Keehi daro Yihoowa Markkati Ufayssa Masqqalaa bonchchokkona. Hegan etayyo aybi siyettii? Eti banttappe aybakko halidabadan qoppiyoonaa? Eta naati banttappe aybakko attiis giidi qoppiyoonaa? Hegaa xeelliyaagan kumetta saˈan deˈiya Yihoowa Markkati giidobaa ane beˈoos.

Eti Yesuusa hassayiyo loˈˈobaa akeekidosona: “Taani Yihoowa Markka gidanaappe kase woosa keettaa issi issitoo bays. Taani biyoy Ufayssa Masqqalaa woy Paasikaa bonchchana xallaassa. He wodiyankka Yesuusabaa mule qoppa erikke. Haˈˈi taani Ufayssa Masqqalaa bonchchiyoogaa aggikkonne, saaminttan naaˈˈutoo gubaaˈe shiiquwaa shiiqaysinne Geeshsha Maxaafaappe Yesuusabaa harata tamaarissays!”—IVO, AWUSTTIRAALIYAA.

Immiyoogee ufayssees: “Taani qoppennan asay imotaa immiyo wode keehi ufayttays. Qoppabeenna wodiyan ufayttiyoogaa taani keehi dosays! Issi issibaa medhdhada haratussi immiyoogaakka dosays. Ayssi giikko, hegee etakka tanakka ufayssees.”—RUBEENA, HUUPHESSA AYERLANDDE.

Maaddana bessiyoogeeta maaddiyoogaa: “Sahettida asawu qumaa kattiyoogee nuna ufayssees. Hegaa bollikka, issi issitoo nuuni etawu ciishshaa, keekkiyaa woy hara guuttabaa immoos. Hegee nuuni danddayiyo wode ubban etawu oottiyooba gidiyo gishshawu keehi ufayttoos.”—EMILO, AWUSTTIRAALIYAA.

So asay issippe wodiyaa aattiyoogaa: “Nu so asay issippe wodiyaa aattiyo wode nu naati bantta mata dabbotuura erettoosona. Nuuni hegaadan oottanawu baalaa wodiyaa naagana koshshenna gishshawu unˈˈettokko. Hegaa bollikka, nu so asay nuuni eta siiqiyo gishshawu biidi oychchiyoogaa eroosona.”—WENDA, KEYMAN HARUURUWAA.

Sarotettaa: “Daroti Ufayssa Masqqalaa wode keehi bichchaariyo gishshawu, sarotettaabaa qoppiyaaba milatokkona. SHin taani Xoossay asayyo qaalaa gelidobaa Geeshsha Maxaafaappe tamaaraas. Qassi hegee taani woppu gaanaadan oottiis. Ta naatikka sinttappe ufayssiya deˈuwaa deˈanaagaa akeekaas.”—SANDIRO, ISPPEENE.