1. Mino gidida so asay deretettau keehippe koshshiyoy aybissee?

 SO ASAY saꞌan beniisappe doommidi deꞌiyaabanne asaa naatu deꞌuwan keehi koshshiyaaba. Asi deꞌido wode ubban, mino gidida so asay mino deretettay deꞌanaadan oottiis. So asaa deꞌoy naati diccidi gastta gidanaadan oottanau keehi loꞌꞌo giigisso.

2-5. (a) Ufayttiya keettaa asaara deꞌiya naꞌay deꞌiyo woppa hanotaa qonccissa. (b) Issi issi keettaa asaa metoy aybee?

² Ufayttiya so asaa keettay woppu giidi shemppiyo soho. Ane issi kutti giiga gidida keettaa asaa qoppa. Siiqiya aawaynne aayyiyaa bantta naatuura issippe kahuwaa miyo wode, bantta peeshshaabaa haasayoosona. Timirtte keettan hanettidabaa naati bantta aawaayyoonne aayeeyyo ufayttiiddi yootoosona. Hegaadan ufayssan wodiyaa issippe aattiyoogee haroodessi eta minttettees.

 ³ Ufayttiya keettaa asaara deꞌiya naꞌay sahettiyo wode, a aawaynne aayyiyaa qammi kayan kayan bana naaganaagaa erees. He naꞌay yelagatettan bana gakkiya metuwaa ba aawaayyo woy ba aayeeyyo yootidi, zoriyaanne maaduwaa demmanaagaa erees. Harasan metoy kumidaba gidikkokka, naꞌay woppu giidi deꞌana danddayees.

⁴ Naati gitatiyo wode, darotoo bantta aquwaa oyqqidi deꞌoosona. Jaappaane biittaa asay, “Issi uri naꞌa yeliyo wode bana yelidaageeti ayyo ay keena daafuridaakko akeekees” yaagidi leemisuwan yootees. He naati bantta aqoy ufayssiyaagaa gidanaadan baaxetoosona; qassi bantta naatu naatun ufayttiya, cimida bantta aawaanne aayyiyo wozanappe galatiiddi siiquwan xeelloosona.

⁵ SHin neeni hagaadan qoppana danddayaasa: ‘Taani ta keettaa asaa dosays; shin ta keettaa asay qommoora qonccidaagaa mala gidenna. Taaninne ta keettayiyaa dumma dumma saatiyan oottiyo gishshau, issoy issuwaara darin gayttokko. Nuuni darotoo miishshaara gayttida metuwaabaa haasayoos.’ Woy, ‘Ta naatinne ta naatu naati harasan deꞌiyo gishshau, etaara gaytta erikke’ gay? Darotoo wolqqaappe dariya gaasotuppe denddidaagan, daro so asaa deꞌoy qoppiyoogaa mala gidenna. Gidikkokka, amarida so asay ufayssiya deꞌuwaa deꞌees. Waanidi? So asaa ufayssau maaddiyaabi deꞌii? Hegaa zaaroy ee giyaagaa. SHin hegee aybakko beꞌanaappe kase, nuuni issi keehippe koshshiya oyshaa zaarana bessees.

6. Ha maxaafan tobbana so asay awugee?

⁶ So asaa giyoogeeti darotoo aawaa, aayyiyoonne naata. Naatu naati deꞌiyoogeeti banttau danddayettikko bantta son deꞌana danddayoosona. Hara dabbotuura gayttiyaaba gidikkokka, he dabboti eta darin maaddennan aggana danddayoosona. Nuuni ha maxaafan tobbana so asay aawaa, aayyiyoonne naata gujjiyaagaa. SHin mata  wodiyaappe simmin dumma gidida so asay, giishin aawaa woy aayee xallay dichiyo naati deꞌiyo keettaa asay, balakko naati deꞌiyo keettaa asaynne yelidaageeti dumma dumma gaasuwan issippe deꞌenna keettaa asay dariiddi deꞌees.

7. Issi issi keettaa asay ayba ogiyan deꞌii?

⁷ Daro keettaa asay ba dabbotuura issippe deꞌees. Hegaa mala keettan, azinaynne machiyaa banttana yelidaageeta ubbatoo xeelloosona; qassi hara dabbotakka maaddana koshshiyaabadan qoppoosona. Leemisuwau, he soo asay ishaa naata, michee naata woy hara dabbo naata dichiyoogaaninne tamaarissiyoogan maaddana danddayees. Ha maxaafan tobbana baaso siraatay hagaa mala so asaukka hanees.

8, 9. So asaa hanotay laamettiiddi deꞌiyoogaa bessiya issi issi biittan deꞌiya metoy aybee?

⁸ So asaa hanotay ha wodiyan laamettiiddi deꞌees; hegee maari baynna ogiyaana gidiyoogee azzanttees. Leemisuwau, issi maccaasiyaa ba bolluwaa so asau azazettada oottaydda etaara deꞌana danddayausu. SHin ha wodiyan, maccaasay qaxarettidi harasan oottiyoogee meeze gididaba. Gidikkokka, eti oottana bessiyo so oosuwaa polanaadan haꞌꞌikka koyettiyaaba milatees. Daro biittan deꞌiya asay oychiyo oyshay hagaadan giyaagaa: Son deꞌiya hara asaara gatti xeelliyo wode, qaxarettidi oottiya maccaasay son ay keena oosuwaa oottana koshshii?

⁹ Issi issi biittaa wogan, so asay dabbotuura issippe deꞌees. SHin ba koyidoogaadan deꞌiyo, Amarkkaanne Awurooppaa deꞌuwaa hanotaappenne ikkonoomiyaa metuwaappe denddidaagan, dabbotuura deꞌiyo hanotay kaseegaa mala gidenna. Yaatiyo gishshau, daroti cimida bantta soo asaa xeelliyoogaa aawatettadan woy maatadan xeelliyoogaappe toohodan xeelloosona.  Yelidaageetuppe cimida issotu issotu bolli qohoy gakkees. Ha wodiyan daro biittan cima asaa, asay qoheesinne aggi bayees.

10, 11. So asaa hanotay daro biittatun laamettiiddi deꞌiyoogaa bessiyaabay aybee?

¹⁰ Maccaasaa yeddiyoogee keehippe daridi meeze gidiis. Kase wode asay machidi shaahettennan issippe deꞌees. SHin ha wodiyan asay machidi, guutta wodiyaa issippe deꞌidoogaappe guyyiyan, yeddidi hara uraa ekkanau koyees. Ubba issoti issoti darotoo machidi, darotoo yeddoosona. Qassi naata banttarkka dichiya yelidaageeti daridosona.

¹¹ Daroti beniigaadan so asaara deꞌiyoogaa muleera aggidaba milatees. Issoti issoti aqo oyqqanau koyokkona; shin daro naata yeloosona. Aquwaa oyqqiyoogee kaalettiyo aawatettaappe baqatanau koyidi, coo issippe deꞌiyaageetu qooday gujji gujji biis. Hegaa mala xeelay deꞌiyo asati alame yuushuwan deꞌoosona.

12. Ha wodiyan so asaa hanotay laamettidoogaappe denddidaagan naati waanidi qohettiyoonaa?

¹² Naatubaa shin woyganee? Daro biittatun balakko naatu qooday gujji gujji biis; hegeeta yeliyaageetuppe daroti yelaga naata. Daro yelaga macca naati dumma dumma aawaappe cora naata yeloosona. Alame yuushuwan deꞌiya hanotay, deꞌiyo keetti baynna miilooniyan qoodettiya naati ogiyan kumidoogaa bessees; he naatuppe daroti bantta bolli qohuwaa gattiya so asaappe baqatidaageeta woy so asay maaddennan ixxidi yedettin kiyidaageeta.

13. So asay ufayttennaadan oottiya darosan deꞌiya metoy aybee?

¹³ Ee, so asay metuwan deꞌees. Kasetidi qonccidaagaappekka haray, yelaga naatu makkalay, naatu bolli gakkiya qohoy, aqo laggiyaa bolli danobaa oottiyoogee, ushshancha gidiyoogeenne hara wolqqaama metoy daro so asay ufayttennaadan oottees. Daro naatuyyoonne gasttatuyyo so asaa deꞌoy woppu giidi shemppiyo soho gidenna.

14. (a) Issi issi asay so asaa metuwau gaasoy ayba gii? (b) Koyro xeetu layttan deꞌida higgiyaa eranchay ha wodiyan deꞌiya hanotaabaa woygidee, i yootidobay polettiiddi deꞌiyoogee so asaa bolli ay kaalettidee?

 ¹⁴ So asay metuwan deꞌiyoy aybissee? Issoti issoti so asaa bolli ha wodiyan gakkiya metuwau gaasoy, maccaasay qaxarettidi oottiyoogaa yaagoosona. Harati qassi ha wodiyan kanddoy shoraa xayidoogaa goosona. Harabaykka gaasodan odettees. Naaꞌꞌu shaꞌu laytta gidiya wodiyaappe kase, higgiyaa erancha gidida issi erettida asi kaallidi deꞌiyaagaadan xaafido wode, so asaa bolli daro metoy gakkanaagaa yootiis: “Wurssetta gallassi waissiya wodee yaanaagaa akeeka. Aissi giikko, asati banttana siiqiyaageeta, miishshaa siiqiyaageeta, ceeqettiyaageeta, ayyiyaageeta, cayiyaageeta, banttana yelidaageetuyyo azazettennaageeta, galatennaageeta, geeshshatetti bainnaageeta, siiqoi bainnaageeta, sigettennaageeta, zigirssanchchata, banttana naagennaageeta, kehennaageeta, lo77obaa dosennaageeta, kashi erikke giyaageeta, eesotiyaageeta, otoruwan sugettiyaageeta, qassi Xoossaappe aattidi, ufaittiyoobaa dosiyaageeta gidana.” (2 Ximootiyoosa 3:1-4) Ha wodiyan ha hanotati polettiiddi deꞌiyoogaa siriyay oonee? Hagaa mala hanotay deꞌiyo alamiyan, daro keettaa asay metootiyoogee garamissenna.

15-17. So asaa ufayssau maaddiya waannabaa yootiyay ayba gidiyoogaa ha xuufee qonccissii?

¹⁵ So asaa ufayssau maaddiyaaba giyo zoriyaa asay dumma dummasaappe siyees. Daro cima asaykka so asaara gayttidaagan heeraa wogaadan zorees. Asaa zoree issuwaagee haraagaara maayettenna; qassi hachi maaddees giidobay wontto maaddennaba gidana danddayees.

¹⁶ Yaatin, so asau haniya ammanttiya kaaletuwaa awuppe demmana danddayiyoo? Kaaletuwaa  demmanau 1,900 laytta gidiya wodiyaappe kase xaafettida issi maxaafaa nabbabuutiiyye, woy he maxaafay keehi gamꞌꞌido gishshau, ha wodiyau maaddenna gaada qoppay? SHin so asaa ufayssau koshshiya waannabaa qonccissiyay he maxaafaa gidiyoogee qoncce.

¹⁷ He maxaafay Geeshsha Maxaafaa. Geeshsha Maxaafaa xaafissidaagee Xoossaa gidiyoogaa naqaashati qonccissoosona. Geeshsha Maxaafan hagaadan giya qofay deꞌees: “ Xoossaa maxaafa ubban Xoossaa Ayyaanai de7ees. Qassi he maxaafati . . . tumatettaa tamaarissanau, balaa seeranau, mooruwaa suurissanaunne xillotetta de7uwau zoriyaa immanau maaddoosona.” (2 Ximootiyoosa 3:16, 17) Ha wodiyan so asaa bolli gakkiya metuwaara gayttidaagan neeni ‘mooruwaa suurissanau’ baaxetiyo wode, Geeshsha Maxaafay waatidi maaddiyaakko akeekanaadan ha xuufiyaa baggaara minttettoos.

18. Aqo deꞌuwaara gayttidaagan Geeshsha Maxaafaa zoriyaa aybippenne aaruwan siyiyoogee koshshiyaaba gididoy aybissee?

¹⁸ So asay ufayttanaadan Geeshsha Maxaafay maaddana danddayiyoogaa neeni siriyaaba gidikko, hagaa qoppa: Geeshshaa Maxaafaa xaafissidaagee aqo duussaa Doomissidaagaa. (Doomettaa 2:18-25) Geeshsha Maxaafay a sunttay Yihoowa gidiyoogaa yootees. (Mazamure 83:18, NW) I Medhidaagaanne ‘keetta asa ubbay aani sunttettido Xoossaa.’ (Efisoona 3:14, 15) Asaa naati merettido wodiyaappe doommidi, Yihooway so asaa deꞌuwaa kaalliis. Merettana danddayiya metuwaa i erees; qassi he metuwaa waati giigissanaakkokka zorees. Taarike wode ubban, bantta so asaara gayttidaagan Geeshsha Maxaafaa baaso siraataa oosuwan peeshshanau wozanappe baaxetidaageeti keehi ufayttidosona.

19-21. Aqo deꞌuwan merettiya metuwaa Geeshsha Maxaafaa zoree giigissana danddayiyoogaa bessiya, ha wodiyan hanettidabati aybee?

¹⁹ Leemisuwau, Inddonezhiyaa giyo biittan deꞌiya issi  maccaasiyaa ubbatoo ceeriyaa kaaꞌawusu. A daro layttau ba heezzu naata xeellennan agga bayaasu; qassi ba keettaawaara ubbatoo ooyettawusu. SHin a Geeshsha Maxaafaa xannaꞌiyoogaa doommaasu. Yaatada, Geeshsha Maxaafay yootiyoobaa ammaniyoogaa doommaasu. Geeshsha Maxaafaa zoriyaa oosuwan peeshshiyoogaa doommada loꞌꞌo maccaasa gidaasu. Geeshsha Maxaafaa baaso siraataa kaallanau a baaxetidoogee, i soo asa ubbay ufayttanaadan oottiis.

²⁰ Isppeene biittan deꞌiya issi maccaasiyaa, “Aqo oyqqoosappe mexi issi laytta gidishin, nu giddon wolqqaama metoy merettiyoogaa doommiis” yaagaasu. Anne i keettaaway daroban maayettokkona; eti issoy issuwaara haasayiyoy ooyetti wode xallaana. Etau issi naꞌiyaa deꞌiyaaba gidikkokka, shaahettanau kuuyidosona. SHin hegaadan oottanaappe kase, Geeshsha Maxaafaa xannaꞌanaadan shoobettidosona. Eti Geeshsha Maxaafay aqo oyqqida attuma asaanne macca asaa xeelliyaagan zoriyoobaa xannaꞌidi oosuwan peeshshiyoogaa doommidosona. Daro takkennan, eti issoy issuwaara loꞌꞌo hanotan haasayiyoogaa doomidosona; hegaappe simmin eta soo asay ufayssan issippe deꞌiis.

²¹ Geeshsha Maxaafay cima asaakka maaddees. Leemisuwau, Jaappaane biittan deꞌiya issi azinaanne machee hanotaa beꞌa. Keettaaway eesuwaara hanqqettiyo gishshau, issi issitoo kobabaa oottees. Koyro, eta macca naati eti eqettiyaaba gidikkokka, Geeshsha Maxaafaa xannaꞌiyoogaa doommidosona. Hegaappe simmin, eta aawaykka xannaꞌiyoogaa doommiis; shin aayyiyaa eqettiyoogaa aggabeykku. Gidoppe attin, daro layttay aadhi simmin, Geeshsha Maxaafay tamaarissiyoogaadan deꞌiyo gishshau, i soo asaa hanotay laamettidoogaa akeekaasu. I naati iyyo kaseegaappe aaruwan qoppiyaageeta gididosona; qassi i azinay ashkke gidiis. Eti hegaadan laamettidoogee akka Geeshsha Maxaafaa xannaꞌanau koyanaadan denttettin, xannaꞌada etaagaadan  laamettaasu. He maccaasiyaa darotoo, “Nuuni tumuppe azinanne macho gidida” yaagaasu.

22, 23. Ubba asay so asaa deꞌuwan ufayttanaadan Geeshsha Maxaafay maaddiyoy aybissee?

²² So asaa ufayssau koshshiya waannabaa tamaarida darotuppe hageeti amaridaageeta. Eti Geeshsha Maxaafaa zoriyaa siyidi oosuwan peeshshidosona. Hara asa ubbaagaadan, eti makkalabaynne shori baynnabay kumido, qassi miishshaara gayttida metoy unꞌꞌissiyo alamiyan deꞌoosona. Hegaa bollikka, polo asa gidokkona; shin so asaa deꞌuwaa Doomissidaagaa sheniyaa polanau baaxetiyoogan ufayttoosona. Geeshsha Maxaafay Xoossaa Yihooway, “nena maaddiyaabaa tamaarissiyaagaa. Neeni baanau bessiya ogiyankka nena kaalettiyai” a gidiyoogaa yootees.—Isiyaasa 48:17.

²³ Geeshsha Maxaafay naaꞌꞌu shaꞌu gidiya wodiyaappe kase xaafettidaba gidikkokka, ha wodiyau tumuppe haniya zoriyaa oyqqiis. Qassi Geeshsha Maxaafay xaafettidoy ubba asaassappe attin, Amarkkaa woy Awurooppaa asa xallau gidenna. Yihooway ‘asa zare ubbaa issi asaappe medhido’ gishshau, ubbasan deꞌiya asaa hanotaa erees. (Oosuwaa 17:26) Geeshsha Maxaafaa baaso siraatay ubba asau haniyaagaa. Neeni hegaa oosuwan peeshshiyaaba gidikko, so asaa ufayssau koshshiya waannabaa akeekana danddayaasa.