yaagees. (Doomettaabaa  2:24) Geeshsha Maxaafaa maaran, issi uri ba maccaasiyo yeddidi, haranno ekkana danddayiyoy issi gaaso xallaana gidiyoogaa Yesuus Kiristtoosi yootiis; hegee ‘shaaramuxiyoogaa,’ giishin ba aqo lagge gidenna uraara asho gaytotettaa poliyoogaa. (Maatiyoosa 19:9) Neeni aqo oyqqanau qoppiyaaba gidikko, ha Geeshsha maxaafaa wogaa hassaya. Neeni ha mino maachaa maacettanau giigettabeennaba gidikko, aqo oyqqanau giigettabaakka.—Zaarettido Wogaa 23:21; Eranchchaa 5:4, 5.

5. Mino maachaa maacettiyoogaa issoti issoti yayyiyaaba gidikkokka, aqo oyqqanau qoppiyaageeti hegaa xoqqu ootti xeellana koshshiyoy aybissee?

⁵ Mino maachaa maacettiyoogaa qoppiyo wode daroti yayyoosona. Issi yelagay, “Deꞌo laytta ubban nuuni naaꞌꞌay shaahettennan deꞌiyoogaa qoppiyo wode, tau hegee qasho keetta milatees” yaagiis. SHin neeni machanau qoppiyo ura keehi siiqiyaaba gidikko, maacettiyoogee tooho gidenna; ubba woppissiyaaba. Maacettiyoogee azinaynne machiyaa keha wodiyaaninne iita wodiyan issoy issuwaara maadettidi issippe deꞌanaadan oottees. Kiristtaane gidida kiitettida PHauloosi tumu siiqoy “ubbabaa danddayees” qassi “ubbabaa genccees” giidi xaafiis. (1 Qoronttoosa 13:4, 7) Issi maccaasiyaa, “Geliyo wode maacettido maachay taani woppu gaanaadan oottees. Nuuni issoy issuwaappe shaahettennan deꞌanau asaa sinttan gelido qaalay taani woppu gaanaadan oottees” yaagaasu.—Eranchchaa 4:9-12.

6. Yelagatettan aqo oyqqanau dirbbennaagee loꞌꞌo gidiyoy aybissee?

⁶ Maachaa naagidi deꞌanau kayma gidana koshshees. Hegaa gishshau, Kiristtaaneti asho gaytotettaa koshshay wolqqaamidi, issi uri maara qoppennaadan oottana danddayiya “panttatetta wodee” aadhanaashin aqo oyqqennan takkiyoogee loꞌꞌo gidiyoogaa PHauloosi zoriis. (1 Qoronttoosa 7:36, NW) Yelagati dicciyo wode eta hanotay sohuwaara laamettees. Naatettan aqo  oyqqida daroti, eti koyiyoobaynne amottiyoobay guutta layttappe simmin laamettidoogaa akeekidosona. Gasttidi aqo oyqqidaageetuura geeddarssiyo wode, panttatettan aqo oyqqidaageeti bantta aqo duussan ufayttennaagaanne bantta machota yeddanau koyiyoogaa xinaatee qonccissees. Yaatiyo gishshau aqo oyqqanau dirbboppa. Yelagatettan aqo oyqqennan amarida wodiyaa takkiyoogee, neeni qarattanaadan, qassi kaseegaappe wozannaamanaadaaninne giiga aqo lagge gidanaadan oottana danddayees. Aqo oyqqennan takkiyoogee, ne huuphiyaa loytta eranau, giishin aqo deꞌuwan moggada deꞌanau keehippe koshshiya eeshshay deꞌiyo ura gidanaadankka maaddana danddayees.

7. Aqo oyqqanau qoppiyaageeti kasetidi banttana qorana koshshiyoy aybissee?

⁷ Neeni machanau koyiyo urau deꞌana bessiya eeshshaa sohuwaara yootana danddayay? Daroti sohuwaara yootoosona. SHin ne eeshshaa shin? Giiga aquwaa oyqqanau neessi deꞌana koshshiya eeshshati awugeetee? Neeni ay mala azina woy macho gidanee? Leemisuwau, ne balaa ammananau waayissenna, zore siyiya aseeyye, woy zoree imettiyo wode ubbatoo palamettiya uree? Neeni darotoo ufayttiyaanne loꞌꞌo xeelay deꞌiyo aseeyye, woy ufayttenna, amassaliya asee? (Leemiso 8:33; 15:15) Aqo oyqqiyoogee ne eeshshaa laammennaagaa hassaya. Neeni aqo oyqqanaappe kase ayyiyaagaa, sohuwaara lancciyaagaa woy loꞌꞌo xeeli baynnaagaa gidikko, aqo oyqqa simmadakka laamettakka. Harati nuna xeelliyoogaadan nu huuphiyaa xeellana danddayenna gishshau, ne hanotaa qoncciyan yootanaadan nena yelidaageeta woy neeni ammanettiyo laggiyaa ayssi oychikkii? Giigissana koshshiyaabi deꞌiyoogaa akeekiyaaba gidikko, aqo oyqqanau halchanaappe kase he hanotaa giigissa.

8-10. Issi uri aqo oyqqanau giigettanaadan maaddiya Geeshsha Maxaafaa zoree awugee?

 ⁸ Geeshsha Maxaafay nuuni Xoossaa geeshsha ayyaanaa kaaletuwaa kaalliyoogan, “siiquwaa, ufaissaa, sarotettaa, danddayaa, kehatettaa, lo77otettaa, ammanuwaa, ashkketettaa, ba huuphiyaa naagiyoogaa” mala eeshshati diyoogeeta gidanaadan minttettees. Qassi ‘nu qofaanne wozanaa muleera ooraxxissidi,’ “Xoossaa leemisuwan merettida ooratta asatettaa” maayanaadankka yootees. (Galaatiyaa 5:22, 23; Efisoona 4:23, 24) Neeni aqo oyqqennan deꞌiyo wode ha zoriyaa oosuwan peeshshiyoogee miishshaa bankkiyan wottiyoogaa mala; sinttappe aqo oyqqiyo wode he eeshshati nena keehi maaddoosona.

⁹ Leemisuwau, neeni maccaasa gidikko, ne puulau qoppiyoogaappe aaruwan ‘wozana giddon deꞌiya loꞌꞌotettau’ qoppana bessees. (1 PHeexiroosa 3:3, 4) Bessiyaagaadan maayiyoogeenne qoppiyoogee neessi aadhida eratetta gidida ‘boncho kallachay’ deꞌanaadan maaddees. (Leemiso 4:9; 31:10, 30; 1 Ximootiyoosa 2:9, 10) Neeni attuma asa gidikko, maccaasaa kehatettaaninne bonchuwan oyqqiyoogaa tamaara. (1 Ximootiyoosa 5:1, 2) Kuushshaa kuuyiyoogaanne neeppe koyettiyaabaa oottiyoogaa xalla gidennan, ne abbiyaa akeekiyoogaanne ne huuphiyaa kawushshiyoogaakka tamaara. Wolqqaamiyoogee aqo deꞌuwan metoy merettanaadan oottees.—Leemiso 29:23; Mikiyaasa 6:8; Efisoona 5:28, 29.

¹⁰ Ha hanotatuura gayttidaagan nu qofaa laammiyoogee metiyaaba gidikkokka, hegee ubba Kiristtaaneti oottana bessiyaaba. Qassi hegee neeni loꞌꞌo aqqo lagge gidanaadan maaddees.

11, 12. Naaꞌꞌu asati issoy issuwau injjetiya woy aggiya waati erana danddayiyoonaa?

¹¹ Issi issi biittan attumaagee woy maccaara ba aqo  laggiyaa dooriyoogee meeze gididaba. Neeni issi ura siiqiyaaba gidikko, ay oottana koshshii? Koyro, ‘Taani tumuppe aqo oyqqanau qoppidanaa?’ gaada nena oycha. Issi uraa koshshaa denttettidi, hanennabaa naaganaadan oottiyoogee meqetti baynna ooso. (Leemiso 13:12) Qassi, ‘Taani aqo oyqqanau danddayiyaanaa?’ gaada nena oycha. Ha naaꞌꞌu oyshatu zaaroy ee giyaagaa gidikko, neeni hegaappe kaallada oottanabay heeraa wogaadan dumma dumma gidana danddayees. Issi issi biittaa wogaadan, issi uraa hanotaa qoroogaappe guyyiyan, loytta erettanau koyiyoogaa yootana danddayaasa. He uri koyennaba gidikko, waayissoppa. He hanotaara gayttidaagan he aawussikka kuuyiyo maati deꞌiyoogaa hassaya. SHin he aawu eeno giyaaba gidikko, loꞌꞌo hanotan wodiyaa issippe aattanau hanotaa giigissa. Hegaadan oottiyoogee, he uraa ekkiyoogee woy geliyoogee eratetta kuushsha gidiyoogaa woy gidennaagaa akeekanau maaddees. a He wodiyan neeni ay naagana koshshii?

¹² Ha oyshaa zaaranau, naaꞌꞌu muuziqa miishshata, giishin piyaanuwaanne gitaariyaa qoppa. He miishshata loytti giigissidi kaaꞌiyo wode, huuphiyan huuphiyan loꞌꞌo cenggurssaa sissana danddayoosona. SHin ha naaꞌꞌu miishshata issippe kaaꞌiyo wode shin? Eti issoy issuwaara mogganaadan giigissana bessees. Aqo lagge gidanaadan neeni koyiyo uraara deꞌiya hanotaykka hegaara issi mala. Intte naaꞌꞌaykka huuphiyan huuphiyan intte eeshshaa ‘giigissanau’ darobaa kase oottidaageeta gidana danddayeeta. SHin haꞌꞌi denddiya oyshay, ‘Intte issoy issuwaara moggeetii?’ giyaagaa. Hara guussan intte issoy issuwau injjetiyaageetee?

13. Neegaa mala ammanuwaa kaallenna uraa ekkanau koyiyoogee eeyyatetta gidiyoy aybissee?

¹³ Intte ammanoynne intte kaalliyo maaray issi mala  gidiyoogee keehippe koshshees. Kiitettida PHauloosi, “Ammanenna asatuura zuppetidi, giigenna oosuwaa oottoppite” yaagidi xaafiis. (2 Qoronttoosa 6:14; 1 Qoronttoosa 7:39) Neegaa mala ammanuwaa kaallenna uraa ekkiyoogee woy geliyoogee issoy issuwaara moggennaadan oottana danddayees. SHin hara baggaara, naaꞌꞌaykka Xoossaa Yihoowayyo aqidaageeta gidiyoogee issoy issuwaara maayettanau keehi maaddees. Neeni ekkiyo woy geliyo uraara maayettada ufayssan deꞌanaadan Yihooway koyees. Intte naaꞌꞌaa xallay gidennan, Yihoowa gujjin intte heezzu achan dooqettida siiquwaa wodoruwan qashettanaadan i koyees.—Eranchchaa 4:12.

14, 15. Aqo deꞌuwan issippetettay deꞌanaadan maaddiyay issi mala ammanuwaa kaalliyoogaa xallee? Qonccissa.

¹⁴ Xoossaayyo issippe goynniyaageeta gidiyoogee issippetettau keehi koshshiyaaba gidikkokka, harabaykka koshshees. Issoy issuwaara maayettanau, neeyyoonne ne aqo lagge gidanaadan neeni qoppiyo uraayyo issi mala hoollee deꞌana koshshees. Intte hoollee aybee? Leemisuwau, naata yeliyoogaara gayttidaagan intte qofay aybee? Intte intte deꞌuwan kaseyiyoobay aybee? b (Maatiyoosa 6:33) Giiga aqo deꞌuwan, azinaynne machiyaa issoy issuwau loꞌꞌo lagge; qassi issoy issuwau lagge gidiyoogan ufayttoosona. (Leemiso 17:17) Hegau eti koyiyoobay issi mala gidana koshshees. Hegaadaana gidana xayikko, loꞌꞌo laggetettaa medhiyoogee attoshin, aqo deꞌoy laalettennaadan oottanaukka metana danddayees. Gidoshin, neeni ekkanau qoppiyo uri allaxxanau dosiyo issi issibaa neeni dosennaba gidikko, neeni he uraa ekkana woy gelana bessenna giyoogee? Hegaadan gidennan aggana danddayees. Hara gitaban intte koshshay issi mala  gidana danddayees. Hegaa bollikka, ne aqo lagge gidana uraa ufayssiya, wodiyaa aattiyooban issippe allaxxiyoogan he uray ufayttanaadan oottana danddayaasa.—Oosuwaa 20:35.

¹⁵ Intte issoy issuwau injjetiyaageeta gidiyoogee, intte issi issiban intte hanotaa laammiyoogaa bessiyaabappe attin, ubbaban intte issi mala gidiyoogaa bessenna. “Nuuni ubbaban maayettaneesha?” gaada nena oychiyoogaappe, “Nuuni maayettenna wode waatanee? Issoy issuwaa bonchidi, woppu giida hanotan he allaalliyaabaa haasayana danddayiyoo? Woy haasayiyoogee ubbatoo ooshshaa denttettii?” gaada oychiyoogee loꞌꞌo gidana danddayees. (Efisoona 4:29, 31) Neeni aqo oyqqanau koyiyaaba gidikko, otorettiyaanne ba giidobaa xallay likke giya uraappe, qassi zozzu giidi simmenna uraappe woy ba koyiyoobaa xallay hananaadan qoppiya uraappe naagetta.

16, 17. Issi attumaagee woy maccaara aqo lagge gidanaadan qoppiyo uraappe naagana danddayiyoy aybee?

¹⁶ Kiristtaane gubaaꞌiyan aawatettay imettiyoogeeti “kasetidi paacettanau koshshees.” (1 Ximootiyoosa 3:10) Neenikka he maaraa kaallana danddayaasa. Leemisuwau, issi maccaasiyaa hagaadan oychana danddayausu: “I ay mala asee? A laggeti oonee? I ba huuphiyaa naagiya asee? Cima asaa ayba ogiyan oyqqii? Eta soo asay ay malee? I etaara maayettii? Miishshaara gayttidaagan a xeelay aybee? Ushshaa likkiyaappe aattidi uyii? Eesuwan yiillotiya makkalancha uree? Gubaaꞌiyan au ayba aawatetti deꞌii, he aawatettaa waati kiyii? Taani a wozanappe bonchana danddayiyaanaa?”—Wogaabaa 19:32; Leemiso 22:29; 31:23; Efisoona 5:3-5, 33; 1 Ximootiyoosa 5:8; 6:10; Tiita 2:6, 7.

¹⁷ Attumaagee hagaadan oychana danddayees: “Ha  maccaasiyaa Xoossaa siiqiyaanne bonchiya asee? Keettaa loytta oyqqana danddayay? Eta soo asay nuuppe ay naaganee? Wozannaama, minonne qoraphiya asee? Darotoo aybaabaa haasayay? Haratubaa wozanappe qoppiyaariiyye woy ba xallaa siiqiya, bana gattennaban geliyaarii? Ammanettiya asee? Haarettanau eeno giya aseeyye woy odin siyenna, ubba makkalancha asee?”—Leemiso 31:10-31; Luqaasa 6:45; Efisoona 5:22, 23; 1 Ximootiyoosa 5:13; 1 PHeexiroosa 4:15.

18. Issoy issuwaa loytti eranau issippe wodiyaa aattiyo wode, issi issi pacaa akeekiyaaba gidikko, ay qoppana koshshii?

¹⁸ Aqo lagge gidanaadan neeni qoppiyo uri Addaame zare gidida polo gidenna ura gidiyoogaa hassaya. Ubba asi baliyo gishshau, neeni woy aqo lagge gidanaadan neeni qoppiyo uri oottiyo issi issi balay aggi aadhiyooba gidana danddayees. (Roome 3:23; Yaaqooba 3:2) Qassi issi issi pacaa akeekiyoogee ayyaanaaban diccanaadan maaddana danddayees. Leemisuwau, intte issoy issuwaa loytti eranau wodiyaa issippe aattiyo wode issiban maayettibeennabadan qoppa. Siiqettiyaanne issoy issuwaa bonchiya asatikka issi issitoo maayettennaagaa qoppa. (Doomettaabaa 30:2ranne Oosuwaa 15:39⁠ra gatta xeella.) He hanotaa woppu giidi giigissanau guuttaa intte ‘huuphiyaa naagiyoogaa’ tamaarana koshshanddeeshsha? (Leemiso 25:28) Aqo lagge gidanaadan neeni qoppiyo uri ba eeshshaa loyttanau koyii? Neeni shin? Eesuwaara lanccananne yiillotana koshshennaagaa akeekadii? (Eranchchaa 7:9) Metoy merettiyo wode giigissiyoogaa tamaariyoogee intte issoy issuwaara loꞌꞌo hanotan haasayiyaageeta gidanau maaddana danddayees; hegee qassi intte naaꞌꞌay aqo lagge gidikko, keehi maaddees.—Qolasiyaasa 3:13.

19. Issoy issuwaa loytti eranau issippe wodiyaa aattiyo wode wolqqaama meto akeekiyaaba gidikko waatiyoogee eratettee?

¹⁹ Nena keehippe qofissiya metoy merettanaadan  oottiyaabaa akeekiyaaba gidikkoshin? Hegaa malabaa loyttada qoppana koshshees. Neeni keehi siiqiyaaba woy aqo oyqqanau keehi koyiyaaba gidikkonne, hegaa mala wolqqaama metuwaa xaasayada xeelloppa. (Leemiso 22:3; Eranchchaa 2:14) He aawuura gayttidaagan neeni keehippe ixxiyoobaa akeekiyaaba gidikko, aara woy iira medhido zuussaa aggiyoogeenne aqo oyqqanau maachaa maacettennaagee eratetta.

20. Issoy issuwaara loytti erettanau issippe wodiyaa aattiyaageeti bantta kanddoy borissenna mala ay oottana danddayiyoonaa?

²⁰ Intte issoy issuwaara loytti erettanau issippe aattiyo wodee bonchissiyaagaa gidanaadan waatana danddayay? Koyro, ne kanddoy borissennaagaa gidiyoogaa akeeka. Intte heeran, azinanne macho gidibeenna asati issoy issuwaa kushiyaa oyqqiyoogee, yeriyoogee woy qoommiyoogee borissennabee? Hegaadan siiquwaa qonccissiyoogee borissennaba gidikkokka, intte hegaadan oottana danddayiyoy ekkanau woy gelanau qofaa qachiyo wode xalla. Hegaa mala ogiyan siiquwaa qonccissiyoogee tuna gididabaa oottanau woy shaaramuxanau denttettennaadan naagetta. (Efisoona 4:18, 19; Siiquwaa Sabaa 1:2; 2:6; 8:5, 9, 10⁠ra gatta xeella.) Asa wozanay cimmiyaagaa gidiyo gishshau, intterkka issi keettan, issi kifiliyan, eqqida kaame giddon woy shori baynnabaa intte oottanaadan injjetiya harasan wodiyaa aattenna mala naagettana bessees. (Ermmaasa 17:9) Intte issoy issuwaara loytti erettanau issippe aattiyo wodiyaa kandduwaaban geeshsha gidida hanotan aattiyoogee neeni ne huuphiyaa naagiyaagaa gidiyoogaa bessees; qassi nena ne koshshaappe hara uraa hanotay qofissiyoogaa qonccissees. Ubbaappekka aaruwan, geeshshatettaa naagidi he wodiyaa aattiyoogee geeshsha gidenna hanotaappenne  shaaramuxiyoogaappe haakkanaadan azazida, Xoossaa Yihoowa ufayssees.—Galaatiyaa 5:19-21.

21. Issoy issuwaa loytti eranau issippe aattiyo wodiyaa bonchissiya hanotan aattanau qoncce gidida ogiyan haasayana koshshiyoobay ayba gidana danddayii?

²¹ Naaꞌꞌanttoy, issoy issuwaa loytti eranau issippe aattiyo wodiyaa bonchissiya hanotan aattiyoogee, qoncce gidida ogiyan haasayiyoogaakka gujjees. Aqo lagge gidanau intte maayettiyo wode, issi issi allaalliyaa qoncciyan haasayana koshshees. Intte awan deꞌanee? Intte naaꞌꞌaykka ooso oottana koshshii? Naata yelanau koyeetii? Aqo oyqqiyo wode inttena qofissana danddayiya, geella intteppe issi uri kase oottidobaa yootiyoogeekka bessiyaaba. Hegee wolqqaama acuwaa woy intte oottana bessiyoobaa woy intte bolli deꞌiya iita harggiyaa woy hara hanotaa gidana danddayees. Eedisiyaa harggiyan oyttiya bayresee bollan deꞌiyo daro asati, he sahuwan oyqettidoogaa erissiya malaatay sohuwaara beettenna gishshau, kase daro asaara asho gaytotettaa polida woy jallissiya xaliyaa suuttaa xapho baggaara goꞌettida uray suuttaa maraamarettanaadan issi asi woy a yelidaageeti oychiyoogee bala gidenna. Maraamarettin i he bayresiyan oyqettidoogee erettikko, aqo lagge gidanaadan i qoppido uri aggibayana danddayees; bayresiyan oyqettida uri aqo lagge gidanaadan qoppiyo uraa wolqqanttana koshshenna. SHori baynna hanotan kase deꞌida uri ekkanau woy gelanau qoppiyo uraara wodiyaa issippe aattiyoogaa doommanaappe kase ba dosan maramarettiyoogee loꞌꞌo.

22, 23. (a) Bullachaa makkiyo wode issi uri bessennabaa oottana danddayiyoy ayba ogiyaanee? (b) Bullachaa kessiyoonne aqo oyqqidi deꞌiyo wodiyaabaa qoppiyo wode bessiya ay mala qofaa qoppana koshshii?

²² Bullachaappe guuttaa kasetiya wodetun intte  bullachaa makkiyoogan bichaariiddi takkana danddayeeta. Wolqqaama bullachchaa kessennan aggiyoogee intte daafuray darenna mala maaddees. Wolqqaama bullachaa kessiyoogee dabbotanne harata ufayssana danddayees; shin bullachiyaageenne bullashettiyaara, qassi eta soo asay daafuranaadaaninne miishshaa wuranaadan oottana danddayees. Issi issiban heeraa wogaa kaalliyoogee bessiyaaba; shin ubba wogaa kaalliyoogeenne hara asaara annaacettiyoogee bullachay maaraa xayanaadaaninne intte ufayttennaadan oottana danddayees. Haratu hanotaa qoppiyoogee bessiyaaba gidikkokka, bullachaara gayttidabaa kuuyana bessiyay bullachiyaagaa.—Yohaannisa 2:9.

²³ Intte bullachay issi gallassi aadhiyoogaa, qassi intte aqo deꞌoy intte deꞌo laytta ubban deꞌiyaaba gidiyoogaa hassaya. Intte bullachaabau unꞌꞌettiyoogaappe, kaaletuwau Xoossaa Yihoowa woossa; qassi aqo oyqqada deꞌana wodiyaabaa kasetada halcha. Hegaadan oottiyoogan giiga aqo deꞌuwau loytta giigettana danddayaasa.