SHemppuwaa Laappuna

Hayqqida Ne Siiqotuyyo Deˈiya Tumu Hidootaa

Hayqqidaageeti denddanaagee attennaagaa waatidi erana danddayiyoo?

Hayqqidaageeta denttiyoogaara gayttidaagan Yihoowayyo aybi siyettii?

Hayquwaappe denddanaageeti oonee?

1-3. Nuna ubbaa yedettiiddi deˈiya morkkee aybee? Geeshsha Maxaafay tamaarissiyoobaa akeekan xeelliyoogee nuussi woppaa ehiyoy aybissee?

NEENI issi iita morkkiyaappe woxxa baqattaydda deˈiyabadan ane qoppa. I neeppe wottan keehi eesoteesinne keehippe mino. Ne dabbotuppe amaridaageeta i worishin neeni beˈido gishshau, i qareti baynnaagaa gidiyoogaa eraasa. Neeyyo danddayettidaagaa keenaa appe baqata attanau baaxetikkonne, i neekko matatti matatti bees. Neeyyo ayba hidootinne deˈiyaaba milatenna. Gidikkonne, ne qoppennan nena appe ashshiya uri gakkiis. I ne morkkiyaappe keehi wolqqaama; qassi nena maaddanaukka neeyyo qaalaa geliis. Hegee nena hirggaappe ay keena woppissanddeeshsha!

² Neeni hegaa mala morkkee yedettiiddi deˈiyo mala hanotan deˈaasa. Nuuni ubbaykka hegaa mala hanotan deˈoos. Aadhdhida shemppuwan nuuni tamaaridoogaadan, Geeshsha Maxaafay hayquwaa morkke yaagees. Nu giddoppe ooninne appe baqati attanau woy a xoonanau danddayenna. Nu giddoppe daroti ha morkkee nuuni keehi siiqiyoogeeta worin beˈida. SHin Yihooway hayquwaappe keehi wolqqaama. I nuna Ashshiyaagaanne siiqiyaagaa; qassi ha morkkiyaa xoonana danddayiyoogaa bessiis. Qassi i ha morkkiyaa, hayquwaa, muleera xayssanau qaalaa geliis. Geeshsha Maxaafay, “ubbaappe wurssettan xayana morkkee  haiquwaa” yaagidi tamaarissees. (1 Qoronttoosa 15:26) Hegee mishiraachcho!

³ Nu eriyo issi uri hayqqiyo wode, morkke gidida hayqoy nuna waati qohiyaakko ane qanttan beˈoos. Hegaadan oottiyoogee, nuna ufayssiya issibaa akeekanaadan maaddees. Hayqqidaageeti naaˈˈantto deˈanaagaa Yihooway qaalaa geliis. (Isiyaasa 26:19) Eta i deˈuwau zaaridi ehaana. Dendduwaa hidootay hegaa.

SIIQIYO URI HAYQQIYO WODE

4. (a) Siiqiyo asi hayqqiyo wode, Yesuusi bau siyettiyaabaa qonccissido ogee, Yihoowayyo hegan aybi siyettiyaakko nuna tamaarissiyoy aybissee? (b) Yesuusi ayba dumma dabbotaa medhdhidee?

⁴ Hayqoy neeppe shaakkido, ne siiqiyo uri deˈii? Seelay, azzanoynne aynne oottana danddayennaagee siyettiyo hanotay, danddayidi aattiyoobanne milatenna. Hegaa mala wodiyan minttettiyaabaa demmanau, Xoossaa Qaalaakko xeellana bessees. (2 Qoronttoosa 1:3, 4) Geeshsha Maxaafay, hayquwaa xeelliyaagan Yihoowayyonne Yesuusayyo siyettiyaabaa akeekanaadan nuna maaddees. Ubbaban ba Aawaa milatiya Yesuusi, asi hayqqiyo wode siyettiya seelaabaa erees. (Yohaannisa 14:9) Yesuusi Yerusalaame biyo wode, darotoo Alˈˈaazaranne a michcheta, Mayraamonne Martto oychchanau matan deˈiya katamaa Biitaaniyaa bees. Eti siiqo dabbo gididosona. Geeshsha Maxaafay: “Yesuusi Martto, i michchiyoonne Al77aazara siiqees” yaagees. (Yohaannisa 11:5) Gidikkonne, nuuni aadhdhida shemppuwan tamaaridoogaadan Alˈˈaazari hayqqiis.

5, 6. (a) Yesuusi Alˈˈaazara dabbotinne laggeti azzaniyaageetuura gayttido wode, waanidee? (b) Yesuusassi siyettida azzanoy nuna minttettiyoy aybissee?

⁵ Ba dabboy hayqqidoogan Yesuusassi aybi siyettidee? Xaafettida taarikee, Alˈˈaazara dabbotinne laggeti i hayqqidoogau kayyottishin, Yesuusi etakko biidoogaa yootees. Yesuusi eta beˈidi keehippe azzaniis. I “ba wozanan daro mishettiis; qassi tookki shemppiis.” Hegaappe, “Yesuusi afuxxiis” yaagidi xaafettida taarikee qonccissees. (Yohaanisa 11:33, 35) Yesuusi azzanidoogee ayyo hidooti baynnaagaa bessii? CHii bessenna.  Ubba issi garamissiyaabi polettana haniyoogaa Yesuusi erees. (Yohaannisa 11:3, 4) Yaaninkka, hayqoy ehiyo seelaynne azzanoy ayyo siyettiis.

⁶ Yesuusau siyettida azzanoy issi baggaara nuna minttettiyaaba. Hegee, Yesuusinne a Aaway, Yihooway, hayquwaa ixxiyoogaa nuna tamaarissees. SHin, Xoossaa Yihooway he morkkiyaa oli xoonana danddayees! Xoossay Yesuusassi ay oottiyo wolqqaa immidaakko ane beˈoos.

‘‘AL77AAZARAA, HAA KIYA!’’

7, 8. Alˈˈaazaara hanotay he sohuwan eqqidi xeelliya asaayyo hidooti baynnaba milatana danddayiyoy aybissee? SHin Yesuusi ay oottidee?

⁷ Alˈˈaazari gonggoluwan moogettiis; qassi Yesuusi he gonggoluwaa penggiyaa qumˈˈido shuchchaa denttanaadan oychchiis. Moogettoosappe oyddu gallassay aadhdhido gishshatau, Alˈˈaazara bollay musiyoogaa doommanaagee qoncce gidiyo gishshau, Martta he qofan maayabuukku. (Yohaannisa 11:39) Asa xeelan, ayba hidootinne deˈiyooba milatenna.

⁸ SHuchchaa gonddorssin Yesuusi ba qaalaa xoqqu oottidi: “Al77aazaraa, haa kiya!” yaagiis. Hegaappe aybi hanidee? ‘Hayqqida bitanee kiyiis.’ (Yohaannisa 11:43, 44) Hegan deˈiya asay ay keena ufayttidaakko qoppana danddayay? Eti Alˈˈaazarassi isha, dabbo, lagge woykko shooro gidikkonne, i hayqqidoogaa eroosona. SHin eti siiqiyo bitanee ba huuphen eta giddon hekko eqiis! Hegee mulekka hananaba milatennan aggana danddayees. Daroti ufayttidi Alˈˈaazara qoommidoogee qoncce. Hegee hayquwaa bolli gakkida ayba ufayssiya xoonoo!

9, 10. (a) Yesuusi Alˈˈaazara denttanau i goˈettido wolqqaa Pulttoy oonakko waatidi qonccissidee? (b) Geeshsha Maxaafan xaafettida dendduwaa taariketa nabbabiyoogau amarida goˈˈati aybee aybee?

⁹ Yesuusi ha maalaalissiyaabaa ba wolqqan oottanaagaa yootibeenna. Alˈˈaazari kiyanaadan xeesanaappe kase woossido woosan, dendduwaayyo Pulttoy Yihoowa gidiyoogaa qonccisiis. (Yohaanisa 11:41, 42) Yihooway ba wolqqaa hegaadan goˈettidoy he wode xalla gidenna. Alˈˈaazara denddoy Xoossaa Qaalan xaafettida, hegaa mala maalaalissiya uddufun denddotuppe  issuwaa. * He xaafettida taariketa nabbabiyoogeenne xannaˈˈiyoogee ufayssiyaaba. Denddidaageetu giddon yelagatinne cimati, attumaageetinne maccaageeti, qassi Israaˈeeletinne Israaˈeele gidennaageeti deˈiyo gishshau, Xoossay asaappe asaa shaakkennaagaa nuna tamaarissees. Qassi ha taariketun qonccidabay ayba ufayssiyaabee! Leemisuwau, Yesuusi issi yelaga naˈiyo hayquwaappe denttido wode, i aawaynne aayyiya ‘keehi daro garamettidosona.’ (Marqoosa 5:42) Ee, Yihooway etassi mulekka dogettana danddayenna ufayssiyaabaa oottiis.

¹⁰ Yesuusi hayquwaappe denttidoogeeti, wurssettan hayqqidoogee qoncce. Hegee, eta i denttidoogau goˈˈi baawa giyoogee? Mulekka hegaadan gidenna. Geeshsha Maxaafan xaafettida ha taariketi keehi koshshiya tumaa boxooxisoosonanne nuussi hidootay deˈanaadan oottoosona.

DENDDUWAA TAARIKETUPPE TAMAARIYOOGAA

11. Alˈˈaazara dendduwaa yootiya taarikee, Eranchchaa 9:5n xaafettida tumaa waatidi boxooxisii?

¹¹ Geeshsha Maxaafay, hayqqidaageeti ‘aybanne erennaagaa’ yootees. Eti awaaninne deˈokkona; hanettiyaabaykka etau siyettenna. Alˈˈaazara taarikee hegaa tumaa boxooxisees. Alˈˈaazari denddidi asaayyo saluwaabaa garamissiyaaba yootidee? Woykko eexxiya siˈooliyaa tamaabaa yashissiyaabaa yootidee? CHii. Geeshsha Maxaafay, Alˈˈaazari hegaa malabaa haasayidoogaa yoottenna. Hayqqidi takkido oyddu gallasatun, i ‘aybanne erenna.’ (Eranchchaa 9:5) Alˈˈaazari hayquwan xiskkidi takkiis.—Yohaannisa 11:11.

12. Alˈˈaazari tumuppe denddidoogaa nuuni ammanana danddayiyoy aybissee?

¹² Alˈˈaazara taarikee, denddoy tumubappe attin hayse gidennaagaakka tamaarissees. Yesuusi Alˈˈaazara denttishin bantta ayfiyan beˈida cora markkati deˈoosona. Ubba Yesuusa ixxiya haymaanootiyaa kaalettiya asatikka, he maalaalissiya oosuwaa kashi erokko gibookkona. Hegaappe eti: “Ha bitanee [Yesuusi]  daro wolqqaama malaataa oottiyo gishshau, ai oottanee?” yaagidosona. (Yohaannisa 11:47) Daro asay, Alˈˈaazari denddidaagaa beˈanau biis. Hegaappe denddidaagan, ubba etappe daroti Yesuusan ammanidosona. Eti Yesuusi Xoossay kiittin yiidoogau, Alˈˈaazari paxa deˈiya naqaasha gidiyoogaa akeekidosona. Hegee keehippe wolqqaama naqaasha gidiyo gishshau, Ayhuda haymaanootiyaa kaalettiya wozanay zozzido asati, Yesuusanne Alˈˈaazara naaˈˈaakka woranau maqettidosona.—Yohaannisa 11:53; 12:9-11.

13. Yihooway hayqqidaageeta tumuppe denttanaagaa nuuni ammananaadan oottiyaabi aybi deˈii?

¹³ Denddoy tumuppe hananaba gidiyoogaa ammaniyoogee bessennabee? CHii, Yesuusi, “duufuwan de7⁠iyaageeti” issi gallassi denddanaagaa tamaarissido gishshau, ammanana bessiyaaba. (Yohaannisa 5:28) Deˈuwan deˈiyaaba ubbaa Medhdhidaagee Yihoowa. Yaatin, i deˈuwaa zaarettidi immanaagee ammananau metiyaabee? Hegee, Yihooway hassayiyoobaara keehippe gayttidoogee qoncce. Hayqqida nu siiqota i hassayana danddayii? Qoodidi wurssanau metiya daro xoolintteti saluwan deˈoosona; shin i eta ubbaassi sunttaa kessiis! (Isiyaasa 40:26) Yaatiyo gishshau, nuuni siiqiyo hayqqidaageetubaa ubbabaa Yihooway hassayees; i etassi zaarettidi deˈuwaa immanau danddayees.

14, 15. Iyyooba haasayan leemisettidoogaadan, Hayqqidaageetussi zaarettidi deˈuwaa immiyoogan Yihoowassi aybi siyettii?

¹⁴ Gidoshin, hayqqidaageeta denttiyoogan Yihoowassi aybi siyettii? Geeshsha Maxaafay i hayqqidaageeta denttanau amottiyoogaa tamaarissees. Ammanettida bitanee Iyyoobi: “Issi asi haiqqikko, simmidi paxanee?” yaagidi oychchiis. Iyyoobi bana Xoossay hassayiyo wodee gakkanaashin, duufuwan naagiyo hanotaabaa yootiiddi deˈees. I Yihoowassi: “Neeni medhdhido tanakka be7anau neeni laamotiyo wode, neeni tana xeesana; xeesin taani neeyyo koyana” yaagiis.—Iyyooba 14:13-15.

¹⁵ Ane qoppa! Yihooway hayqqidaageetussi zaarettidi deˈuwaa immanau tumuppe laamotees. Yihoowayyo hegaadan siyettiyoogaa eriyoogee wozanappe ufayssiyaaba gidennee? SHin  sinttappe yaana he dendduwaabaa woygana danddayiyoo? Denddanaageeti oonee? Eti awan denddanee?

‘DUUFUWAN DEˈIYAAGEETA’

16. Hayqqidaageeti ayba mala hanotan deˈanau denddanee?

¹⁶ Geeshsha Maxaafay denddida asatubaa yootiyoobay, sinttanaa dendduwaabaa darobaa tamaarissees. Hagan saˈan, hayquwaappe denddida asati zaarettidi bantta siiqiyoogeetuura deˈidosona. Sinttanaa denddoykka hegaa mala—shin hegaappekka keehi loˈˈoba gidana. Nuuni SHemppuwaa 3n tamaaridoogaadan, Xoossaa halchchoy kumetta saˈay gannate gidanaadaana. Yaatiyo gishshau, hayqqidaageeti denddanay olay, danoynne sahoy kumido saˈaana gidenna. Etassi, ha saˈan ufayssaaninne sarotettan merinau deˈana danddayiyo injjee deˈana.

17. Denddoy ay keena aaho gidanee?

¹⁷ Denddanaageeti oonee? Yesuusi, “duufuwan de7⁠iyaageeti [“ubbay,” NW] a [Yesuusa] cenggurssaa . . . siyidi . . . duufuwaappe gaxi kiyana” yaagiis. (Yohaannisa 5:28, 29) Hegaadankka Ajjuutaa 20:13y: “Abbai ba giddon de7⁠iya haiqqidaageeta immiis; haiqoinne Si7⁠oolee bantta giddon de7⁠iya haiqqidaageeta immidosona” yaagees. “Si7⁠oolee” asaa naatu ubbaa duufuwaa malaatees. (Gujo Timirttiyaa sinttaa 212-13 xeella.) Ha ubba asaa duufoy mela gidana. Yan shemppiya biilooniyan qoodettiyaageeti ubbay zaarettidi deˈana. Kiitettida PHauloosi: “Asai ubbai, worddoikka xilloikka haiquwaappe denddana” yaagiis. (Oosuwaa 24:15) Hegau birshshettay aybee?

18. Dendduwaa demmana ‘xillotun’ qoodettiyaageeti awugeetee? Ha hidootay nena ne huuphe waatidi bochchana danddayii?

¹⁸ Yesuusi saˈaa yaanaappe kase deˈida, etabaa nuuni Geeshsha Maxaafan nabbabido daro asati, ‘Xillota’ geetettiyaageetuura qoodettoosona. Noha, Abrahaama, Saaro, Muusa, Uruto, Asttironne hara darota qoppana danddayaasa. Xoossaa bolli mino ammanoy deˈiyo ha asatuppe amaridaageetubay Ibaraawe Maxaafan 11⁠tta shemppuwan odettiis. SHin, nu wodiyan hayqqiya Yihoowa asatikka ‘xillotuura’ qoodettoosona. Dendduwaa hidootaa wolqqan, nuuni hayqoy kaalettiyo ayba yashshaappekka laˈa kiyana danddayoos.—Ibraawe 2:15.

19. ‘Worddoti’ oonee? Yihooway ba kehatettan eti ayba injjiyaa demmanaadan oottanee?

 ¹⁹ Yihoowabaa aynne eribeenna gishshau, ayyo haggaazibeenna woykko azazettibeenna ubba asatubaashin, woygana danddayiyoo? Ha biilooniyan qoodettiya ‘worddoti’ dogettidi attokkona. Etikka denddidi, tumu Xoossaabaa tamaariyoonne ayyo haggaaziyo wodiyaa demmana. Issi shaˈu laytta wodiyan, hayqqidaageeti denddidi, saˈan Yihoowayyo ammanettidaageetuura issippe haggaaziyo injjiyaa demmana. Hegee keehippe ufayssiya wode gidana. Geeshsha Maxaafay Pirdda Gallassaa yaagiyo wodee hegaa. *

20. Gaannabee aybee? Yan yegettiyaageeti oonee?

²⁰ Hegaa yaagiyoogee, hayqqida asay ubbay denddana yaagiyoogee? CHii, gidenna. Geeshsha Maxaafay hayqqidaageetuppe amaridaageeti “Gaannabiyan” deˈiyoogaa yootees. (Luqaasa 12:5) Gaannabiyaa giyo qaalay, beni wode Yerusalaame katamaappe gaxan buuraa oliyo sohuwaa sunttaappe eketiis. Hayqqidabinne buuray hegan xuugettees. Ahay hegan olettiyo asata Ayhudati, moogoynne denddoy bessennabadan xeelloosona. Yaatiyo gishshau, Gaannabee merinaa xayuwaassi loˈˈo leemiso. Paxatunne hayqqidaageetu bolli pirddiyoogan Yesuusi oottiyoobi deˈiyaabaa gidikkonne, waanna Daannay Yihoowa. (Oosuwaa 10:42) I iitatanne laamettanau koyennaageeta giidi pirddidoogeeta mulekka denttenna.

SALUWAA DENDUWAA

21, 22. (a) Hara ayba qommo denddoy deˈii? (b) Ayyaana deˈuwau denddida koyroy oonee?

²¹ Geeshsha Maxaafay, saluwan ayyaana mereta gididi deˈanau denddiyo hara qommo dendduwaabaakka yootees. (Ajjuutaa 20:6) Geeshsha Maxaafay, hegau leemiso gidiya, polettida issi denddo xallaa yootees; hegeekka Yesuus Kiristtoosa dendduwaa.

²² Yesuusa asay woridoogaappe guyyiyan, Yihooway Ba ammanettida Naˈay duufuwan attanaadan coˈˈu giidi xeellibeenna.  (Mazamure 16:10; Oosuwaa 13:34, 35) Xoossay Yesuusa denttidaba gidikkonne asa ootti denttibeenna. Kiristtoosi: “Asatettan haiqqiis; shin ayyaanan paxiis” giidi kiitettida PHeexiroosi qonccissiis. (1 PHeexiroosa 3:18) Hegee tumukka keehippe maalaalissiyaaba. Yesuusi zaarettidikka wolqqaama ayyaana deˈuwaa demmiis! (1 Qoronttoosa 15:3-6) Hegaa mala bonchcho dendduwan denddiyoogan Yesuusi koyro. (Yohaannisa 3:13) SHin i wurssetta gidenna.

23, 24. Yesuusabaa gidida ‘amarida dorssa wude’ gidiyaageeti oonee? Eta qooday aappunee?

²³ Yesuusi mata wodiyan saluwaa simmidi baanaagaa eridi, bana kaalliya ammanettidaageetussi i etassi yan ‘sohuwaa giigissanaagaa’ yootiis. (Yohaannisa 14:2) Yesuusi saluwaa biyaageeta ba ‘amarida dorssa wude’ giidi xeesiis. (Luqaasa 12:32) Haratuura geeddarissi xeelliyo wode, guuta gidida ha ammanettida Kiristtaanetu citan deˈanaageeti aappunee? Ajjuutaa 14:1n deˈiyaagaadan kiitettida Yohaannisi: “Taani be7aas. Be7⁠ite, Dorssai [Yesuus Kirsttoosi] Xiyoone Deriyaa bolli eqqiis. A sunttainne a Aawaa sunttai som77⁠uwan xaafettido, issi xeetanne oitamanne oiddu sha7⁠u asati aara issippe de7⁠oosona” yaagiis.

²⁴ Yesuusi kiittido ammanettidaageeta gujjin, ha 144,000⁠u Kiristtaaneti saluwaa deˈuwau denddoosona. Eti denddiyoy awudee? Hegee polettanay Kiristtoosi qoncciyo wode gidiyoogaa kiitettida PHauloosi xaafiis. (1 Qoronttoosa 15:23) Neeni SHemppuwaa 9n tamaaranaagaadan, nuuni haˈˈi he wodiyan deˈoos. Hegaa gishshau, ha wodiyan 144,000⁠tuppe attida amaridaageeti hayqqiyo wode sohuwaara saluwan deˈanau denddoosona. (1 Qoronttoosa 15:51-55) Asaa naatuppe keehi darotussi qassi, sinttappe Gannate saˈan deˈanau denddana hidootay deˈees.

25. Kaalliya shemppuwan ay tamaaranee?

²⁵ Ee, Yihooway nu morkkiyaa, hayquwaa xoonanaagee attenna; hayqoy merinau xayana! (Isiyaasa 25:8) Gidikkonne, ‘Saluwaa deˈuwau denddiyaageeti yan ay oottanee?’ gaada neeni qoppennan aggakka. Eti saluwan issi maalaalissiya Kawotettaa aysuwan shaahettana. Nuuni he aysuwaabaa kaalliya shemppuwan gujjidi tamaarana.

[Tohossa qofaa]

GEESHSHA MAXAAFAY TAMAARISSIYOOBAA

▪ Geeshsha Maxaafay hayquwaappe denddidaageetubaa yootiyoogee nuussi ammanettiyo hidootay deˈanaadan oottees.—Yohaannisa 11:39-44.

▪ Yihooway hayqqidaageetussi zaarettidi deˈuwaa immanau amottees.—Iyyooba 14:13-15.

▪ Duufuwan deˈiya asaa naati ubbay denddana. —Yohaannisa 5:28, 29.

[Oyshaa]

 [Sinttaa 69n diya misiliyaa]

Eelaasi issi amˈˈee naˈaa hayquwaappe denttiis. —1 Kawotu 17:17-24

[Sinttaa 69n diya misiliyaa]

Yesuusi kiittido PHeexiroosi Kiristtaane maccaasiyo Dorqqo hayquwaappe denttiis.—Oosuwaa 9:36-42

[Sinttaa 69n diya misiliyaa]

Alaˈˈaazari denddidoogan asay daroppe ufayttiis. —John 11:38-44

 [Sinttaa 75n diya misiliyaa]

Hayqqidaageeti Gannatiyan denddidi, bantta siiqiyoogeetuura zaarettidi gayttana