1. Yihooway so asau halchidobay aybee?

 YIHOOWAY Addaamanne Hewaano azinanne macho oottido wode, Addaamee Ibraysxxe qaalan xaafettida danttotuppe koyro gididaagaa yootiyoogan ba ufayssaa qonccissiis. (Doomettaabaa 2:22, 23) SHin Medhidaagee asaa naati ufayttanaadan oottiyoogaappekka aadhiyaabaa halchiis. I azinaynne machiyaa, qassi so asay ba sheniyaa polanaadan koyiis. I koyro azinaunne macheeyyo hagaadan giis: “Yelettite; corattite; ha sa7aa kumitenne haarite; abbaa moliyaa, saluwaa kafuwaanne biittaa bolli woxxi qaaxxiya, paxa de7iya mereta ubbaa haarite.” (Doomettaabaa 1:28) Hegee keehi ufayssiya ooso! Addaameenne Hewaana Yihooway koyiyoogaadan kumetta hanotan azazettiyaaba gidiyaakko, etinne eti yelana naati keehi ufayttana shin!

2, 3. So asay ha wodiyan keehi ufayttana danddayiyoy ayba ogiyaanee?

² Ha wodiyankka, so asay Xoossaa sheniyaa issippe oottiyo wode keehi ufayttees. Kiitettida PHauloosi, Xoossaa Qaalay “Xoossaa milatiyoogan [issi uri bana] lohissiyoogee ha77ikka sinttappekka de7uwaa immana giyo gishshau, ubbabaukka” goꞌꞌiyoogaa xaafiis. (1 Ximootiyoosa 4:8) Geeshsha Maxaafay yootiyo Yihoowa kaaletuwaa kaalliya, Xoossau aqida so asay “ha77ikka” ufayttees. (Mazamure 1:1-3; 119:105; 2 Ximootiyoosa 3:16) So asa ubbay Geeshsha Maxaafay yootiyoobaa oosuwan peeshshenna keettaappe, issi ura xallay hegaa oosuwan peeshshiyo keettan hanotay loꞌꞌo.

 ³ So asa ufayssau maaddiya, Geeshsha Maxaafay yootiyo darobay ha maxaafan qoncciis. Hegeetuppe amaridaageeti ha maxaafan darotoo qonccidoogaa akeekennan aggakka. Hegaadan qonccidoy aybissee giikko, hegeeti so asaa deꞌuwan dumma dumma ginan keehippe goꞌꞌiyaabaa qonccissiyo gishshataassa. Geeshsha Maxaafay yootiyo ha baaso siraatata oosuwan peeshshanau baaxetiya so asay Xoossau aqiyoogee ‘haꞌꞌikka deꞌuwaa immanaagaa’ akeekees. He keehi maaddiya baaso siraatatuppe oyddata ane zaarettidi beꞌoos.

4. Ba huuphiyaa naagiyoogee aqo deꞌuwan keehippe koshshiyoy aybissee?

⁴ Kawuwaa Solomoni, “Ba huuphiyaa naagenna asi dirssai meqqido katamaa mala” yaagiis. (Leemiso 25:28; 29:11) ‘Ba huuphiyaa naagiyoogee’ aqo deꞌuwan ufayttanau koyiyaageetussi keehippe koshshiyaaba. Hanqqettiyoogaa woy shori baynnabaa poliyoogaa mala iita eeshshay, geella paxikkokka daro layttappe guyyiyan paxiya masunttay kiyanaadan oottees.

5. Polo gidenna asaa naati bantta huuphiyaa naagana danddayiyoy ayba ogiyaanee, qassi ayba goꞌꞌaa demmiyoonaa?

⁵ Addaame zare gidida ooninne polo gidenna ba asatettaa kumetta hanotan naagana danddayenna. (Roome 7:21, 22) Gidikkokka, ba huuphiyaa naagiyoogee geeshsha ayyaanaa ayfiyaa macaratuppe issuwaa. (Galaatiyaa 5:22, 23) Hegaa gishshau, nuuni nu huuphiyaa naaganaadan Xoossaa ayyaanay maaddees; he maaduwaa demmanau nuuni woossana, Geeshsha Maxaafan deꞌiya loꞌꞌo zoriyaa oosuwan peeshshana, qassi he eeshshay deꞌiyoogeetuura laggetananne he eeshshay baynnaageetuppe haakkana koshshees. (Mazamure 119:100, 101, 130; Leemiso 13:20; 1 PHeexiroosa 4:7) Hegaadan oottiyoogee ‘shaaramuxanaadan’ paacee gakkiyo wode, nuuni hegaappe baqatanaadan maaddees. (1 Qoronttoosa 6:18) Ooyettokko, daro ushshaa uyokko woy ushshay amale  gidennaadan naagettoos. Qassi yiillotanaadan oottiyaabaanne metuwaa woppu giidi genccana danddayoos. Naata gujjin ubbay, ayyaanaa ayfiyaa macara gidida keehippe koshshiya ha eeshshay deꞌiyoogeeta gidoos.—Mazamure 119:1, 2.

6. (a) Huuphe gidiyoogaara gayttidaagan Xoossay kessido maaray aybee? (b) Issi Kiristtaanee huuphe gidiyo maatay a soo asau ufayssaa demissiyaagaa gidanaadan ay hassayana koshshii?

⁶ Keehippe maaddiya baaso siraatatuppe naaꞌꞌanttoy huuphe gidiyo maataa bessiyaagaadan xeelliyoogaa. PHauloosi, “Kiristtoosi attumaasa ubbaayyo huuphe gidiyoogaa, attumaasi maccaasassi huuphe gidiyoogaanne qassi Xoossai Kiristtoosassi huuphe gidiyoogaa intte erana mala koyais” yaagidi ubbabau maaray deꞌiyoogaa qonccissiis. (1 Qoronttoosa 11:3) Hegee, attumaagee so asaa sintta xeera gididi kaalettees, a machiyaa aara hashetausu, qassi naati banttana yelidaageetussi azazettoosona giyoogaa. (Efisoona 5:22-25, 28-33; 6:1-4) Gidikkonne, huuphe gidiyoogee ufayssaa demissiyoy bessiyaagaadan goꞌettiyo wode xallaana gidiyoogaa akeeka. Xoossau aqida azinati huuphe gidiyo maataa naaqqanau goꞌettana bessennaagaa eroosona. Eti banttau huuphe gidiya Yesuusa leemisuwaa kaalloosona. Yesuusi “ubbaban ubbaappe bollaara Goda” gidikkokka, i ‘asaayyo oottanau yiisippe attin, asi au oottanaadan yibeenna.’ (Efisoona 1:22; Maatiyoosa 20:28) Hegaara issi mala ogiyan, issi Kiristtaanee huuphe gidiyo maataa ba goꞌꞌau gidennan, ba maccaasiyoonne ba naata maaddiyaabaa oottanau goꞌettees.—1 Qoronttoosa 13:4, 5.

7. Issi machiyaa son a oottana mala Xoossay immidobaa polanaadan maaddiya Geeshsha Maxaafaa baaso siraatati awugeetee?

⁷ Xoossau aqida maccaasiyaa ba azinaara annaacetukku woy a bolli xalttaamukku. A ufayssan ba azinaara hashetausunne maadettausu. Geeshsha Maxaafay ‘azinay  ba maccaaseeyyo huuphe’ gidiyoogaa yootees. (Efisoona 5:23) Azinaa gelida maccaasiyaa “higgiyan aara qashetta uttaasu.” (Roome 7:2) Geeshsha Maxaafay a ‘injjetiyaaronne maaddiyaaro’ gidiyoogaakka yootees. (Doomettaabaa 2:20) A ba eeshshaaninne cinccatettan azinaappe dummatiyo gishshau koshshiyaaban a maaddausu. (Leemiso 31:10-31) Geeshsha Maxaafay maccaasiyaa azinau ‘siiqo’ gidiyoogaakka yootees; ha sohuwan siiqo geetettida qaalay ba aqo laggiyaara hashetidi oottiya uraa qonccissiya qaala. (Milkkiyaasa 2:14) Geeshsha Maxaafan deꞌiya ha baaso siraatati azinaynne machiyaa issoy oottiyoobaa haray akeekidi issoy issuwaa bessiyaagaadan oyqqanaadaaninne bonchanaadan maaddoosona.

8, 9. Son deꞌiya ubbay issoy issuwaara haasayiyo ogiyaa kaseegaappe loyttanau maaddiya issi issi baaso siraatata yoota.

⁸ Issoy issuwaara haasayiyoogee koshshiyaaba gidiyoogee ha maxaafan darotoo qoncciis. Aybissi? Asay issoy issuwaara haasayiyoogeenne issoy yootiyoobaa haray ezggiyoogee metuwaa sohuwaara giigissanau maaddiyo gishshataassa. Hegee biya asaynne simmiya asay goꞌettiyo oge mala gidiyoogee darotoo qoncciis. Kiitettida Yaaqoobi, ‘Asay ubbay siyanau eesoto; shin haasayanau eesotoppo’ yaagidi hegaa yootiis.—Yaaqooba 1:19.

⁹ Nuuni haasayiyo ogiyaabaa qoppiyoogeekka keehippe koshshiyaaba. Haasayiyo wode dirbbiyoogee, palamettiyoogee woy boriyoogee maayettennaadan oottees. (Leemiso 15:1; 21:9; 29:11, 20) Nuuni yootiyoobay tuma gidikkonne, qareti baynna ogiyan, otoruwan woy akeekennan haasayiyaaba gidikko, nu haasayiyoobay goꞌꞌiyaaba gidennan qohiyaaba gidana danddayees. Nu haasayay ‘siyanau kehiyaagaa’ gidana koshshees. (Qolasiyaasa 4:6) Nuuni haasayiyoobay “biraa bolli tigido worqqaa alleequwaa mala” gidana bessees. (Leemiso 25:11) So asay issoy issuwaara maara haasayiyoogee eti keehippe ufayttanaadan oottees.

10. Aqo deꞌuwan keehippe koshshiya siiqo qommoy awugee?

¹⁰ “Siiquwaa” giya qaalay ha maxaafan ubba shemppotun deꞌees. Ha maxaafan odettida siiquwaa qommotuppe waannatiyaagaa hassayay? Azinaynne machiyaa siiqettiyo siiqoy (Giriikettuwan eroos) aqo deꞌuwan keehippe koshshiyoogee tuma. Qassi giiga aqo deꞌuwan azinaynne machiyaa wozanappe siiqettananne issoy issuwau lagge (Giriikettuwan filiyaa) gidana bessiyoogeekka tuma. SHin ubbaappe aaruwan koshshiya siiqo qommoy Giriikettuwan agaappe geetettiyaagaa. Hagee, nuuni Yihoowa, Yesuusanne asaa siiqana koshshiyo siiqo. (Maatiyoosa 22:37-39) Hagee, Yihooway asaa naata siiqiyo siiqo. (Yohaannisa 3:16) Nuuni he siiquwaa nu aqo laggiyaassinne nu naatussi qonccissana danddayiyoogee keehi ufayssiyaaba!—1 Yohaannisa 4:19.

11. Siiqoy aqo deꞌuwan keehi goꞌꞌiyoy ayba ogiyaanee?

¹¹ Ubbaappe aadhiya ha siiqoy aqo deꞌuwan ‘ubbabaa issippe shiishshi qachees.’ (Qolasiyaasa 3:14) Ha siiqoy aqo laggeta issippe shiishshi qachees; qassi eti issoy issuwaayyoonne bantta naatuyyo kehabaa qoppanaadan oottees. So asaa metiyaabay gakkiyo wode, eti issippetettan he metuwaa danddayanaadan siiqoy maaddees. Aqo laggeti cimiyo wode, eti issoy issuwaa kaafanaadaaninne ubbatoo nashshanaadan siiqoy maaddees. “Siiqoi . . . uuzettenna. . . . Siiqoi ubbabaa danddayees. Ubbabaikka hanana giidi, ufaissan naagees. Ubbabaa genccees. Siiqoi mulekka xayenna.”—1 Qoronttoosa 13:4-8.

12. Aqo laggeti Xoossaa siiqiyoogee eta aqo deꞌoy minnanaadan oottiyoy aybissee?

¹² Azinaanne machee issippetettay keehippe minniyoy, eti issoy issuwaa siiqiyoogaa xalla gidennan, ubbaappe aaruwan Yihoowa siiqiyoogaana. (Eranchchaa 4:9-12) Aybissi? Kiitettida Yohaannisi, “Nuuni Xoossaa siiqiyoogee a azazuwaa naagiyoogaa” yaagidi xaafiis. (1 Yohaannisa 5:3) Hegaa gishshau, azinaynne machiyaa bantta naati Xoossau aqanaadan tamaarissana koshshiyoy,  eti bantta naata wozanappe siiqiyo gishsha xallaassa gidennan, hagee Yihoowa azazo gidiyo gishshataassa. (Zaarettido Wogaa 6:6, 7) Eti shori baynna asho gaytotettaappe haakkiyoy, issoy issuwaa siiqiyo gishsha xallaassa gidennan, “shaaramuxanau qaaqqatiyaageetanne shaaramuxiyaageeta pirddana,” Yihoowa siiqiyo gishshataassa. (Ibraawe 13:4) Aqo laggetuppe issoy aqo deꞌuwan wolqqaama metoy merettanaadan oottiyaaba gidikkokka, Yihoowa siiqiyoogee hankko aqo laggee Geeshsha Maxaafaa baaso siraataa kaallanaadan oottees. Yihoowa siiqiyoogaappe denddidaagan, issoy issuwaa siiqiya so asay keehippe ufayttees!

13. Xoossaa sheniyaa oottanau murttiyoogee issi uri tumuppe loꞌꞌo gididabaa ubbatoo qoppanaadan waati maaddii?

¹³ Issi Kiristtaanee ba deꞌo ubban Xoossaa sheniyaa oottees. (Mazamure 143:10) Hegaadan oottiyoogee Xoossaassi aqidoogaa bessiyaaba. Xoossaa sheniyaa oottiyoogee  so asay tumuppe loꞌꞌo gididabaa ubbatoo qoppanaadan maaddees. (Piliphphisiyuusa 1:9, 10) Leemisuwau, Yesuusi hagaadan giis: “Taani na7aa a aawaappe, na7iyo i aayeeppe, na7aa machchiyookka i bolloteeppe shaakkanau yaas; asassi morkketi a so asata gidana.” (Maatiyoosa 10:35, 36) Yesuusi giidoogaadan, a kaalliyaageetuppe darota eta soo asay eqettiis. Hegee keehippe azzanttiyaaba! Gidikkokka, so asaa siiqoy nuuni Xoossaa Yihoowanne Yesuus Kiristtoosa siiqiyoogaappe aadhana bessenna. (Maatiyoosa 10:37-39) So asay eqettishinkka issi uri hegaa gencciyaaba gidikko, Xoossau aqido gishshau au deꞌiya loꞌꞌo eeshshaa beꞌiyo wode, eqettiyaageeti bantta qofaa laammana danddayoosona. (1 Qoronttoosa 7:12-16; 1 PHeexiroosa 3:1, 2) Hegaadan gidana xayikkokka, yedetaa gishshau giidi Xoossau oottiyoogaa aggiyoogee aynne maaddenna.

14. Yelidaageeti Xoossaa sheniyaa oottanau koyiyoogee eti naata loytti dichanaadan maaddiyoy ayba ogiyaanee?

¹⁴ Xoossaa sheniyaa oottiyoogee so asay suure kuushshaa kuuyanaadan maaddees. Leemisuwau, issi issi biittan, yelidaageeti bantta naata minjja miishshadan xeelliyo gishshau, cimiyo wode naati banttana xeellanaadan naagoosona. Gastta naati cima aawaanne aayyiyo xeelliyoogee bessiyaaba gidikkokka, hegaa gishshau giidi yelidaageeti bantta naati miishshaa yedettanaadan oottana bessenna. Yelidaageeti ayyaanaabaappe aattidi aquwaabaa siiqanaadan oottidi naata dichiyaaba gidikko, hegee naata aynne goꞌꞌenna.—1 Ximootiyoosa 6:9.

15. Xoossaa sheniyaa poliya aayo gidiyoogan, Ximootiyoosa aayyiyaa Euniiqa loꞌꞌo leemiso gidiyoy ayba ogiyaanee?

¹⁵ Hegaara gayttidaagan, PHauloosa lagge gidida yelaga Ximootiyoosa aayyiyaa, Euniiqa loꞌꞌo leemiso. (2 Ximootiyoosa 1:5) I azinay ammanennaagaa gidikkokka, Euniiqa ba aaye Loydiira, Ximootiyoosi Xoossau aqidaagaa gidanaadan loytta dichaasu. (2 Ximootiyoosa 3:14, 15) Ximootiyoosi gitatido wode, misoonaawe gididi Kawotettaa  mishiraachuwaa sabbakanau PHauloosaara issippe baanaadan Euniiqa eeno gaasu. (Oosuwaa 16:1-5) Ba naꞌay gooba misoonaawe gidido gishshau ayba ufayttadeeshsha! I Xoossau aqida asa gididoogee naatettan loyttidi loohidoogaa bessiyaaba. Ximootiyoosi iira deꞌenna gishshau, Euniiqa laamotiyaaba gidikkokka, i ammanettidi haggaaziyoogaa siyada ufayttidoogee qoncce.—Piliphphisiyuusa 2:19, 20.

16. Naꞌa gididi deꞌiyo wode, Yesuusi oottana bessiyaabaa ay oottidee, shin a waanna halchoy aybee?

¹⁶ Yesuusi Xoossau yayyiya keettan dicciis; qassi gitaa gididi issi naꞌi ba aayeessi qoppana bessiyoogaadan qoppiis. (Luqaasa 2:51, 52; Yohaannisa 19:26) SHin Yesuusa waanna halchoy Xoossaa sheniyaa poliyoogaa; qassi hegee i asaa naati merinaa deꞌuwaa demmanaadan hanotaa injjeyiyoogaakka gujjees. I ba polo deꞌuwaa nagarancha asaa naata wozanau yarshsho oottidi immido wode hegaa poliis.—Marqqoosa 10:45; Yohaannisa 5:28, 29.

17. Yesuusi ammanettidi oottidobay Xoossaa sheniyaa poliyaageetuyyo ufayssiya ayba hidootay deꞌanaadan oottidee?

¹⁷ Yesuusi saluwan deꞌanaadan Yihooway a hayquwaappe denttiis; yaatidi saluwaa Kawotettau Kawo oottidi sunttiyoogan assi gita maataa immiis. (Maatiyoosa 28:18; Roome 14:9; Ajjuutaa 11:15) Yesuusa yarshshoy asaa naatuppe amaridaageeti he Kawotettan aara haaranau doorettanaadan oottiis. He yarshshoy ashkke gidida asaa naati polo gididi saꞌay gannate gidiyo wode deꞌanaadankka oottees. (Ajjuutaa 5:9, 10; 14:1, 4; 21:3-5; 22:1-4) Nuussi ha wodiyan deꞌiya gita maataappe issoy ha ufayssiya mishiraachuwaa hara asau yootiyoogaa.—Maatiyoosa 24:14.

18. So asaanne hara asaa ubbaa hassayissiyoobaynne minttettiyoobay aybee?

¹⁸ Kiitettida PHauloosi qonccissidoogaadan, Xoossau  aqiyoogee i asaayyo ‘sinttappe’ immanau qaalaa gelido he anjjuwaa demmanau hidootanaadan maaddees. Hagee aybippenne keehi ufayssiyaaba! “Ha sa7ainne ha sa7an asi amottiyo ubbabai aadhdhana. SHin Xoossai giidoogaa oottiya urai merinau” deꞌanaagaa hassaya. (1 Yohaannisa 2:17) Yaatiyo gishshau, neeni naꞌa gidin woy yelidaagaa gidin, azina gidin woy macho gidin woy naata nerkka dichiyaagaa gidin woy naati baynnaagaa gidin, Xoossaa sheniyaa polanau baaxeta. Nena wolqqaama metoy gakkiiddi deꞌiyaaba gidikkokka, neeni deꞌo Xoossaa ashkkara gidiyoogaa mule dogoppa. Hegaa gishshau, neeni oottiyoobay Yihoowa ufayssiyaaba gido. (Leemiso 27:11) Qassi ne deꞌoy ha wodiyan ufayssaa, sinttappe yaana ooratta alamiyan merinaa deꞌuwaa demissiyaagaa gido!