1, 2. Panttatetta wodee demissiyo ufayssaynne kaalettiyo metoy aybee?

 PANTTATETTA wodiyan deꞌiya issi naꞌaa hanotay ichashu laytta naꞌa woy ubba tammu laytta naꞌa hanotaappe keehi dumma. Panttatettaara gayttidaagan paaceenne metoy gakkiyaaba gidikkokka, he wodee ufayssaanne anjjuwaa demissana danddayees. Leemisuwau, Yooseefa, Daawita, Yoosiyaasanne Ximootiyoosa mala yelagati banttappe koyettiyaabaa oottananne Yihoowaara loꞌꞌo dabbotaa medhana danddayidosona. (Doomettaabaa 37:2-11; 1 Sameela 16:11-13; 2 Kawotu 22:3-7; Oosuwaa 16:1, 2) Ha wodiyan deꞌiya daro yelagatikka hegaadan oottidosona. Hegeetuppe issota issota neeni erennan aggakka.

² SHin issotu issotuyyo panttatettay keehi metiya wode. Naatussi he wodiyan eeshshay sohuwaara sohuwaara laamettees. Panttatetta wodiyan naati bantta sheniyaadan deꞌanau koyiyo gishshau, aawaynne aayyiyaa azaziyo wode lanccana danddayoosona. Gidikkokka, hegaa mala yelagati akeekay paccidoogeeta gidiyo gishshau, yelidaageeti siiquwaaninne danddayan eta maaddana koshshees. Ee, panttatetta wodee ufayssiyaagaa gidikkokka, yelagatussinne eta yelidaageetussi metiya wode gidana danddayees. Yelagata he wodiyan waati maaddan danddayeetii?

3. Yelidaageeti panttatettan deꞌiya bantta naati keehi goꞌettanaadan oottana danddayiyoy ayba ogiyaanee?

³ Geeshsha Maxaafaa zoriyaa kaalliya aawaynne aayyiyaa  bantta yelaga naati he metuwaa eqettidi gastta asa gidanaadan banttau danddayettida ubbabaa oottoosona. Ay wodekka gidin, Geeshsha Maxaafaa baaso siraataa oosuwan peeshshiya, ubba biittan deꞌiya yelidaageetinne eta yelaga naati anjjettoosona.—Mazamure 119:1.

4. Naati panttatettan deꞌiyo wode xuurabaa haasayiyoogee hara wodeegaappekka aaruwan koshshiyoy aybissee?

⁴ Geeshsha Maxaafay, “Zoretai xayikko, halchchidobai halettees” yaagees. (Leemiso 15:22) Naati naatettan deꞌiyo wode xuurabaa zorettiyoogaa koshshidaba gidikko, eti son aattiyo wodiyaappe daruwaa timirtte keettaa laggetuura woy hara laggetuura aattana danddayiyo yelagatetta wodiyan hegaadan oottiyoogee keehippe koshshees. Naati yelidaageetuura qoncce gidida hanotan bantta xuuraa haasayennaba gidikko, yelaga naatu wozanaa erana danddayettenna. Hegaa gishshau, qoncce gidida hanotan ubbatoo haasayana danddayiyoy ayba ogiyaanee?

5. Panttatettan deꞌiya naati banttana yelidaageetuura haasayiyoogaa waatidi xeellana koshshii?

⁵ Hegaara gayttidaagan naatinne eta yelidaageeti bantta gishshaa gishshaa oottana bessees. Panttatettan deꞌiya naati banttana yelidaageetuura naatettan deꞌiyo wode haasayiyoogaadan haasayanau metootana danddayiyoogee tuma. Gidikkokka, “Kaalettiyaabi xayikko, kawotettai kunddees; shin daro zoriyaageeti de7ikko, saroi de7ees” yaagiyaagaa hassaya. (Leemiso 11:14) Ha qaalay yelagatussinne gasttatussi ubbau hanees. Hegaa akeekiya yelaga naati kaseegaappe deexo metoy gakkiyoogeeta gidiyo gishshau, panttatettaa wodiyankka kaaletoy koshshiyoogaa eroosona. Yelidaageeti deꞌuwan darobaa beꞌido gishshaunne daro layttau bantta naata  siiqido gishshau, Yihoowa ammaniya aawaynne aayyiyaa banttana loytti zorana danddayiyoogaa naati akeekana koshshees. Yaatiyo gishshau, cincca gidida naati, panttatettaa wodiyan yelidaageetu zoriyaa koyoosona.

6. Wozannaama gidida siiqiya aawaynne aayyiyaa panttatettan deꞌiya bantta naatuura haasayanau waatana bessii?

⁶ Qoncce gidida ogiyan haasayiyoogaa giyoogee, naati haasayissanau koyiyo wode yelidaageeti haasayana koshshees giyoogaa. Neeni aawa woy aayo gidikko, naatuura ubbatoo haasayana koyiyaagaa gidana bessees. Hegee metiyaaba gidana danddayees. Geeshsha Maxaafay, “Co77u gaanau wodee de7ees; qassi haasayanaukka wodee de7ees” yaagees. (Eranchchaa 3:7) Panttatettan deꞌiya ne naꞌay haasayana koyiyo wodee, neeni coꞌꞌu gaanau koyiyo wode gidana danddayees. Geella he wodee neeni buzo xinaatiyau, allaxxanau woy son issi issibaa oottanau bazzido wode gidana danddayees. Gidikkokka, ne naꞌay nena haasayissanau koyikko, ne qoppidobaa wottashshada, ne naꞌay yootiyoobaa ezgga. Yaatana xayikko, hara wode haasayissanau koyennan aggana danddayees. Yesuusa leemisuwaa hassaya. Issi wode, i shemppanau koyiis. SHin i yootiyoobaa siyanau daro asay akko yin, shemppiyoogaa aggi bayidi eta tamaarissiyoogaa doommiis. (Marqqoosa 6:30-34) Daro yelagati banttana yelidaageeti oosoy daridoogeeta gidiyoogaa eroosona; shin naati koyiyo wode yelidaageeti maaddanaagaa ammanettana koshshees. Hegaa gishshau, naati haasayissanau koyiyo wode haasayissiyaagaanne eta hanotaa akeekiyaagaa gida.

7. Yelidaageeti waatana koshshennee?

⁷ Ne panttatetta wodiyaabaa hassayada etaara naaciyaagaa gidana koshshees. Yelidaageeti bantta naatuura issippe wodiyaa aattiyoogan ufayttana koshshees. Yelidaageeti oosuwaa wurssi simmin deꞌiya wodiyan ay oottiyoonaa? Eti oosuwaa wurssi simmin deꞌiya wodiyaa so asaara gayttennabaa oottanau ubbatoo koyiyaaba  gidikko, yelaga naati hegaa sohuwaara akeekoosona. Panttatettan deꞌiya naati bantta aawaappenne aayeeppe aaruwan, timirtte keettaa laggeti banttana nashshiyaabadan qoppikko, metoy merettana danddayees.

8. Naati ammanettiyoogaa, minnidi oottiyoogaanne loꞌꞌo eeshshaa goꞌꞌaa akeekanaadan waatana danddayeetii?

⁸ Ammanettiyoogaanne mino oosancha gidiyoogaa goꞌꞌaa bantta naati akeekanaadan kasetidi tamaarissibeennaba gidikko, eti panttatettan deꞌiyo wode, yelidaageeti banttau danddayettida hanota ubban hegaa akeekissana koshshees. (1 Tasalonqqe 4:11; 2 Tasalonqqe 3:10) Qassi naati kandduwan loꞌꞌo gididi geeshshatettan deꞌiyoogee keehippe koshshiyoogaa kumetta wozanaappe ammaniyaakkonne yelidaageeti akeekiyoogeekka bessiyaaba. (Leemiso 20:11) Aaway woy aayyiyaa hegaara gayttidaagan leemiso gididi darobaa haasayissana koshshees. Ammanenna azinati bantta maccaasati ‘palamettennan, yashshatettan deꞌiyoogaa beꞌidi ammanana’ danddayiyoogaadan, yelagati bantta aawatunne aayetu eeshshaa beꞌiyoogan oottana bessiyo suurebaa tamaarana danddayoosona. (1 PHeexiroosa 3:2) Naati iitabaa tamaarissiya daro asaara  gayttiyo gishshaunne cimmanau darobaa yootiya asaara gayttiyo gishshau, leemiso gidiyoogaa xallay gidenna. Hegaa gishshau, bantta naatussi qoppiya aawatinne aayeti bantta yelaga naati beꞌiyoobaanne siyiyoobaa ayba ogiyan xeelliyaakko erana koshshees; qassi hegee eti loꞌꞌo hanotan haasayanaadan oottees.—Leemiso 20:5.

9, 10. Yelidaageeti bantta naata asho gaytotettaabaa tamaarissana koshshiyoy aybissee, eti waati tamaarissana danddayiyoonaa?

⁹ Ubba qassi asho gaytotettaara gayttidaagankka hegee keehippe koshshiyaaba. Yelidaageetoo, intte naatuura asho gaytotettaabaa haasayanau yeellateetii? Intte yeellatiyaaba gidikkokka, hegaara gayttidabaa intte yelaga naati hara asappe siyana danddayiyo gishshau, haasayanau baaxetite. Eti hegaa intteppe siyana xayikko, hegaara gayttidabaa bala ogiyan hara asaappe siyana danddayoosona. Yihooway asho gaytotettaara gayttidabaa Geeshsha Maxaafan yootanau yeellatibeenna; yelidaageetikka yeellatana bessenna.—Leemiso 4:1-4; 5:1-21.

¹⁰ Geeshsha Maxaafan asho gaytotettaara gayttidaagan qoncce kaaletoy deꞌiyo gishshaunne he kaaletoy ha wodiyaukka haniyaagaa gidiyoogaa xeelliyaagan Yihoowa Markkati giigissiyo xuufetun darobay qoncciyo gishshau keehi ufayttoos. Neeni hegan maadettana danddayaasa. Leemisuwau, Yelagati Oychiyo Oyshaa—Oosuwan Peꞌiya Zaaruwaa giya naaꞌꞌu maxaafatun deꞌiya loꞌꞌo zoriyaa oyqqida Shemppota ne naꞌaara woy ne naꞌeera aybissi tobbikkii? Hegaadan oottiyoogan keehippe goꞌettana danddayeeta.

11. Bantta naati Yihoowayyo waati oottana koshshiyaakko yelidaageeti tamaarissiyo ubbaappe aadhiya ogee aybee?

¹¹ Yelidaageeti bantta naatuura tobbana bessiyo keehi koshshiyaabay aybee? Kiitettida PHauloosi, “Intte naata [Yihoowa] seeraaninne zoriyan [dichchite]” giidi xaafido wode hegaa yootiis. (Efisoona 6:4) Naati Yihoowabaa  ubbatoo tamaarana koshshees. Eti a siiqiyoogaa tamaarana bessees; qassi ayyo oottanau koyana koshshees. Hegaara gayttidaagankka, leemiso gidiyoogan darobaa tamaarissana danddayeeta. Panttatettan deꞌiya naati banttana yelidaageeti ‘Xoossaa kumetta wozanaappe, kumetta shemppuwaappenne kumetta qofaappe siiqiyoogaa,’ qassi hegee banttana yelidaageetu deꞌuwaa loyttidoogaa akeekiyo wode, etikka hegaadan oottana danddayoosona. (Maatiyoosa 22:37) Yelagati banttana yelidaageeti asatettau koshshiyaabaa bessiyaagaadan xeelliyoogaanne Xoossaa Kawotettaa kaseyiyoogaa akeekiyo wode, eta qofaykka hegaa mala gidana danddayees.—Eranchchaa 7:12; Maatiyoosa 6:31-33.

12, 13. So asaa xinaatee muruta gidanaadan ay akeekana koshshii?

¹² Yelagati ayyaanaabaa xoqqu ootti xeellanaadan tamaarissanau so asay saaminttan saaminttan Geeshsha Maxaafaa xannaꞌiyo prograamee keehi maaddees. (Mazamure 119:33, 34; Leemiso 4:20-23) Hegaadan ubbatoo xannaꞌiyoogee keehippe koshshees. (Mazamure 1:1-3)  Yelidaageetinne naati so asaa xinaatiyaa hara prograametuppe kaseyana bessiyoogaa akeekana koshshees. Hegaa bollikka, so asaa xinaatee murutanaadan loꞌꞌo xeelay deꞌiyoogeeta gidana bessees. Issi aaway hagaadan giis: “So asaa xinaatiyaa kaalettiya uri xinaatiyaa wode ufayssiya, woppu giidanne boncho hanotay deꞌanaadan oottana koshshees; shin yeda gidana bessenna. Ubbatoo suure hanotay deꞌanaadan oottiyoogee metiyaaba gidana danddayees; qassi yelagatu qofaa ubba wode suurissana koshshees. Hanotati issitoo woy naaꞌꞌutoo miikketana xayikko, hara wode giigissanau baaxetiyoogaa aggoppa.” I ubba wode xinaatiyaa doommanaappe kase, xinaatiyau shiiqiya ubbatu xeelay suure gidanaadan maaddana mala Yihoowakko woossiyoogaakka yootiis.—Mazamure 119:66.

¹³ Ammaniya aawaayyo woy aayeeyyo so asaa xinaatiyaa kaalettiyo aawatettay deꞌees. Issi issi aawati woy aayeti tamaarissiyoogan gooba gidennan aggana danddayoosona; hegaa gishshau, so asaa xinaatiyaa ubbatoo ufayssiyaagaa oottanau metootana danddayoosona. SHin yelagatettan deꞌiya ne naata “oosuwaaninne tumatettan” siiqiyaaba gidikko, eti bantta huuphiyaa kawushshiyoogaaninne ammanettiyaageeta gidiyoogan ayyaanaaban diccanaadan maaddanau koyaasa. (1 Yohaannisa  3:18) Eti issi issitoo amassalana danddayoosona; shin neeni etau wozanappe qoppiyoogaa akeekana danddayoosona.

14. Yelagata ayyaanaabaa tamaarissiyo wode Zaarettido Wogaa 11:18, 19 waatidi oosuwan peeshshana danddayettii?

¹⁴ Ayyaanaaban keehi koshshiyaabata tamaarissana bessiyoy so asaa xinaatiyaa wode xalla gidenna. Yihooway yelidaageetuyyo yootido azazuwaa hassayay? Hagaadan giis: “Ha azazota taageeta, intte wozanaaninne intte qofan wottite. Malaatadan eta intte kushiyan qachchite; qassi malaatadan intte som77uwankka wottite. Hageeta intte naatakka tamaarissite. Intte son de7iyo wode, ogiyan hemettiyo wode, zin77iyo wodenne denddiyo wodekka, etayyo yootite.” (Zaarettido Wogaa 11:18, 19; Zaarettido Wogaa 6:6, 7⁠kka xeella.) Hegee, yelidaageeti bantta naatuyyo ubbatoo sabbakana bessees giyoogaa gidenna. SHin siiqiya aaway so asaa ayyaanaaban minttettanau ubbatoo akeekancha gidana koshshees.

15, 16. (a) Seeray aybee? (b) Seerana bessiyay oonee, seeraa siyana koshshiyay oonee?

¹⁵ Seeray suurissanau maaddiya loohisso; qassi issoy issuwaara haasayiyoogaa gujjees. Issi issitoo qixaatee koshshiyo wodee deꞌana danddayikkokka, seeraa giya qaalay darotoo qonccissiyoy qaxxayiyoogaa gidennan, suurissiyoogaa. Ne naatussi naatettan seeray koshshiis; haꞌꞌi yelagatettan deꞌiyo wodekka amarida ogiyan koshshees; geella mintti seeriyoogaa koshshana danddayees. Cincca gidida yelagati hegaa akeekoosona.

¹⁶ Geeshsha Maxaafay, “Eeyya asi ba aawaa seeraa karees; shin ba aawaa zoriyaa ekkiya asi eranchcha” yaagees. (Leemiso 15:5) Nuuni ha xiqisiyaappe darobaa tamaaroos. Seeriyoogee koshshiyaaba gidiyoogaa qonccissees. Seeri xayikko, issi yelagay ‘zoriyaa ekkana’ danddayenna. Seeriyo aawatettaa Yihooway  yelidaageetussi, ubba qassi aawaassi immiis. SHin naꞌay he seeraa siyana bessees. Naꞌay ba aawaanne ba aayee loꞌꞌo seeraa siyiyaaba gidikko, darobaa tamaarees; qassi darotoo balenna. (Leemiso 1:8) Geeshsha Maxaafay, “Seeraa ixxiya asi hiyyeeseesinne yeellatees; shin seerin siyiya urai bonchchettees” yaagees.—Leemiso 13:18.

17. Seeriyo wode yelidaageeti ayba ogiyan akeekancha gidana koshshii?

¹⁷ Yelagata seeriyo wode yelidaageeti akeekancha gidana bessees. Eti naata hanqqetissiya, qassi naati xala gidennaadan oottiya ogiyan seerana koshshenna. (Qolasiyaasa 3:21) Yelidaageeti yeda gidiyoogan, keehi koshshiya loohissuwaa yelaga naati demmennaadan oottana bessenna. Hegaadan yeda gidiyoogee naata bashshana danddayees. Leemiso 29:17y, “Ne na7aa seera; yaatikko, i nena saruwaa diggenna; i nena ufaissana” yaagees. SHin paydo 21, “Ne ashkkaraassi naatettan doommin, i koyiyoobaa ubbaa ayyo imma meezeyikko, issi gallassi neeyyo de7iyaabaa ubbaa ekkanau i kajjeelanaagee attenna” yaagees. Ha xiqisee yootiyoy ashkkaraabaa gidikkokka, yelagatussikka hanees.

18. Seeray aybaa qonccissii, yelidaageeti seeriyo wode waatana koshshennee?

¹⁸ Suure seeray, yelidaagee ba naꞌaa siiqiyoogaa bessiyaaba. (Ibraawe 12:6, 11) Neeni aawa woy aayo gidikko, ubbatoo suure ogiyan seeriyoogee metiyaaba gidiyoogaa eraasa. Neeni saro deꞌanau koyiyo gishshau, azazettenna yelagay ba koyiyoobaa oottanaadan coꞌꞌu giyoogee metennaba milatana danddayees. SHin, hegaadan oottiya aawaayyo woy aayeeyyo, wurssettan keettay maari baynnaagaa gidees.—Leemiso 29:15; Galaatiyaa 6:9.

19, 20. Yelaga naati wodiyaa aattiyoobaara gayttidabaa yelidaageeti waatidi bessiya ogiyan oyqqana danddayiyoonaa?

¹⁹ Beni wode, naati son woy gaden oosuwaa maaddiyoogee  meeze gididaba. Ha wodiyan yelagati bantta sheniyaadan goꞌettiyo daro palaha wodee deꞌees. He palaha wodiyan goꞌettiyo keehi darobay ha alamiyan deꞌees. Qassi, Geeshsha Maxaafay kandduwaara gayttidaagan yootiyoobaa ha alamee xaasayi xeellees; hegee ubbay qoho kaalettiyaaba.

²⁰ Hegaa gishshau, wodiyaa aattiyoobaara gayttidaagan kuuyana bessiyay akeekancha aawaa woy aayyiyo. Gidikkokka, yelaga naati dicciyoogaa dogoppa. Layttaappe layttan, harati banttana gastta asadan xeellanaadan naati koyana danddayoosona. Hegaa gishshau, aaway woy aayyiyaa ba naꞌay dooriyoobay i ayyaanaaban kaymidoogaa bessiyaaba gidikko, dicci dicci biyo wode wodiyaa aattiyoobaara gayttidaagan i dooranaadan oottana koshshees. Naꞌay muuziqaa, laggiyaanne harabaa issi issitoo bessenna ogiyan doorana danddayees. Hegaa malabay merettiyo wode, naꞌay sinttanau loꞌꞌobaa doorana mala issippe haasayana koshshees.

21. Issi yelagay wodiyaa aattiyoobau bessiyaagaa keena wodiyaa bazziyoogee a naagiyoy ayba ogiyaanee?

²¹ Wodiyaa aattiyoobau woqqu saatiyaa bazzana koshshii? Issi issi biittan yelagati muletoo wodiyaa aattiyoobaa goꞌettana bessiyaabadan qoppana danddayoosona. Hegaa gishshau, issi yelagay dumma dummaban wodiyaa aattanau halchana danddayees. Wodiyaa harabaukka, giishin so asaa xinaatiyau, buzo xinaatiyau, ayyaanaaban kaymidaageetuura issippe aattanau, gubaaꞌiyaa shiiquwaunne so giddon oottanau bazzana bessiyoogaa yelidaageeti tamaarissana koshshees. Yaatiyoogee, ‘loꞌꞌo deꞌuwaa’ amottidi, Xoossaa Qaalay cuulettanaadan oottiyaabaa oottennaadan maaddees.—Luqaasa 8:11-15.

22. Yelagati wodiyaa aattiyoobaanne aybaa bessiyaagaadan xeellana koshshii?

²² Kawuwaa Solomoni, hagaadan giis: “Asi ba de7ido  laittan lo77iyaabaa oottiyoogaappenne, ufaittiyoogaappe aadhdhiyaabi aibinne bainnaagaa taani akeekaas. Qassi, asassi au a daafurau waaga gidiyaabi muussaaninne ushshan bana ufaissiyoogaa; hegeekka au Xoossaappe imettida imota.” (Eranchchaa 3:12, 13) Ee, ufayttiyoogee suure deꞌuwau koshshiyaaba. SHin minnidi oottiyoogeekka koshshiyaaba. Ha wodiyan daro yelagati minnidi oottiyoogee ufayssiyaaba gidiyoogaa, qassi metuwaa xooni kiyiyoogeenne giigissiyoogee minnanaadan oottiyoogaa akeekokkona. Issoti issoti sinttappe banttana maaddana hiillaa woy oosuwaa tamaarennan diccoosona. Hegee yelidaageetussi gita paace. Ne naꞌay hegaa malabaa tamaaranaadan oottana danddayay? Ne yelaga naati oosuwaa xoqqu oottidi xeellanaadan maaddiyaaba, ubba minni oottiyoogan ufayttanaadan maaddiyaaba gidikko, eti deꞌo laytta ubban goꞌꞌiya loꞌꞌo xeelay deꞌiyoogeeta gidanaadan maaddaasa.

23. Yelidaageeti bantta yelaga naata waati minttettana danddayiyoonaa?

²³ Ne yelaga naatuura gayttidaagan metoy merettiyo wodekka, Geeshsha Maxaafay, “Siiqoi mulekka xayenna” giidi yootiyoobay maaddees. (1 Qoronttoosa 13:8) Ne naata siiqiyoogaa mule aggoppa. Hagaadan nena oycha: ‘Naati metiyaabaa woy xube gidiyaabaa xooni kiyiyo wode galatiyaanaa? Ta naata siiqiyoogaanne nashshiyoogaa koshshiya wodiyan yootiyaanaa?’ Issi issitoo maayettennan aggiyo wodee deꞌana danddayikkokka, ne naati neeni eta siiqiyoogaa eriyaaba gidikko, etikka nena siiqanaagee erettidaagaa.

24. Naata dichiyoogaara gayttidaagan Geeshsha Maxaafay ay yootii, shin ay hassayana koshshii?

²⁴ Naati asa gamma gakkiyo wode, banttau keehi gita kuushshaa kuuyiyoogee qoncce. Issi issi gaasuwan he kuushshay yelidaageeta ufayssennan aggana danddayees.  Eta naꞌay Xoossaa Yihoowayyo oottiyoogaa agganau kuuyiyaaba gidikko shin? Hegee hanana danddayiyaaba. Ayyaana mereta gidida, Yihoowa naatikka a zoriyaa siyennan ixxidi makkalancha gididosona. (Doomettaabaa 6:2; Yihudaa 6) Naati nuuni koyidoogaadan oottiyo komppiyutere mala miishsha gidokkona. Eti bantta koyidobaa dooridi oottiyo maatay deꞌiyo, bantta kuuyiyoobaara gayttidaagan Yihoowa sinttan oyshettiya meretata. Hegaa xeelliyaagan, Leemiso 22:6y, “Na7i waanidi de7ana bessiyaakko tamaarissa; yaatikko, i cimidikka hegaa aggenna” yaagees.

25. Naatu aawa woy naatu aayo gidanaadan Yihooway immido imotaa yelidaageeti nashshiyoogaa bessiyo keehi loꞌꞌo ogee awugee?

²⁵ Yaatiyo gishshau, ne naata keehippe siiqa. Eta dichiyoogaara gayttidaagan Geeshsha Maxaafay yootiyoobaa mintta kaalla. Xoossaa ufayssiya eeshshay deꞌiyoogaa gidiyoogan loꞌꞌo leemiso gida. Yaatiyoogan, ne naati wozannaamanne Xoossaa yayyiya asa gididi diccanaadan maaddaasa. Hegee, naatu aawa woy naatu aayo gidanaadan Yihooway immido imotaa yelidaageeti nashshiyoogaa bessiyo keehi loꞌꞌo oge.